Abimɛlɛki ya pye Sisɛmu kulo li saan
9
Caŋa ka Yeru-Baali ja Abimɛlɛki ya yìri, na gari Sisɛmu kulo li ni, na shɛ jo ni wu nu wu ceboronamaa pee, ni wu nu wu to wu wo kpuun li bɛɛri ni. A wu pu pye: 2 «Nʼa yi ɲɛɛri, yi yi jo Sisɛmu wo sipyigbɔɔ pu bɛɛri mu na: ‹Lʼa pɔrɔ yee mu Yeru-Baali wo jalaa kɛlɛɛ gbarashuun (70) wu bɛɛri wu tiin yee ɲuŋɔ ni laa, ta kelee lʼa pɔrɔ shɛn nigin wu tiin yee ɲuŋɔ ni? Yi yi funyɔ yaha to li na, na yee kaciiye ni yee ceexaara ta ti wa nɛ!› » 3 A wu nu wu cebooloo pʼi yee bɛɛri jo Sisɛmu kulo li sipyigbɔɔ pu mu. A pu zɔlɔɔ di jaanna ɲɛri Abimɛlɛki yíri, bani pu bi yi yu puyɛ mu na: «Wèe ceboro wu ɲɛ wii!» 4 A pʼi warifyɛn sikilee kɛlɛɛ gbarashuun (70) wolo yapɛrɛɛ Baali-Beriti wo puga ki ni, na kan Abimɛlɛki mu. A Abimɛlɛki di kaɲɔɔ baa fɛɛ ni naganya ya shɔ, a pee sipyii pʼi daha wu fɛni. 5 A wu gari wu to wu puga ki ni, Ofira kulo li ni, na shɛ wu ceboronamaa pu gbo faaga nigin na, Yeru-Baali wo jalaa kɛlɛɛ gbarashuun we (70). Zhotamu yɛ pe wʼa shɔ to pu ni, bani wee bi shɛ lara. Wee wu bye Yeru-Baali wo kurogo ja we. 6 A Sisɛmu wo sipyigbɔɔ pu bɛɛri, ni Bɛti-Milo wo puga ki bɛɛri di shɛ puyɛ pinnɛ pʼi Abimɛlɛki teŋɛ saanra ti na, faakageesunŋɔ ki wo terebɛnti tige ki tàan, Sisɛmu kulo li ni.Zhotamu ya talenɛ la jo wá Abimɛlɛki ni Sisɛmu shɛɛn na
7 Ayiwa, a yee di nɔ Zhotamu na. A wu gari na shɛ yere Garizimu wo faaboboŋɔ ki ɲidii li ni, na mujugbɔɔ wá pu mu na:
«Sisɛmu wo sipyigbɔɔ pee,
yi funŋɔ bi ɲɛ Kilɛ di yi jomɔ logo, yi logo na ɲɔ na!
8 Tiire ya jo caŋa ka na ti da saan teŋɛ tiyɛ ɲuŋɔ ni.
A tʼi Oliviye tige pye: ‹Mu wu pye wèe wo saan we!›
9 Ga a oliviye tige di yi pye:
‹Sìnmɛ pemu nɛ yeege ge, pee ya dan Kilɛ ni, na dan sipyii bɛ ni.
Ta yee wa giin na nɛ wu da pee sìnmɛ pu wo bye wu ɲɔ yaha,
di shɛ figi da yeree tiye yisaya ɲuɲɔ na gɛ?›
10 Wee tuun wu ni a tiye yʼi nitoroŋɔ pye na:
‹Mu wu pa, ma ba bye wù saan!›
11 Ga a nitoroŋɔ di jo:
‹Ta yee wa giin nɛ di na wo yasɛyɛ nijeye, nidanya yi wo bye ɲɔ yaha,
di shɛ figi da yeree tiye yisaya ɲuɲɔ na gɛ?›
12 Ayiwa, a tiye yʼi ɛrɛzɛn tige pye na:
‹Mu wu pa, ma ba bye wù saan!›
13 Ga a ɛrɛzɛn tige di yi pye:
‹Nɛ wo sinmɛ pu pʼa fundanga leni Kilɛ ni sipyii ni goo,
nɛ ma pee wo bye ɲɔ yaha, di shɛ figi da yeree tiye yisaya ɲuɲɔ na ya?›
14 Wee tuun wu ni a tiye yi bɛɛri di xhuyo tahaya pye na:
‹Mu wu pa, ma ba bye wù saan!›
15 A xhuyo tahaya yʼi tiye yisaya pye na:
‹Yi bi giin yʼi na teŋɛ saan yiyɛ ɲuŋɔ ni ni funvige ni,
yi pa yʼi ba jé na wo ɲimɛ pu ni!
