Zhɛfute ya pye Izirayɛli shɛɛn pu ɲuŋɔfɔɔ
11
Ayiwa, Galadi shɛn wa bye wà na Zhɛfute, kashɛn naŋmaga ki bye kii. Navarashɔ wa wo ja wu bye wii. Galadi wʼa bi Zhɛfute se. 2 Galadi wo shɔ wuyɛ pyaa ya bi jalaa pii se wu mu. Ba cee wu jalaa pʼa pa lɛ wɛ, na Zhɛfute kɔri, na wu pye: «Mu da ga cɛn taa taa wèe to wu puga ki ni wɛ, bani navarashɔ ja mu ɲɛ.» 3 A Zhɛfute di baa, kɔnhɔ wu shɔ wu ceboronamaa pu na, na shɛ diin Tobu fiige ki ni. A kaɲɔɔ baa fɛɛ pii di faari pa binnɛ Zhɛfute tàan. A pee di ganha na kashɛn ŋmuu ni wu ni shiizhan.4 Ba tɛɛ la ya pa doro wɛ, a Amɔ shɛɛn pʼi ba kashɛn ŋmɔ ni Izirayɛli ni. 5 Ba Amɔ shɛɛn pʼa pa do Izirayɛli na wɛ, a Galadi wo nɔhɔlɛɛ pʼi shɛ Zhɛfute fɛni Tobu fiige ki ni. 6 A pʼi shɛ Zhɛfute pye: «Pa mʼa ba bye wù kashɛn keye yi ɲuŋɔfɔɔ, wù kashɛn ki ŋmɔ ni Amɔ shɛɛn pu ni.» 7 A Zhɛfute di Galadi nɔhɔlɛɛ pu pye: «Ta yee bɛ pʼa bi nɛ kɔ, na na kɔri yeege na to wu puga ki ni wɛ? Ɲaha na yee di ma nɛ mu nimɛ yi wo cɔnrɔmɔ pu tuun wu ni wɛ?»
8 A Galadi wo nɔhɔlɛɛ pʼi Zhɛfute pye: «Lee na wèe ya pa mu mu nimɛ, kɔnhɔ mʼa doro wù ɲaha na, mʼa kashɛn ŋmɔ ni Amɔ shɛɛn pu ni, mʼa nɔhɔ pye wù ɲuŋɔfɔɔ, ni Galadi shɛɛn pu bɛɛri ɲuŋɔfɔɔ.» 9 A Zhɛfute di Galadi nɔhɔlɛɛ pu pye: «Yi bu gari ni na ni, na di shɛ kashɛn ŋmɔ ni Amɔ shɛɛn pu ni, Tɛhɛnɛ Baa Kilɛ bu shɛ pu le na keŋɛ ni, nɛ wʼa da bye yi ɲuŋɔfɔɔ.» 10 A Galadi nɔhɔlɛɛ pʼi Zhɛfute pye: «Tɛhɛnɛ Baa Kilɛ ɲuwii wa wù bɛɛri nigin nigin wu ɲɔjomɔ pu ni, wù bye wù di ya shɛ li pye na saha ni ma jomɔ pu ni wɛ.» 11 A Zhɛfute di gari mu lee karigana li na ni Galadi nɔhɔlɛɛ pu ni. A sipyiire tʼi wu teŋɛ puyɛ ɲuŋɔ ni na pye ɲuŋɔfɔɔ ni pu ɲahagbaa fɔɔ. Zhɛfute ni nɔhɔlɛɛ pʼa bɛ ɲɔmɛɛ lemu na ge, a Zhɛfute di guri lee ɲɔmɛɛ li wo jomɔ pu na Tɛhɛnɛ Baa Kilɛ ɲaha tàan Misipa ni.
Zhɛfute ya tuduro tun Amɔ shɛɛn pu mu
12 Ayiwa, a Zhɛfute di tudunmɔɔ pii tun Amɔ shɛɛn pu wo saan wu mu, na pu shɛ wu pye na: «Lekɛ nɛ dʼa toro ma na, a mʼa ba do na na, na kashɛn kɔn na fiige ki na wɛ?» 13 A Amɔ shɛɛn pu wo saan wu Zhɛfute wo tudunmɔɔ pu pye na: «Ba Izirayɛli ya yìri Misira fiige ki ni na pa wɛ, na ba nɛ fiige ki co, na lɔ fo Arinɔ Gba wu na, fo na shɛ nɔ Zhabɔki Gba, ni Zhurudɛn Gba wu na. Ayiwa ki kan na mu nimɛ ɲaɲiŋɛ na.»
