Samusɔn wo celeŋɛnɛ li wo kalenɛ le
14
Caŋa ka a Samusɔn di ba digi kari Timina ni, na shɛ cee wa ɲa wà Filisiti shɛɛn pu wo pushaa pu niŋɛ ni. 2 Ba wʼa kuri kari puga tuun wemu ni wɛ, na shɛ wu to we ni wu nu wu pye: «Cee wa nɛ ɲa Timina ni Filisiti shɛɛn pu wo pushaa pu niŋɛ ni. Nʼa yi ɲɛɛri yi wu sha na mu.» 3 A wu to we ni wu nu wu wu pye: «Cee wa shishiin da já da mu cebooloo pu wo poro pushaa pu ni-i ya? Mu da já wa ta wèe wo sipyii pu niŋɛ ni-i ya? Ta lʼa na nɔ mu wu na shɛ cee sha fo Filisiti shɛɛn mu ya? Pee piimu pu ɲɛ pu ya cekɔɔnrɔ pyi-i ge.» A Samusɔn di wu to wu ɲɔ shɔ na: «Yi wu sha na mu, bani wee kaa lʼa dan na ni.» 4 Na ta wu to we ni wu nu wu bi ta li cɛ na Tɛhɛnɛ Baa Kilɛ yɛpyaa ni lee ya foro wɛ, bani wee bi li shaa wu dun ni Filisiti shɛɛn ni, ma li kaɲuŋɔ pye Filisiti shɛɛn pu bi bye Izirayɛli nagoo pu ɲuŋɔ ni wee tuun wu ni.5 A Samusɔn ni wu to we ni wu nu wu digi kari Timina ni. Ba pʼa tɛɛŋɛ Timina shɛɛn pu wo ɛrɛzɛn tɛyɛ yi na wɛ, a cɛnripepinŋɛ ka di foro na Samusɔn ɲuŋɔ círi, na ganha na guuri. 6 A Tɛhɛnɛ Baa Kilɛ Munaa di digi wu na ni fanha nigbɔhɔ ni. A lee di wu pye wʼa cɛnri wu waraga ba sipya ya sikapige waraga wɛ, ali na li ta yaaga ka shishiin bye bɛ wu keŋɛ ni wɛ. Wʼa lee pye, ga wu ya ta yaaga jo wu to we ni wu nu wu mu wɛ. 7 Lee kadugo na, a wu digi kari na shɛ jo ni wee cee wu ni, a cee wu kaa di daan wu ni.
8 Ba tuun wa ya pa doro wɛ, a wu guri kari na wu shɛ wu shɔ wu furu pɔ. Na wu yaha koo li na, a wu waa na shɛ wee cɛnri wu nixhugo ki wii. A wu shɛ semugo ta kʼa sɛrɛ shan le wee cɛnri wu nixhugo ki funŋɔ ni. 9 A wu keŋɛ le semugo ki ni, na tee sɛrɛ ta kɔn na li na gaaŋi koo li na. Wu to ni wu nu wu bɛ bye ni wu ni. Ba wʼa nɔ pu na wɛ, na ta kan pee bɛ mu. A pʼi ti li, ga wu di ya yi jo pu mu na cɛnri nixhugo ki funŋɔ ni sɛrɛ tʼa foro wɛ.
