Mika wo saraya tawologo ke
17
Ayiwa, ná wa bye wà Efirayimu wo faaboboyo koomɔ pu ni, wu mɛgɛ di ɲɛ na Mika. 2 Caŋa ka wee ya pa wu nu wu pye na: «Mu warifyɛn tuuŋɔɔ kabɔfonɔ nigin di xhuu nigin (1.100) wemu pʼa lɔ, a mʼi wu lɔvɔɔ wu laŋi nɛyɛ pyaa ki bɛ ɲii na ge, nɛ mu wu wa. Nɛ wʼa bi wu lɔ.» Wee tuun wu ni a wu nu wu jo: «Tɛhɛnɛ Baa Kilɛ wu baraga le ma ni na ja!» 3 A wu warifyɛn tuuŋɔɔ kabɔfonɔ nigin di xhuu nigin (1.100) wu kan wu nu wu mu. A nufɔɔ wu jo: «Nʼa da we warifyɛn we yaha Tɛhɛnɛ Baa Kilɛ yahama ni, kɔnhɔ di wu ɲa di daga jaa wa yaa di bye yapɛrɛ na ja wu mu. Wee tuun wu ni, nʼa da wu kan ma mu nimɛ.» 4 A jafɔɔ wu warifyɛn wu kan nufɔɔ wu mu. A nufɔɔ wu warifyɛn tuuŋɔɔ xhuu shuun (200) lɔ, na wee kan wu shɔhɔvɔɔ wu mu. A wee di wu ɲa, na jaa wa yàa na pye yapɛrɛ. A pʼi shɛ wee jaa wu yaha Mika kaban. 5 Lee funŋɔ ni, a Mika di Kilɛ-pɛɛŋɛ puga ta. A wu efodi†a wa yàa, na yapɛrɛɛ kii bɛ yàa, na wu ja wa lɔ, na wee pye saraya ɲaha shɔɔnrivɔɔ.6 Ayiwa, lee caŋa ɲii le ni, saan bye Izirayɛli fiige ki ni wɛ. La bɛɛri bu wemu bɛɛri taan, wʼa lee pye.b 7 Lee bi Levi wo tirige shɛn lɛvɔɔ wa ta wu na ɲɛ tiinnɛ na Zhuda Bɛtilɛhɛmu kulo li ni, Zhuda wo gbawege ki ni. 8 A wee lɛvɔɔ wu ba yìri foro Zhuda Bɛtilɛhɛmu ni, na wu da zhɛ tatɛɛngɛ katii sha wu diin wà. Na wu yaha koo na, wu na gaaŋi Efirayimu wo faaboboyo koomɔ pu ni, a wu shɛ nɔ Mika kaban. 9 A Mika di wu pye: «Mii mu dʼa yìri wɛ?» A lɛvɔɔ wu wu ɲɔ shɔ na: «Levi wo tirige shɛn wa nɛ ɲɛ na foro Zhuda Bɛtilɛhɛmu kulo li ni. Nɛ foro na ɲaari, di bu shɛ tatɛɛngɛ ta xuu wemu ni, di diin wà.» 10 A Mika di wu pye: «Tiin naha na mu, mʼa bye na to ni na saraya ɲaha shɔɔnrivɔɔ. Nɛ na da warifyɛn tuuŋɔɔ kɛ kaan ma mu yee funŋɔ ni, na fàya kɔɔn ma na, na ma yaligee kaan ma mu.» 11 Lee kadugo na, a wu sɔɔ na diin wee ná wu puga. A wee ná wu lɛvɔɔ wu co ba wu ja ɲɛ wɛ. 12 A Mika di wee levɔɔ wu le saraya ɲaha shɔɔnrivɛɛrɛ ti wo kapyeŋɛɛ ki ni, a lɛvɔɔ wu ɲɛri pye wu saraya ɲaha shɔɔnrivɔɔ, na diin wu puga. 13 A Mika di jo: «Nimɛ kunni, nɛ li cɛ jo Tɛhɛnɛ Baa Kilɛ na ba saama pye nɛ mu, bani we Levi tirige shɛn we wu ɲɛ nɛ wo saraya ɲaha shɔɔnrivɔɔ.»