Tola ni Yayiri wo ɲuŋɔfɛɛrɛ ti keree
10
Ayiwa, Abimɛlɛki wo caŋa ɲii lʼa toro ge, a Dodo ja Puva wo ja Tola, wee ɲɛ Isakari wo gbawege ki shɛn wa, a wee di foro yere na wu Izirayɛli ɲuŋɔ wolo. Wee bi tiin Shamiri kulo li ni, Efirayimu wo faaboboyo koomɔ pu ni. 2 Yee kɛlɛɛ shuun ni taanri (23) wee ya pye ɲuŋɔfɛɛrɛ ti na Izirayɛli fiige ki ni, lee kadugo na, a wu xhu, a pʼi wu le Shamiri kulo li ni.3 Ba wee ya laha wà wɛ, a Galadi shɛɛn Yayiri di foro yere. A wee di yee kɛlɛɛ shuun ni shuun (22) pye ɲuŋɔfɛɛrɛ ti na Izirayɛli fiige ki ni. 4 Jalaa kɛlɛɛ taanri (30) wu bye wu mu, pee di duri kafaya kɛlɛɛ taanri (30) na, na ɲɛ kulogoo kɛlɛɛ taanri (30) wo ɲuŋɔfɛɛ. Ali niɲaa we bɛ ni pʼa kee kulogoo kii pyi na Yayiri wo kulogoo, Galadi fiige ki ni. 5 Lee kadugo na, a Yayiri di ba xhu, a pʼi wu le Kamɔ kulo li ni.
Amɔ shɛɛn pʼa pa do Izirayɛli nagoo pu na
6 Ayiwa, lemu lʼa kolo Tɛhɛnɛ Baa Kilɛ mu ge, a Izirayɛli nagoo pʼi ba ɲɔ kɔn na lee pyi sanha. A pʼi ɲɔ kɔn na kapyeŋɛɛ pyi yapɛrɛɛ Baali ni Ashera mu, ni Aramu wo kilɛlɛɛ pee, ni Sidɔn wo kilɛlɛɛ pee, ni Mowabu wo kilɛlɛɛ pee, ni Amɔ shɛɛn pu wo kilɛlɛɛ pee, ni Filisiti shɛɛn pu wo kilɛlɛɛ pee. A pʼi kadugo le Tɛhɛnɛ Baa Kilɛ ni, na bye pu ya kapyeŋɛɛ pyi wu mu wɛ. 7 A Tɛhɛnɛ Baa Kilɛ luu di yìri Izirayɛli nagoo pu tàan. A wu pu ɲɔ yaha Filisiti shɛɛn pee, ni Amɔ shɛɛn pu mu. 8 A pee di ɲaa wo Izirayɛli nagoo pu na, na pu ɲaa lee yee le. Izirayɛli nagoo piimu pu bye Zhurudɛn Gba wu Kilɛ-nɔhɔ kogii wu na, Amɔri shɛɛn pu wo fiige ki ni, ni Galadi wo koomɔ pu ni ge, a pʼi ɲaa wo pee na fo na shɛ da yee kɛ ni gbarataanri (18). 9 A Amɔ shɛɛn pʼi ba Zhurudɛn Gba wu kɔn ɲɛri, na shɛ do Zhuda wo gbawege ke, ni Bɛnzhamɛ wo gbawege ke, ni Efirayimu wo puga ki na. A ɲaa wu sii pɛlɛ Izirayɛli nagoo pu na. 10 A Izirayɛli nagoo pʼi mɛyire wá Tɛhɛnɛ Baa Kilɛ mu na: «Wèe ya jurumu pye mu na, wèe ya wù wo Kilɛ wu yaha wà, na shɛ kapyeŋɛɛ pye yapɛrɛɛ Baali yɛ mu.» 11 A Tɛhɛnɛ Baa Kilɛ di Izirayɛli nagoo pu pye: «Misira shɛɛn, ni Amɔri shɛɛn, ni Amɔ shɛɛn, ni Filisiti shɛɛn, 12 ni Sidɔn shɛɛn, ni Amalɛki shi shɛɛn, ni Mawɔn shɛɛn, pee bi yee ɲaani. Tuun wemu ni yee ya mɛyire wá nɛ mu ge, ta nɛ ya yee shɔ pu na wɛ? 13 Ga yere, yee ya nɛ yaha, na kapyeŋɛɛ pye kilɛlɛɛ piitiilee mu. Lee lʼa nɛ pye nɛ da yee shɔ nige wɛ. 14 Kilɛlɛɛ piimu yee ya shɔɔnri lɔ ge, yi mɛyire wá pee mu! Na pu pa yi shɔ yi wo cɔnrɔmɔ pu tuun wu ni!» 15 A Izirayɛli nagoo pʼi Tɛhɛnɛ Baa Kilɛ pye: «Jurumu wèe ya pye. Lemu lʼa ma tàan ge, lee pye wù na. Ga wʼà ma ɲɛɛri, ɲɔ wù na, mʼa wù ɲuŋɔ wolo niɲaa!» 16 Kilɛlɛɛ piitiilee piimu pu ɲɛ pu mu ge, a pʼi pee kyɛɛgi, na ɲɔ kɔn na kapyeŋɛɛ pyi Tɛhɛnɛ Baa Kilɛ mu. A Izirayɛli wo ɲaa wu pu ɲiɲaara leŋɛ Tɛhɛnɛ Baa Kilɛ ni.
17 Ayiwa, a Amɔ shɛɛn pʼi puyɛ pinnɛ, na ba pu kashɛn keŋɛ ki sin Galadi fiige ki ni, a Izirayɛli nagoo pʼi puyɛ pinnɛ, na ba pu kashɛn keŋɛ ki sin Misipa ni. 18 A Galadi wo sipyii pee, ni pu ɲuŋɔfɛɛ pʼi yi jo puyɛ mu na: «Ná wekɛ wʼa da ba shɛ kashɛn ki ɲɔ kɔn Amɔ shɛɛn pu na wɛ? Wee na ba bye Galadi fiige ki shɛɛn pu bɛɛri wo ɲuŋɔfɔɔ!»