Efirayimu shɛɛn ni Zhɛfute ya tun
12
Ayiwa, a Efirayimu shɛɛn di puyɛ pinnɛ, na gari Safɔn kulo li ni, na shɛ Zhɛfute pye: «Ɲaha na mu dʼa shɛ kashɛn kɔn Amɔ shɛɛn pu na, mu ya ta wèe yiri kɔnhɔ wù binnɛ shɛ ni ma ni-i wɛ? Wèe wʼa da na le ma puga ki na, na ma pinnɛ sorogo ni ki ni.» 2 A Zhɛfute di pu pye: «Nɛ ni na sipyii pu ni, waha nigbɔ wʼa jé wèe ni Amɔ shɛɛn pu tɛ ni fo xuuni. A nɛ mujuu wá yee mu, yee ya ta pa nɛ shɔ pu na wɛ. 3 Nɛ li ɲa jo yee ya go yʼi ba na shɔ pu na-ɛ ge, a nɛ na munaa li pɛrɛ fɔ, na gari Amɔ shɛɛn pu fɛni, a Tɛhɛnɛ Baa Kilɛ di shɛ pu le nɛ keŋɛ ni. Ɲaha na yi da pa kashɛn kɔɔn na na niɲaa wɛ?»4 A Zhɛfute di Galadi shɛɛn namaa pu bɛɛri yiri pinnɛ, kɔnhɔ pʼi kashɛn kɔn Efirayimu na. A Galadi shɛɛn pʼi se ta Efirayimu na. Lee bi Efirayimu shɛɛn pu ta pu na Galadi shɛɛn pu pyi na: «Yee Galadi shɛɛn, kanfɛmɛɛ yee ɲɛ, yee ya fɛ na foro Efirayimu ni, na shɛ jé Manase ni!» 5 Xuu wemu ni pʼa Zhurudɛn Gba wu kɔɔn na se Efirayimu ni ge, a Galadi shɛɛn pʼi shɛ wee xuu wu co, na Efirayimu shɛɛn pu koo sige. Ba wa bɛɛri ya paa na nɔ, na jo na pu wee yaha wu gba wu kɔn ɲɛri wɛ, pʼa wu yege na: «Efirayimu shɛn mu ɲɛ gɛ?» Wu bu jo: «Ahayi» 6 pʼa wu pye na wu jo: «Shibolɛti.» Wʼa jo na: «Sibolɛti» bani pu bi já le ɲɔɲii le jo li jogana na wɛ. Lee bu bye, pʼa wu co, na wu kɔɔn Zhurudɛn Gba wu takɔngɔ ki ni. A Efirayimu shɛɛn kabɔfoŋɔɔ kɛlɛɛ shishɛɛrɛ ni shuun (42.000) di xhu wee tuun wu ni.
7 A Zhɛfute di bye Izirayɛli fiige ki ɲuŋɔfɔɔ fo na ta yee gbaara. Lee kadugo na, a Galadi shɛɛn Zhɛfute di ba xhu, a pʼi wu le Galadi kulo la ni.
Ibisan ni Elɔn ni Abidɔn wo ɲuŋɔfɛɛrɛ ti keree
8 Ayiwa, ba Zhɛfute ya laha wà wɛ, a Bɛtilɛhɛmu shɛɛn Ibisan di bye ɲuŋɔfɔɔ Izirayɛli ni. 9 Jalaa kɛlɛɛ taanri (30) ni pushaa kɛlɛɛ taanri (30) wu bye wu mu. A wu wu pushaa kɛlɛɛ taanri (30) wu kan gbaya ni kpɛɛngɛ shɛɛn mu piimu ɲɛ wu tirige shɛɛn wɛ, na pushaa kɛlɛɛ taanri (30) lɔ kpɛɛngɛ na piimu ɲɛ wu tirige shɛɛn wɛ, na kan wu jalaa pu mu. A wu yee gbarashuun pye Izirayɛli fiige ki ɲuŋɔfɛɛrɛ ti ni. 10 Lee kadugo na, a Ibisan di ba xhu, a pʼi wu le Bɛtilɛhɛmu kulo li ni.
11 Ba wee ya laha wà wɛ, a Zabulɔn shɛɛn Elɔn di bye ɲuŋɔfɔɔ Izirayɛli ni, na ta yee kɛ. 12 Lee kadugo na, a Zabulɔn shɛɛn Elɔn di ba xhu, a pʼi wu le Ayalɔn kulo li ni Zabulɔn fiige ki ni.
13 Ba wee ya laha wà wɛ, Ilɛli ja Abidɔn, na foro Piratɔn kulo li ni, a wee di bye ɲuŋɔfɔɔ Izirayɛli ni. 14 Jalaa kɛlɛɛ shishɛɛrɛ (40) ni ɲabiye kɛlɛɛ taanri (30) wu bye wu mu. Kafabiye kɛlɛɛ gbarashuun (70) na pee di bi duri. A wu yee gbarataanri pye ɲuŋɔfɛɛrɛ ti ni Izirayɛli fiige ki ni. 15 Lee kadugo na, a Ilɛli ja Abidɔn di ba xhu, Piratɔn kulo li shɛn we, a pʼi wu le Piratɔn kulo li ni, Efirayimu fiige ki ni, Amalɛki shi wu wo faaboboyo yi ni.