Samusɔn ya kari Gaza kulo li ni
16
Ayiwa, caŋa ka Samusɔn ya kari Gaza kulo li ni. A wu shɛ saha ni navarashɔ wa ni, na jé wee mu. 2 A kulo li shɛɛn pʼi yi logo na Samusɔn wa pu kulo li ni. A pʼi kasɛɛgɛ pyevɛɛ pʼi yaha wu ɲɔ na, na piige ki bɛɛri pye na kulo li tajege ki kasɛri. A pʼi puyɛ co, pu ya yaaga bɛ pye wu na piige ki bɛɛri ni wɛ, bani pu bi puyɛ pyi na: «Ɲiga ki ba mugi, wee tuun wu ni wʼà da wu gbo.» 3 Ga a Samusɔn di sinnɛ, na piige ki taaga ki yɛ nigin pye. Ba ɲiŋɛ kʼa pa ɲi wɛ, a wu yìri, na kulo li tajege ki gburaya ye, ni gbeetiriye yi co, na yi kɔɔngi wolo ni yi shɔhɔshɔhɔyɔ yi bɛ ni. Faaboboŋɔ kemu ki wa Eburɔn kulo li ɲahatiimɛ pu ni ge, a wu yi lɔ taha wu kapaŋa na, na shɛ yi yaha kee wo ɲidii li ni.Samusɔn ɲii ya foro Delila fɛni
4 Lee kadugo na, a Samusɔn di ba ɲaha yeege cee wa fɛni. Wu bye Sorɛki fadaan li na, wu mɛgɛ di ɲɛ na Delila. 5 A Filisiti shɛɛn ɲuŋɔfɛɛ pʼi shɛ Delila mu wu puga, na shɛ wu pye: «Sɛɛgɛ taan Samusɔn na mʼa wu nɛgɛ, xuu wemu ni wʼa ke baraga nigbɔhɔ ke taa ge, mʼa wee cɛ, kɔnhɔ wù já wu co wù wu pɔ wù wu fanha xɔ. Wèe wa bɛɛri na ba ma kan warifyɛn tuuyo kabɔfonɔ nigin ni xhuu nigin (1 100).» 6 A Delila di Samusɔn pye: «Nʼa ma ɲɛɛri, xuu wemu ni mʼa ke baraga nigbɔhɔ ke taa ge, wee jo na mu. Sipya na já yaaga kemu bɛ taga ma pɔ wu ma fanha xɔ ge, mʼa kee bɛ shɛ na na.» 7 A Samusɔn di jo: «Pu bu nɛ pɔ ni sindaa mɛpurigee nivoŋɔɔ gbarashuun ni kiimu sanha waha wɛ, wee tuun wu ni nɛ baraga da xhɔ, nɛ ma bye ba sipyitiimɛ ɲɛ wɛ.» 8 A Filisiti shɛɛn ɲuŋɔfɛɛ pʼi shɛ ni sidaa mɛpurigee nivoŋɔɔ gbarashuun kan Delila mu kiimu sanha waha wɛ, a Delila di kee taga wu pɔ. 9 Lee bi sipyii pii ta pee na ŋmɔhɔ puga ka ni Delila kaban. A Delila di Samusɔn pye: «Samusɔn, Filisiti shɛɛn pʼa pa ma fɛni.» Ga a wu tee mɛɛrɛ ti kɔn ba na ma lize mɛɛ sòrogo mɛ wɛ. Lee na wu baraga ki tataga ya ta cɛ wɛ.
10 Lee kadugo na, a Delila di Samusɔn pye: «Li wii, mu ya nɛ pye ma yaxɔnhɔŋɔ na kafinɛyɛ jo nɛ mu. Nʼa ma ɲɛɛri yaaga kemu ki da já daga ma pɔ ge, kee shɛ na na.» 11 A Samusɔn di wu pye: «Mɛɛrɛ temu tʼa gbile na ɲɛ nivɔrɔ pʼi sanha labye pye ɲa ni ti ni-i ge, pu bu tee taga nɛ kemɛ pɔ, nɛ baraga na xhɔ, nɛ ma bye ba sipyitiimɛ ɲɛ wɛ.» 12 Wee tuun wu ni a Delila di mɛtigbiliye nivoyo lɔ na yi taga Samusɔn pɔ. Lee kadugo na na Samusɔn pye: «Samusɔn, Filisiti shɛɛn pʼa pa ma fɛni.» Lee ya sipyii pii niŋmɔhɔŋɔ ta puga ka ni. Ga a Samusɔn di yee mɛtigbiliye yi kɔn laha wu keye yi na ba lize mɛɛ nigin ɲɛ wɛ.
13 A Delila di Samusɔn pye: «Mu ya xɔnhɔni nɛ na fo na pa nɔ nimɛ na, na kafinɛyɛ kɔn nɛ mu. Ayiwa, yaaga kemu ki da zii já mu pɔ ge, kee shɛ na na sa.» A Samusɔn di jo: «Na ɲuŋɔ ki tegee gbarashuun wu le gbee ni, mʼa ki pinnɛ shin ni lize wu ni, mʼa gbee wu sikana li taga ki co. Lee bu bye, nɛ na bye ba sipyitiimɛ ɲɛ wɛ.» 14 A Delila di Samusɔn ŋmunuŋɔ, na ɲuŋɔ ki tegee gbarashuun wu le gbee wa ni, na yi pinnɛ shin, na gbee wu sikana li taga yi migile. Lee kadugo na, a wu Samusɔn pye: «Samusɔn, Filisiti shɛɛn pʼa pa ma fɛni.» Ga a wu yìri ŋmunumɔ pu na, na tee ɲuzhiire te, ni lize wu pinnɛ kɔɔngi ni gbee wu sikana li ni shiizhan. 15 Wee tuun wu ni, a Delila di jo: «Dii mu di da já jo na nɛ kaa ya dan mu ni, na ta mu zɔ wu di ɲɛ ni nɛ ni-i wɛ? Mu ya xɔnhɔ nɛ na tɔɔɲii taanri, bani mu ya ta ma wo baraga nigbɔɔhɔ ki taforogo jo nɛ mu wɛ.» 16 A Delila di daha yaha wu fɛni na navunŋɔ pɛlɛ wu na, caŋa caŋa wʼa wu fɔri ni yegeye ni. A lee di ba Samusɔn sɛɛgɛ tanha fo na wu fanha xɔ, lee ya já xu wu ni wɛ. 17 Wee tuun wu ni a Samusɔn di wu funŋɔ jomɔ pu bɛɛri jo Delila mu na: «Ɲuxhuupɔrɔgɔ sanha jé ɲa nɛ ɲuŋɔ ni wɛ, bani nɛ yaha Kilɛ wo yahama ni, fo ma na yaha na nu wu funŋɔ ni. Nɛ ɲuŋɔ bu xhuu, nɛ baraga na xhɔ. Nɛ na bye baraga baa fɔɔ, na bye ba sipyitiimɛ ɲɛ wɛ.»
18 Ba Delila ya li ɲa na Samusɔn ya wu funŋɔ keree bɛɛri paari xɔ wu mu wɛ, a wu tuduro tun Filisiti shɛɛn pu ɲuŋɔfɛɛ pu mu na pu pye: «Yi pa bani wʼa wu funŋɔ keree ki bɛɛri jo na mu nimɛ.» Wee tuun wu ni a Filisiti shɛɛn pʼi gari Delila kaban. Wari wemu ɲɔmɛɛ pʼa bi lɔ ge, a pʼi gari ni wee bɛ ni pu keye ni. 19 A Delila di Samusɔn ŋmunuŋɔ wu tɔɔyɔ na. Lee kadugo na, a wu ná wa yiri wʼa pa wu tegee gbarashuun wu bɛɛri xuu. A Delila di ɲɔ kɔn na se taa wu na, bani wu baraga kʼa bi wu yaha. 20 Wee tuun wu ni, a Delila di jo na: «Samusɔn, Filisiti shɛɛn pʼa pa ma fɛni.» A wu ɲɛ ŋmunumɔ pu na na jo: «Nimɛ nʼa da yìri voro pu niŋɛ ni ba nʼa tee na li pyi wɛ, di nayɛ shɔ pu na.» Ga wu bye li fiin na Tɛhɛnɛ Baa Kilɛ ya wee yaha wɛ. 21 A Filisiti shɛɛn pʼi wu co na wu ɲìi shuun wu ja, na gari ni wu ni Gaza kulo li ni, na shɛ wu le daɲaa shɔnhɔyɔ shuun na. A shinmatirinɛ di bye wu labye kaso wu ni. 22 A wu ɲuŋɔ kʼi ba ɲɔ kɔn na shiire fin sanha.