14 A Zhɛfute di guri tudunmɔɔ pii bɛ tun sanha Amɔ shɛɛn pu wo saan wu mu, 15 na pu shɛ wu pye na: «Yemu Zhɛfute ya jo ge, yee yi wa mɛ: ‹Izirayɛli ya ta Mowabu fiige ki co wɛ, wu di ya ta Amɔ shɛɛn pu bɛ wo fiige ki co wɛ. 16 Bani ba Izirayɛli ya pa na yìri Misira fiige ki ni wɛ, siwaga ki ni wʼa ɲaari fo na shɛ nɔ Suumɔ Loɲiga ki na, na da nɔ Kadɛsi ni. 17 Wee tuun wu ni a Izirayɛli di tudunmɔɔ tun pʼa shɛ yi jo Edomu fiige ki wo saan wu mu na: “Nʼa ma ɲɛɛri, na yaha di doro ma fiige ki ni.” Ga Edomu fiige ki saan wu funŋɔ ya pye wu yaaga bɛ logo wɛ. A wu pii tun shɛ Mowabu fiige ki bɛ wo saan wu mu, a wee di shɛ li she. Lee funŋɔ ni a Izirayɛli di gori Kadɛsi ni.a 18 Lee kadugo na Izirayɛli di ɲaari sanha siwaga ki ni, na maha toro Edomu fiige ke, ni Mowabu fiige ki kadugo yíri. A wu doro Mowabu fiige ki Kilɛ-nɔhɔ ki na. A pʼi shɛ pu buguro ti sin Arinɔ dugo ki kogii wu na, na ta pu ya jé Mowabu fiige ki ni wɛ, bani Arinɔ wo dugo ke ki ɲɛ Mowabu fiige ki kodɛhɛnɛ li na.b 19 A Izirayɛli di tudunmɔɔ pii tun shɛ Sixhɔn mu, Amɔri shɛɛn pu wo saan we, wee bi tiin Ɛshibɔn kulo li ni, na pu shɛ wu pye na: “Nʼa ma ɲɛɛri, wù yaha wù doro ma fiige ki ni wʼà se wù tashɛgɛ ki ni.”c 20 Ga Sixhɔn ya ta dà Izirayɛli na xuuni, wu wu yaha toro wu fiige ki ni wɛ. A wu wu kashɛn keye yi bɛɛri pinnɛ, na shɛ kashɛn keŋɛ sin Yaxhasi ni, kɔnhɔ wu kashɛn kɔn Izirayɛli na. 21 A Tɛhɛnɛ Baa Kilɛ, Izirayɛli wo Kilɛ wu Sixhɔn ni wu kashɛn keye yi bɛɛri le Izirayɛli keŋɛ ni, a Izirayɛli di se ta yi na. Amɔri shɛɛn pu bye kee fiige ki ni, a Izirayɛli nagoo pʼi kee fiige ki bɛɛri co, na ɲɛri ki kafɛɛ. 22 A pʼi Amɔri shɛɛn pu wo fiige ki bɛɛri co, na lɔ Arinɔ Gba wu na, fo na shɛ nɔ Zhabɔki wo gba wu na; na lɔ siwaga ki na, fo na shɛ nɔ Zhurudɛn Gba wu na.
23 « ‹Ayiwa nimɛ go Tɛhɛnɛ Baa Kilɛ, Izirayɛli wo Kilɛ wu wʼa Amɔri shɛɛn pu wo fiige ki shɔ pu na na kan wu wo sipyii pu mu, pee piimu pu ɲɛ Izirayɛli nagoo pu ge, mu di giin mʼi kee ɲiŋɛ ki shɔ pu na ya? 24 Mu wo yapɛrɛ Kemɔshi bu ɲiŋɛ kemu kan mu mu, ta mu ɲɛ ma bye kee wo kafɔɔ wɛ? Wee tuun wu ni ɲiŋɛ taa lemu bɛɛri Tɛhɛnɛ Baa Kilɛ ya kan wèe mu ge, ɲaha ma zhe wèe ganha bu lee lɔ wɛ? 25 Ta mu ya ye Zipɔri ja Balaki na, Mowabu wo saan we?d Ta wee ya yogo kɔn Izirayɛli na, na kashɛn kɔn wu na ya? 26 Izirayɛli na ɲɛ Ɛshibɔn ni wu mahama kulogoo ki ni, ni Aroyɛri ni wu mahama kulogoo ki ni, na fara Arinɔ Gba wu ɲɔ kulogoo ki bɛɛri na, li yee xhuu taanri (300) wu ɲɛ nimɛ. A ɲaha di yee pye yee ya wee tuun wu bɛɛri pye yee ya ta kee kulogoo ki shɔ-ɛ wɛ? 27 Li wa nago kanna nɛ wʼa jurumu pye mu na-ɛ dɛ, ga mu wʼa pii te, na pa kashɛn kɔn nɛ na. Tɛhɛnɛ Baa Kilɛ wemu wu ɲɛ kiiri kɔnvɔɔ wu ge, wee wu kiiri wu kɔn Izirayɛli nagoo pee ni Amɔ shɛɛn pu tɛ ni niɲaa!› » 28 Ga Amɔ shɛɛn pu wo saan wu ya ta Zhɛfute wo tudunmɔɔ pu jomɔ pu logo wɛ.
