Efirayimu shi shɛɛn pʼa jaagi shan Zhedeyɔn na
8
Ayiwa, a Efirayimu wo shi shɛɛn pʼi Zhedeyɔn pye: «Le mʼa pye mɛ wèe na ge, lee wa lekɛ wɛ? Mu bi se di zhɛ kashɛn ki kɔn Majan shɛɛn pu na tuun wemu ni ge, ɲaha na mu di ya ta wèe yiri-i wɛ?» A pʼi yogo jo ni wu ni saama na. 2 A Zhedeyɔn di pu pye: «Li can koo ni, lekɛ nɛ dʼa pye, wa wu já lee taanna ni yee wo nibyii li ni wɛ? Efirayimu ya ɛrɛzɛn wemu fugi na ta ge, ta wee ya ɲɛhɛ na kanha Abyezɛri wo ɛrɛzɛn kɛrɛyɛ yi wo ɛrɛzɛn wu bɛɛri na wɛ? 3 Yee keŋɛ ni Kilɛ ya Majan wo ɲuŋɔfɛɛ shuun wu le, Orɛbu ni Zebu. Wee tuun wu ni, nɛ dʼa lekɛ pye wa wu já lee taanna ni yee wuu li ni wɛ?» Ba wʼa yee jo wɛ, a pu logoo di ɲiŋɛ.Zhedeyɔn ya shɛ Majan shɛɛn wo ɲuŋɔfɛɛ pu co
4 Ayiwa, a Zhedeyɔn di nɔ Zhurudɛn Gba wu na, na wu kɔn ɲɛri ni wu namaa xhuu taanri (300) wu ni, pee piimu pu bye ni wu ni ge. Pu bi kanha, ga lee bɛ na, a pu sanha di ganha na Majan shɛɛn pu nɔhɔ niinɛ. 5 Ba pʼa nɔ Sukɔti kulo li ni wɛ, A Zhedeyɔn di kulo li shɛɛn pu pye: «Nʼa yi ɲɛɛri jo yi buuri wa kan na tahama-nɔhɔmɔɔ pu mu, bani pʼa kanha. Majan saannaa Zeba ni Salimuna nɔhɔ nɛ wa niinɛ.» 6 A Sukɔti kulo li ɲuŋɔfɛɛ pʼi jo: «Lekɛ lʼi da wèe pye wèe pu buuri kan ma kashɛnŋmuu pu mu, na ta mu di sanha se ta Zeba ni Salimuna na na-ɛ wɛ?» 7 Wee tuun wu ni a Zhedeyɔn di jo: «Payi payi! Tɛhɛnɛ Baa Kilɛ ba Zeba ni Salimuna le nɛ keŋɛ tuun wemu ni, nʼa da ba yee ceesɛɛyɛ yi cere ni xhuyo kashɛngɛɛ, ni siwaga ki wo xhutɔɔnyɔ yi ni.» 8 A wu yìri wee xuu wu ni, na gari Penuwɛli kulo li ni, na shɛ kee ɲɛrɛgɛ ke ninuŋɔ pye. Sukɔti shɛɛn ya wu ɲuŋɔ círi cirigana lemu na ge, a Penuwɛli shɛɛn bɛ di wu ɲuŋɔ círi lee cirigana li na. 9 A wu Penuwɛli shɛɛn pu bɛ pye: «Nɛ bu shɛ majaŋa ta, na guri na ma, nʼa da ba we zangaso we ja.»
10 Lee bi Zeba ni Salimuna ta Karikɔri kulo li ni, pu ni pu kashɛn keye yi ni. Namaa kabɔfoŋɔɔ kɛ ni kaguro shishiin (15.000) yɛ, pee yɛ pʼa bi kori Kilɛ-nɔhɔ shɛɛn pu wo kashɛn keŋɛ ki bɛɛri ni. Namaa kashɛnŋmuu kabɔfoŋɔɔ xhuu nigin ni kɛlɛɛ shuun (120.000) wu bi xu. 11 A Zhedeyɔn di doro ɲaaɲaalaa pu wo koo li ni, Noba kulo le, ni Yogbeya kulo li Kilɛ-nɔhɔ ki na, na shɛ do Majan shɛɛn pu wo kashɛn keŋɛ ki na, na ta pee di bi puyɛ wii na pee ya shɔ xɔ. 12 A saannaa Zeba ni Salimuna di baa gbee, ga a Zhedeyɔn di pu nɔhɔ niinɛ, na shɛ pu ta, na pu shuun wu co, na kashɛn keŋɛ ki bɛɛri tin.
Zhedeyɔn ya kuri pa Sukɔti ni Penuwɛli kulogoo ki fɛni
13 Ayiwa, Zhowazi ja Zhedeyɔn ya shɛ kashɛn ki ