Samusɔn ya wu luu ɲiŋɛ Filisiti shɛɛn pu ni
15
Ayiwa, ba tɛɛrɛ la ya toro wɛ, alikama wa wo kɔnduun wu ni, a Samusɔn di ba shɛ foro wu shɔ wu na ni sikapige ni. A wu jo: «Nʼa da jé na shɔ wu puga ki ni.» Ga wu shɔ wu to wu ya ta sɔɔ na wu yaha wʼa jé wɛ. 2 A wu shɔ wu to wu jo: «Nɛ bi dà li na jo wu kaa wa nige mu na wɛ, na wu kan ma kaafɔɔ wu mu. Nʼa ma ɲɛɛri, wu cuun wu lɔ wu tɛgɛ! Ta wee yɛrɛ ya ɲɔ bɛ na kanha muzhɔfɔɔ wu na wɛ?» 3 A Samusɔn di pu pye: «Le tɔɔɲii le ni kunni, nɛ mɛhɛ bu kakuunɔ pye Filisiti shɛɛn na, jaagi da bye nɛ na wɛ.» 4 A Samusɔn di gari gɛ, na shɛ sige poyo xhuu taanri (300) co, na muubɔhɔɔ lɔ, na sige poyo yi kaduyo ye le yiyɛ ni shuun shuun, na muubɔhɔɔ nigin nigin le naya shuun shuun wu tɛ wu ni, na yi pɔ gbara yiyɛ na, 5 na na le kee muubɔhɔɔ ki na, na sige poyo yi yaha kari Filisiti shɛɛn pu alikama kɛrɛyɛ yi ni. Alikama nigɔnyahama wu fara toyereye wo wu na, a wu bɛɛri di sogi, na fara ɛrɛzɛn tiire kɛrɛyɛ ye, ni oliviye tiire kɛrɛyɛ yi bɛ na.6 A Filisiti shɛɛn pʼi jo: «Jɔgɔ wu di ɲɛ le pyevɔɔ wɛ?» A pʼi jo: «Samusɔn wi, Timina shɛɛn yafɛna we, bani wu yafɔɔ wʼa wu poro wu shɔ wu na, na wu kan wu kaafɔɔ wu mu.» Wee tuun wu ni a Filisiti shɛɛn pʼi gari, na shɛ cee we ni wu to wu sorogo. 7 A Samusɔn di pu pye: «Ayiwa, ni lee wa yee wo nibyii, nɛ bɛ wa da ga ŋmɔ wɛ, fo nɛ bu shɛ na luu li ɲiŋɛ yee ni.» 8 A wu sii pu tɛhɛnɛ ta, na pu ɲuŋɔ tugogaguunɔ tugo. Lee kadugo na, a wu digi kari na shɛ jé Etamu wo faaga wege ki ni.
Samusɔn ya kafaŋa kasanha kaciige taga kashɛn ŋmɔ
9 Ayiwa, a Filisiti shɛɛn pʼi gari, na shɛ pu kashɛn keŋɛ sin Zhuda koomɔ pu ni, na jaaga fo na shɛ nɔ Leyi kulo li na. 10 A Zhuda wo namaa pʼi jo: «Ɲaha fɛni yi da pa do wù na wɛ?» A pʼi jo: «Wèe ya pa wù ba Samusɔn pɔ, kɔnhɔ wù shɛ wu nibyii li fɔɔ tɔ wu mu.» 11 Lee funŋɔ ni, a Zhuda namaa kabɔfoŋɔɔ taanri (3.000) di digi kari Etamu faaga wege ki ni, na shɛ Samusɔn pye: «Ta mu ya li cɛ na wèe kafɛɛ pu ɲɛ Filisiti shɛɛn pu wɛ? Lekɛ ma dʼa pye mɛ wu na wɛ?» A wu pu pye: «Le pʼa pye nɛ na ge, lee fɔɔ nɛ tɔ pu mu.» 12 A pʼi wu pye: «Wèe ya tigi na pa di ba ma pɔ, kɔnhɔ wù shɛ ma kan Filisiti shɛɛn pu mu.» A Samusɔn di pu pye: «Yi kàa na mu, na jo yiyɛ pyaa wa da na gbo wɛ.» 13 A pʼi wu pye: «Ahayi, wèe wa da ma gbo wɛ! Wèe wa da ma co yɛ, na ma pɔ na kan pu mu.» A pʼi mɛfoŋɔɔ shuun taga wu pɔ na yeege faaga wege ki ni.
14 Ba wʼa nɔ Leyi kulo li ni wɛ, a Filisiti shɛɛn pʼi ba wu ɲuŋɔ círi, na ganha na xhugulo. Wee tuun wu ni a Tɛhɛnɛ Baa Kilɛ wo Munaa lʼi digi wu na. Mɛɛrɛ te ti bye wu keye yi na ge, a tee di bye ba lize mɛɛ ɲɛ wɛ, lemu ya sogi ge, a tʼi gɔn gɔn to. 15 A wu kafaŋa kasanha kaciige ka niburege ta, na wu keŋɛ yeege, na kee lɔ, na namaa kabɔfonɔ nigin (1.000) gbo ni kee ni. 16 A Samusɔn di jo:
«Kafaŋa kasanha kaciige
Sipyixuyo toŋɔ nigin, toyo shuun
Kafaŋa kasanha kaciige
kee ni nɛ sipyii kabɔfonɔ nigin (1.000) gbo.»
17 Ba wʼa pa jo xɔ wɛ, na kasanha kaciige ki wá taliige ni. A pʼi wee xuu wu mɛgɛ le na Arama-Leyia.
18 Ayiwa lee kadugo na, a waga di sii shɔ wu ni, a wu Tɛhɛnɛ Baa Kilɛ ɲɛɛri na: «Mu wʼa pii já na kan nɛ mu, ma kapyebye we, ta ma da ba na yaha waga ki gbo, di jé pii cekɔnbaalaa pii keŋɛ ni ya?» 19 Wee tuun wu ni, faaga wege ke ki ɲɛ Leyi ni ge, a Kilɛ di kee shɔn, a lɔhɔ di foro ki ni. A Samusɔn di gba, na guri baraga ta sanha bɛ. Lee na pʼa lee lobulowii li mɛgɛ le na Eyini-Kore (Lee kɔ́ri ɲɛ na ɲɛrɛgɛ pyevɔɔ wu wo lobulowii). Lee wa niɲaa we bɛ ni Leyi kulo li ni.
20 Yee kɛlɛɛ shuun (20) Samusɔn ya ta ɲuŋɔfɛɛrɛ ti ni Izirayɛli shɛɛn pu ɲuŋɔ ni Filisiti shɛɛn pu wo fanha ki tuun wu ni.