Samusɔn segana
13
A Izirayɛli nagoo pʼi ba kakuuŋɔɔ ɲɔ kɔn na byi sanha Tɛhɛnɛ Baa Kilɛ na, a Tɛhɛnɛ Baa Kilɛ di pu le Filisiti shɛɛn keŋɛ ni yee kɛlɛɛ shishɛɛrɛ (40) funŋɔ ni. 2 Ná wa bye wee tuun wu ni Soreya kulo li ni Dan wo gbawege ki wo sipya wa wu bye wii, wu mɛgɛ di ɲɛ na Manowa. Wu shɔ wu bye seganha. Pya nigin bɛ bye wu mu wɛ. 3 Caŋa ka, a Tɛhɛnɛ Baa Kilɛ wo mɛlɛkɛ wu ba wuyɛ shɛ wee cee wu na, na wu pye: «Mu ɲɛ seganha, ma sanha pya ta ɲa wɛ, ga ma na ba yere yacɛrɛ na, na ja se. 4 Ga ta mayɛ kasɛri nimɛ, ma ganha da duvɛn kelee kafugo yagbaga ka shishiin gba wɛ, Kilɛ ya yaŋmuyɔ yemu bɛɛri wii na yʼa nɔhɔ ge, ma ganha ga kee ka shishiin li wɛ. 5 Bani li cɛ na ma na ba yere yacɛrɛ na na ja se. Wu ɲuŋɔ ganha ga xhuu wɛ, bani pya wu na ba bye Naziriyɛn.a Wu na ba yaha Kilɛ wo yahama ni, fo na wu yaha wu nu wu funŋɔ ni. Wee wu da ba ɲɔ kɔn na Izirayɛli nagoo pu ɲuŋɔ wo Filisiti shɛɛn pu wo fanha ki nɔhɔ ni.»b 6 A cee wu gari, na shɛ wu poo wu pye: «Kilɛ wo ná wa ya pa foro nɛ na, wʼa bi foro Kilɛ wo tudunmɔ wa fɛni, wemu ɲɛ fyaara wo ge. Nɛ ta wu yege wu tayirige wɛ, wu bɛ di ya ta wu mɛgɛ shɛ nɛ na wɛ. 7 Ga a wu nɛ pye: ‹Ma na ba yere yacɛrɛ na, na ba funana se. Na co nimɛ na, ma ganha ba duvɛn, kelee kafugo yagbaga ka shishiin gbuu wɛ. Yaaga kemu bɛ kʼa nɔhɔ ge, ma ganha ga kee ka li wɛ, bani wee pya wu na ba bye naziriyɛnc Kilɛ mu, na co wu yacɛrɛ li na, fo na shɛ nɔ wu caxhugo na.› »8 Ayiwa, a Manowa di Tɛhɛnɛ Baa Kilɛ kemɛ ɲɛɛri na jo: «Kafari na Kafɔɔ! Nʼa ma ɲɛɛri, Kilɛ wo ná wemu mʼa yaha pa ge, wu yaha pa sanha wu ba wù kalaa wù nibyii ni pya wu shizhaa na, wee wemu wu da ba se ge!» 9 A Kilɛ di Manowa wo ɲɛrɛgɛ ki logo, a tudunmɔ wu guri pa cee wu mu. Wu nidɛɛngɛ ki bye sige ki ni. Wu poo Manowa bye ni wu ni wɛ. 10 A wu baa kari tɔvuyo na, na shɛ wu poo wu pye: «Ná wemu wu da foro nɛ mu keki caŋa ge, wʼa pa sanha niɲaa bɛ!» 11 A Manowa di daha wu shɔ wu na na kari, na shɛ ná wu ɲa, na wu pye: «Ta mu wu da jo ni we cee we ni?» A ná wu jo: «Uun, nɛ wi.» 12 A Manowa di jo: «Ayiwa nimɛ, ma kajuu li ga ba fa foro, tatoroyo yekɛ ni wèe da yaa na toro, na