Zhɛfute ya ɲɔ faa Kilɛ mu
29 Ayiwa, a Tɛhɛnɛ Baa Kilɛ wo Munaa lʼi digi Zhɛfute na, a wu Galadi ni Manase ɲiŋɛ ki já toro, na shɛ doro Misipe kulo li ni Galadi wo koomɔ pu ni, na gari Amɔ shɛɛn pu wo fiige ki ni. 30 A Zhɛfute di ɲɔfaaga faa Tɛhɛnɛ Baa Kilɛ mu, na jo: «Mu bu sii Amɔ shɛɛn pu le nɛ keŋɛ ni kunni,e 31 yaaga bɛɛri kʼa foro nɛ puga ki ni na pa jiri nɛ na, nɛ se tawo na yìri Amɔ shɛɛn pu wo fiige ki ni ge, kee yaaga ke na ba bye Tɛhɛnɛ Baa Kilɛ wogo, nɛ na ba kee pye saraga nizogoŋɔ.»
32 A Zhɛfute di gari, na shɛ kashɛn kɔn Amɔ shɛɛn pu na, a Tɛhɛnɛ Baa Kilɛ di pu le wu keŋɛ ni. 33 A wu sii pu kemɛ gbo, na lɔ Aroyɛri kulo li na, fo na shɛ nɔ Miniti kulo li na, kee ya pye kulogoo kɛlɛɛ shuun (20). Na gari fo na shɛ nɔ Abɛli-Keramimu ni. A Amɔ shɛɛn mu ɲuŋɔ di sogi Izirayɛli nagoo pu mu.
34 Ayiwa, na Zhɛfute yaha wu na ma puga, Misipa kulo li ni, a wu poro fucɛɛrɛ lʼi foro di zhɛ wu ɲuŋɔ círi ni yatinyɛ, ni xɔnhɔrɔ ni. Lee fucɛɛrɛ li yɛ pe li bye wu mu. Li bu foro lee fucɛɛrɛ li ni, ja watii, kelee fucɛɛrɛ latii bye nige wu mu wɛ. 35 Ba wʼa wu ɲa wɛ, na wu fàya shɛɛngi na jo: «Aa, na poro, go kapetiinɛ ni mʼa na le mɛ dɛ! Mu wʼa bɔɔngɔ shan nɛ ɲuŋɔ ni! Ɲɔfaaga nɛ faa Tɛhɛnɛ Baa Kilɛ mu, nɛ di wa da já guri nige kadugo wɛ.» 36 A porofɔɔ wu wu pye: «Ma bu da mʼa ɲɔfaaga faa Tɛhɛnɛ Baa Kilɛ mu, lemu wo ɲɔ mʼa faa Tɛhɛnɛ Baa Kilɛ mu ge, lee pye na na, bani Tɛhɛnɛ Baa Kilɛ ya ma luu li ɲiŋɛ na xɔ ma pɛɛn pu ni, Amɔ shɛɛn pee.» 37 A wu tofɔɔ wu pye sanha na: «Kaa nigin nʼa da zha ma mu. Yebyaa shuun kan na mu, di da se da ɲaari faaboboyo yi na, di da mɛɛ suu ni na pushaɲiinɛɛ pu ni, ma li kaɲuŋɔ pye nɛ na ba gori wà nacɛbaa.» 38 A tofɔɔ wu jo: «Shɛ!» Na wu yaha kari wʼa shɛ yebyaa shuun wu pye. A wu gari ni wu pushaɲiinɛɛ pu ni, na shɛ mɛɛ su ma li kaɲuŋɔ pye wʼa kori wà nacɛbaa. 39 Ba yebyaa shuun wʼa fa wɛ, a wu guri pa wu to wu yíri, a wu wu wolo ɲɔfaaga ke, ba wʼa bi ki faa wɛ. Porofɔɔ wu bi ta sinnɛ ɲa ni ná ni wɛ. Na co lee na, a lʼi ɲɛri kalɛɛ Izirayɛli fiige ki ni, 40 yee bɛɛri fucɛɛgɛɛ ki ma shɛ cabyaa shishɛɛrɛ pye na Galadi shɛɛn Zhɛfute poro wu mɛɛ suu faaboboyo yi na.