Samusɔn xugana
23 Ayiwa, a Filisiti shɛɛn ɲuŋɔfɛɛ di puyɛ ɲa na pʼi saraga nigbɔhɔ wolo pu wo kilɛ Dagɔn mu, pʼi fundanga pye. A pʼi jo: «Wèe wo kilɛ wu wʼa wù pɛn Samusɔn le wèe keŋɛ ni.» 24 Tuun wemu ni pee sipyii pu bɛɛri ya Samusɔn ɲa ge, a pʼi ganha na pu wo kilɛ wu sɔni, na yu:
«Wèe wo kilɛ wu wu wʼa wù pɛn ni wù fiige ki kyɛɛgivɔɔ
ni wù sipyii niɲɛhɛmɛɛ gbovɔɔ wu le wù keŋɛ ni.»
25 Na pu yaha kalenɛ li ni pu na fundanga pyi na xhuulo, a pʼi jo: «Yi Samusɔn yiri pa, wù ba zhɛhɛ wu na.» Wee tuun wu ni a pʼi ba ni Samusɔn ni na yìri kaso wu ni. A pʼi ba zhɛhɛ wu na. Pʼa bi wu yereŋɛ pugbɔhɔ ki benɛɛ pu niŋɛ ni. 26 A Samusɔn di yi jo wu kagaancomɔ lɛvɔɔ wu mu na: «Benɛɛ piimu pu ɲɛ pugbɔhɔ ki nɔhɔ ni ge, na yaha pee tàan, di nayɛ tiiŋɛ pu na.» 27 Lee bi pugbɔhɔ ki ta kʼa ɲi namaa ni cèe na. Filisiti shɛɛn ɲuŋɔfɛɛ pu bɛɛri pu bi bye wà. Sipyii kabɔfoŋɔɔ taanri shishiin (3.000) ya bi bye kee pugbɔhɔ ki kataŋa ki na, namaa ni cèe, na Samusɔn wii wu na kataanra keree ki pyi. 28 Wee tuun wu ni a Samusɔn di Tɛhɛnɛ Baa Kilɛ ɲɛɛri na: «Kafɔɔ Tɛhɛnɛ Baa Kilɛ, na ma ɲɛɛri, jo ma ma funŋɔ yaha nidogo na na. Kilɛ, baraga kan na mu sanha le tɔɔɲii le yɛ pe ni, kɔnhɔ di na luu li ɲiŋɛ tɔɔɲii nigin pe, Filisiti shɛɛn ni na ɲìi shuun wu ja wu wuu na.» 29 A Samusɔn di pugbɔhɔ ki funŋɔ ki niŋɛ benɛɛ shuun wu co na wuyɛ sinzin pu na. Wu kanige keŋɛ kʼa bi taha wà na wu kamɛnɛ keŋɛ di ɲɛ shuun wo wu na. 30 A wu jo: «Nɛ ni Filisiti shɛɛn pu pinnɛ xu shiizhan.» Lee kadugo na, a wu wuyɛ sinzin benɛɛ pu na ni wu baraga ki bɛɛri ni. A puga kʼi do Filisiti shɛɛn ɲuŋɔfɛɛ ni puga ki funŋɔ ki sipyii pu bɛɛri ɲuŋɔ ni. Lee funŋɔ Samusɔn ya sipyii piimu gbo wu caxhugo ge, a pee di ɲɛhɛ wu ɲiifɛɛrɛ ti wo sipyigbuu pu na.
31 A wu ceboronamaa pee ni wu puga shɛɛn pu bɛɛri di ba, na ba wu nixhugo ki lɔ na kari. A pʼi gari ni wu ni, na shɛ wu le wu to Manowa wo faŋa ki ni, Soreya kulo le ni Ɛsitoli kulo li tɛ wu ni.
Lee bi Samusɔn ta wʼa yee kɛlɛɛ shuun (20) pye xɔ ɲuŋɔfɛɛrɛ ti ni Izirayɛli nagoo pu ɲuŋɔ ni.