Yi bu zhe lee ni, wee tuun wu ni na ki foro xhuyo tahaya yi ni
kʼi Liban fiige ki wo sɛdiri tiye yi sòrogo!› »
16 A Zhotamu di shɛ ɲaha na, na jo: «Ayiwa nimɛ, Abimɛlɛki yee ya teŋɛ na pye yi saan ge, ta funvige kaa, ni katiinɛ lʼa pye lere ya? Ta kasaana yee ya pye mɛ Yeru-Baali ni wo puga ki na? Cemɛ pemu bɛɛri wʼa pye yee mu ge, ta yee ya pu cɛ wu mu? 17 Bani yee kɛrɛyɛ ni nɛ to wʼa kashɛn ki ŋmɔ. Wʼa wu munaa pɛrɛ fɔ, kɔnhɔ wu yee ɲuŋɔ wolo Majan shɛɛn pu keŋɛ ni. 18 Ga a yee niɲaa wuu di yìri nɛ to wu puga ki fɛni. Yee ya wu jalaa pu gbo faaga nigin na, namaa kɛlɛɛ gbarashuun (70). Nɛ to wu bulozhɔ wʼa ja wemu se wu mu na Abimɛlɛki ge, a yee di wee teŋɛ na pye saan Sisɛmu kulo li sipyigbɔɔ pu ɲuŋɔ ni, na bani wee ɲɛ yi ceborona. 19 Yee bu da yee ya li pye funvige kaa, ni katiinɛ Yeru-Baali ni wu puga ki na, niɲaa wo caŋa ɲii le ni, wee tuun wu ni Abimɛlɛki wu pye yi mu fundanga kajii, yi bɛ di bye wu mu fundanga kajii! 20 Li bu da li ya pye lere wɛ, na ki foro Abimɛlɛki ni kʼi Sisɛmu kulo li sipyigbɔɔ pee, ni Bɛti-Milo wo puga ki sòrogo. Na di foro Sisɛmu bɛ wo sipyigbɔɔ pee, ni Bɛti-Milo wo puga ki ni, kʼi Abimɛlɛki sòrogo!» 21 Lee kadugo na, a Zhotamu di yìri wà, na baa gbee. A wu gari na shɛ diin Bɛri ni, na lii wu ceborona Abimɛlɛki na.
Sisɛmu kulo lʼa yìri Abimɛlɛki fɛni
22 Ayiwa, a Abimɛlɛki di diin Izirayɛli ɲuŋɔ ni na ta yee taanri. 23 Lee kadugo na, a Kilɛ di bɛganhara le Abimɛlɛki ni Sisɛmu wo sipyigbɔɔ pu tɛ ni. A Sisɛmu wo sipyigbɔɔ pʼi Abimɛlɛki nɔhɔ yaha. 24 Lee funŋɔ ni, Abimɛlɛki ya kafupege kemu taga wu ceboronamaa, Yeru-Baali jalaa kɛlɛɛ gbarashuun (70) wu gbo ge, pee wo shishan pu goo di wolo wu na. Sisɛmu wo sipyigbɔɔ pu pʼa wu tɛgɛ tee gbuuro ti na ge, li goo wʼi wolo pee bɛ na. 25 A Sisɛmu kulo li sipyigbɔɔ pʼi faan Abimɛlɛki na, na sipyii pii pɛri pɛri faaboboyo yi ɲidegee ki ni, kulo li fɛɛ li ni. Piimu bɛɛri pʼa doroo wà ge, a pʼi ganha na pee wo yaŋmuyɔ yi bɛɛri shuu pu na. A yee di nɔ Abimɛlɛki na.
26 Lee tɛrɛ li ninunɔ ni Ebɛdi ja Gali ya pa diin Sisɛmu ni, wu ni wu ceboronamaa. A kulo li shɛɛn pʼi wu pye pu tadaŋa. 27 A kulo li shɛɛn pʼi ba foro caŋa ka, na gari pu ɛrɛzɛn kɛrɛyɛ yi ni, na shɛ ɛrɛzɛn nilɛ wu kɔn, na wu lɔhɔ ki wolo. Lee kadugo na, a pʼi fundanga ɲɔ kɔn na byi. A pʼi gari pu yapɛrɛ li wo gbaha ki ni, na shɛ gemɛ li, na gba, na Abimɛlɛki laŋi. 28 A Ebɛdi ja Gali di jo: «Ɲaha Abimɛlɛki di ɲɛ wèe Sisɛmu shɛɛn mu, fo wu na pa diin wèe ɲuŋɔ ni wɛ? Ta wu ɲɛ mɛ Yeru-Baali ja wu wɛ? Ta Zebuli bɛ wu ɲɛ wu fanha ki ɲahagbaa fɔɔ wɛ? Yi kuu Sisɛmu to Amɔri wo nagoo pu mu. Lekɛ na wèe di da guu Abimɛlɛki mu wɛ? 29 Ee! Pu da bi le kulo le wo ɲuŋɔfɛɛrɛ ti kan yɛ nɛ mu! Nɛ bi da Abimɛlɛki kɔri! Nɛ bi da wu pye: ‹Abimɛlɛki, ma kashɛn keŋɛ ki gbegele, mʼa shɛ na koo sige!› »
30 Ayiwa, Zebuli wemu wu ɲɛ kulo li gbafɛnɛɛri wu ge, ba wee ya pee jomɔ pu logo Ebɛdi ja Gali wo ɲɔ ki na wɛ, a wu luu di yìri. 31 A wu tudunmɔɔ pii peele tun Abimɛlɛki mu, na pu shɛ wu pye na: «Ebɛdi ja Gali ni wu ceboronamaa pʼa pa Sisɛmu kulo li ni, pu wa na kulo li yirige ma fɛni. 32 Nimɛ do, yìri ni ma kashɛn keŋɛ ki ni ke piige ke ni, mʼa shɛ ŋma le sipoŋɔ ki ni. 33 Ɲiga ɲisɔɔgɔ na, caŋa ki ba fòro, mʼa shɛ do kulo li na. Gali ni wu kashɛn keŋɛ ki ba foro na ma ɲuŋɔ cirini, lemu lʼa ma taan ge, mʼa lee pye wu na.»
34 A Abimɛlɛki ni wu kashɛn keŋɛ ki bɛɛri di ba yìri kee piige ki ni, na puyɛ taa taa na pye taaya shishɛɛrɛ, na shɛ ŋma le Sisɛmu kulo li tàan. 35 A Ebɛdi ja Gali di ba foro, na shɛ yere kulo li tajege ki ɲɔ ki na. A Abimɛlɛki ni wu kashɛn keŋɛ ki bɛɛri di gburogi foro ŋma wu ni. 36 Ba Gali ya pu ɲa wɛ, na Zebuli pye: «Kashɛn keŋɛ ka kʼa diri na yìri faaboboŋɔ ki ɲidii li ni.» A Zebuli di wu pye: «A go faaboboyo ye wo ɲimɛ pe mu wa ɲaa mɛ, na giin na sipyii pi.» 37 A Gali di nugo jo: «Kashɛn keŋɛ yɛ pyaa pyaa kʼa sii ke, na diri na yiri fiige ki niŋɛ ki wo faaboboŋɔ ki na, kuruŋɔ ka bɛ di wa ma celɔbyii pu wo terebɛnti tige ki koo li cɛ fɛni.» 38 A Zebuli di wu pye: «Ta nageree bɛ mu bi luu wɛ? Mu ya jo na: ‹Abimɛlɛki ɲɛ ɲaha, fo wèe pu na kuu wu mu wɛ?› Kashɛn keŋɛ ke mu bi fanri ge, ta kee bɛ ki wa ke wɛ? Yìri nimɛ, mʼa kashɛn kɔn wu na!» 39 A Gali di doro Sisɛmu sipyigbɔɔ pu ɲahagbaa na, na kashɛn kɔn Abimɛlɛki na. 40 A Abimɛlɛki di wu nɔhɔ niinɛ, a wu baa kɔnhɔ wu shɔ. A sipyixuyo niɲɛhɛmɛɛ di do do, fo na pa nɔ kulo li tajege ki ɲɔ ki na. 41 A Abimɛlɛki di ba diin Aruma kulo li ni. A Zebuli di Gali ni wu ceboronamaa pu kɔri, pu ya já tiin Sisɛmu kulo li ni wɛ.
42 Ɲimuguro ti na, a sipyiire tʼi foro sige ki ni. A Abimɛlɛki di yee logo. 43 A wu wu kashɛn keŋɛ ki taa na pye taaya taanri, na shɛ ŋma le sige ki ni. Ba wʼa sipyiire ti ɲa ti na fòro kulo li ni wɛ, a wu yìri pu fɛni, na do pu na. 44 A Abimɛlɛki ni wu wo kuruŋɔ ki sipyii pʼi ba, na ba yere kulo li tajege ki ɲɔ ki na. A kuruyo shuun wusamaa di do sige ki wo sipyiire ti na, na se ta pu na. 45 A Abimɛlɛki di caŋa ɲii li bɛɛri pye na kashɛn ŋmuu kulo li na. A wu kulo li co, na li sipyii pu gbo. Lee kadugo na, a wu kulo li ja, na suumɔ wo li tasinŋɛ ki ni. 46 Kulo li zangaso-tɔɔngɔ kemu ki bye na Migidali-Sisɛmu ge, ba kee wo sipyigbɔɔ pʼa kee keree ki logo wɛ, a pee di gari na shɛ jé yapɛrɛɛ Beriti wo pɛɛŋɛ puga ki wo nɔhɔdaan puga ki ni. 47 A pʼi ba yi jo Abimɛlɛki mu na Migidali-Sisɛmu shɛɛn pu bɛɛri ya shɛ binnɛ wee xuu wu ni. 48 Wee tuun wu ni, a Abimɛlɛki ni wu kashɛn keŋɛ ki bɛɛri di dugi Zalimɔ faaboboŋɔ ki na. A Abimɛlɛki di kacerege ka lɔ, na tige geŋɛ ka kɔn na taha wu kapaŋa na. Lee kadugo na, a wu wu sipyii pu pye: «Lemu nɛ pye ge, go yʼa lee ɲa gɛ? Yi bɛ pu lee shi pye, yʼi fyaala li fɛni.» 49 A kuruŋɔ ki sipya wa bɛɛri di tige geŋɛ ka kɔn, a pu bɛɛri di daha Abimɛlɛki na. A pʼi shɛ tige geye yi taha yapɛrɛ gbaha ki nɔhɔdaan puga ki na, na na le ki ni ki funŋɔ sipyii pu bɛɛri na. Lee funŋɔ ni a Migidali-Sisɛmu shɛɛn pu bɛɛri di xhu. Pee bye sipyii kabɔfonɔ nigin (1.000), namaa ni cèe.
Abimɛlɛki ya xu
50 Lee kadugo na, a Abimɛlɛki di gari Tebɛsi kulo li fɛni. A wu shɛ kashɛn keŋɛ sin Tebɛsi kulo li fɛni, na li co. 51 Kashɛn ɲaha kɔn kɔn zangaso-tɔɔngɔ ka bye lee kulo li niŋɛ ki ni. A sipyiire ti bɛɛri di baa shɛ jé kee ni, namaa fara cèe pu na, ni kulo li sipyigbɔɔ pu bɛɛri. A pʼi gburaya yi tɔ, na dugi kari zangaso-tɔɔngɔ ki wo kataŋa ki na. 52 A Abimɛlɛki di ba do kee zangaso-tɔɔngɔ ki na, na fulo ki tajege ki na, kɔnhɔ wu na le ki na. 53 Wee tuun wu ni, a cee wa di tira ka yaha shan Abimɛlɛki ɲuŋɔ ni, a kee di ba wu ɲuŋɔ ki kpɔn ja. 54 Taapile ni a wu wu kashɛn yagboyo yi covɔɔ wu pye, wu kapyebye we na: «Ma ŋmɔpara li kɔ, mʼa na gbo, kɔnhɔ pu ganha bu ba jo wɛ na: ‹Cee wʼa wu gbo.› » A wu kapyebye wu wu su furi, a wu xhu. 55 Ba Izirayɛli namaa pʼa li ɲa na Abimɛlɛki ya xu wɛ, a pu bɛɛri di gari pu piyɛyɛ.
56 Lee funŋɔ ni, kakuunɔ lemu Abimɛlɛki bi pye wu to wu na, ni wu ceboronamaa kɛlɛɛ gbarashuun (70) wu wo gbo wu ni ge, Kilɛ di lee pye lʼa to wu ɲuŋɔ ni. 57 Sisɛmu shɛɛn pu bi kakuunɔ lemu bɛɛri pye ge, a Kilɛ di lee pye lʼa to pu ɲuŋɔ ni. Lee funŋɔ ni, laŋi wemu Yeru-Baali ja Zhotamu ya pye ge, a wee di do pu ɲuŋɔ ni.