Samusɔn ya talenɛ la jo na jo na pu li kɔ́ri jo
10 A wu to wu gari wee cee wu puga shɛɛn pu mu cee wu keree na. A Samusɔn di wu cekaanra yaliye yi gbegele wu yafɛɛ pu yíri wà, bani mu na lɛvɛɛ pu bi li pyi. 11 Ba pʼa Samusɔn ɲa wɛ, a pʼi naɲilee kɛlɛɛ taanri (30) wa shɔɔnri lɔ na pye wu tahama-nɔhɔmɔɔ. 12 A Samusɔn di pu pye: «Nʼa da talenɛ la jo yi mu. Yi bu já li kɔ́ri cɛ na jo na mu cekaanra ti cabyaa gbarashuun wu funŋɔ ni, nɛ na fadeye kɛlɛɛ taanri (30) kan yi mu, fàya yemu yʼa leni na jin sipyii niŋɛ ni ge, ni yee bɛ wo kɛlɛɛ taanri (30). 13 Ga yee bye yee di ya li kɔ́ri jo nɛ mu wɛ, yee bɛ na ba fadeye kɛlɛɛ taanri (30) ni fàya yemu yʼa leni na jin sipyii niŋɛ ni ge, yee wo kɛlɛɛ taanri (30) kan nɛ mu.» A pʼi wu ɲɔ shɔ na: «Talenɛ li jo, wù li logo.» 14 Ayiwa, a wu talenɛ li jo pu mu na:
«Lilimɛ funŋɔ ni yalige kʼa foro.
Baraga yaŋmuŋɔ funŋɔ ni tipoomɔ ya foro.
Yi li kɔ́ri jo na mu.»
A pʼi bye pu ya já lee talenɛ li kɔ́ri jo cabyaa taanri funŋɔ ni wɛ. 15 Caŋa shishɛɛrɛa wogo ki na, a pʼi Samusɔn shɔ wu pye: «Sɛɛgɛ taan ma poo wu na, mʼa le talenɛ le kɔ́ri sha cɛ wu mu ma jo wù mu, ni lee bɛ wɛ, wù na ba ma ni ma to wu puga ki sòrogo. Ta yʼa wèe yiri yɛrɛ yʼi ba wù keŋɛ yaŋmuyɔ shɔ wù na?» 16 Ayiwa, a Samusɔn shɔ wu gari wu fɛni, na shɛ ganha na mɛɛ suu wu ɲuŋɔ ni na yu: «Nakaara baa nɛ kaa ya dan mu ni bada wɛ, nɛ taanɲɛɛgɛ wa mu ni wɛ. Mʼa talenɛ jo nɛ fiige shɛɛn pu mu mu di ya ta lee kɔ́ri jo nɛ mu wɛ.» A Samusɔn di wu shɔ wu pye: «Li wii, nɛ ta ye ɲaha jo na to ni na nu bɛ mu wɛ, nɛ na ba yee ɲaha jo mu mu gɛ?» 17 A cee wu nɔrɔ yaha Samusɔn na, na mɛɛ suu wu ɲuŋɔ ni cekaanra ti cabyaa gbarashuun wu funŋɔ ni. Caŋa gbarashuun wogo ke, a Samusɔn di li kɔ́ri jo wu mu, bani cee wu bi wu fɔri toro. Lee kadugo na, a cee wu shɛ yi paari wu fiige ki shɛɛn pu mu. 18 Caŋa gbarashuun wogo ki na yani caŋa ki to ge, a kulo li namaa pʼi ganha na talenɛ li kɔ́ri yu Samusɔn mu na:
«Ɲaha kʼa taan sɛrɛ na wɛ?
Ɲaha baraga kʼa pɛlɛ cɛnri baraga na wɛ?»
A Samusɔn di pu pye: «Yee da bye yee ya yi wo niiyɛ tuugo ki pɔ nɛ wo nushɔ wu na wɛ, yee bi da ga já nɛ wo talenɛ li kɔ́ri cɛ wɛ.»
19 Wee tuun wu ni a Tɛhɛnɛ Baa Kilɛ wo Munaa lʼi digi Samusɔn na, a wu digi na shɛ Ashikalɔn kulo li ni, na shɛ namaa kɛlɛɛ taanri (30) gbo wà na pu fàya yi kuu, na guri pa ni yee ni na pa gan wu talenɛ li kɔ́ri wu jovɛɛ pu mu. A wu loyire wo di guri kari wu to kulo ni. 20 Lɛvɔɔ wemu wu bi Samusɔn shɔ wu keree ki ɲaha shɔɔnri cekaanra ti tuun wu ni ge, a pʼi Samusɔn shɔ wu ɲɛri kan wee mu.