keree kiikɛ pye wee pya wu shizhaa na wɛ?» 13 A Tɛhɛnɛ Baa Kilɛ wo tudunmɔ wu Manowa pye: «Yaŋmuyɔ yemu bɛɛri nɛ tɔrɔ shɛ cee wu na ge, wʼa yaa na wuyɛ co yee bɛɛri tàan. 14 Wu ganha ga ɛrɛzɛn yaaga ka shishiin li wɛ. Wu ganha ga duvɛn, kelee kafugo yagbaga ka shishiin gba wɛ, wu di ganha ga fɛfɛɛrɛ baa yaaga ka shishiin li wɛ. Yemu bɛɛri nʼa jo wu mu ge, wu kasɛɛgɛ yaha yee bɛɛri na.» 15 A Manowa di Tɛhɛnɛ Baa Kilɛ wo tudunmɔ wu pye: «Wʼà ma ɲɛɛri, wù sige jɛɛrɛ funŋɔ ni wù sikapige ka gbegele ma mu!» 16 A Tɛhɛnɛ Baa Kilɛ wo tudunmɔ wu Manowa pye: «Nɛ mɛhɛ ma sige, nʼa da ma yalige li wɛ, ga ma bi giin mʼa saraga nizogoŋɔ ka wolo Tɛhɛnɛ Baa Kilɛ mu, lee pye!» Manowa bi li cɛ nago kanna Tɛhɛnɛ Baa Kilɛ wo tudunmɔ wu ɲɛ wii wɛ. 17 Wee tuun wu ni a Manowa di Tɛhɛnɛ Baa Kilɛ wo tudunmɔ wu pye: «Ma mɛgɛ ki shɛ wù na, kɔnhɔ yemu mʼa jo ge, yee ba fa foro, wù baraga taha ma na.» 18 A Tɛhɛnɛ Baa Kilɛ wo tudunmɔ wu wu pye: «Ɲaha na ma di na mɛgɛ yegee wɛ? Kakanhana mɛgɛ ki ɲɛ kii!» 19 A Manowa di sikapige ki co, ni myɛ saraga, na yi pye saraga nizogoŋɔ Tɛhɛnɛ Baa Kilɛ mu, faaga ki na. A Tɛhɛnɛ Baa Kilɛ di kakanhana pye. Manowa ni wu shɔ wu bi lee wii. 20 Saraga ki wo na ki bi ɲí, na yìri saraga ki tawologo ki na, na duri fugba wu ni. A Tɛhɛnɛ Baa Kilɛ wo tudunmɔ wu dugi kari kee na ki ni. Ba Manowa ni wu shɔ wʼa lee ɲa wɛ, a pʼi do ɲiŋɛ na, na ɲahaya ye buri. 21 Tɛhɛnɛ Baa Kilɛ wo tudunmɔ wu ya wuyɛ shɛ nige Manowa ni wu shɔ wu na wɛ. Wee tuun wu ni a Manowa di li cɛ na Tɛhɛnɛ Baa Kilɛ wo tudunmɔ wu ɲɛ wii. 22 A Manowa di wu shɔ wu pye: «Ago wèe wa da xhuu mɛ, bani wèe ya Kilɛ ɲa!» 23 A cee wu wu pye: «Tɛhɛnɛ Baa Kilɛ da bi wuyɛ yaha wu wèe gbo, wu bi da ga sɔɔ wèe wo saraga nizogoŋɔ ke ni myɛ saraga ki na wɛ, wu bi da ga sɔɔ wèe pu kii keree kii bɛɛri ɲa wɛ, wu di bi da ga sɔɔ wu wèe yaha wèe pu kii keree kii shi logo nimɛ wɛ.»
24 Ayiwa, a wee cee wu ba ja se, na wu mɛgɛ le na Samusɔn. A pya wʼi lɛ, a Tɛhɛnɛ Baa Kilɛ bɛ di baraga le wu ni. 25 A Tɛhɛnɛ Baa Kilɛ wo Munaa lʼi ɲɔ kɔn na labye pyi ni wu ni Maxhane-Dan kulo li ni, Soreya kulo le, ni Ɛsitoli kulo li tɛ wu ni.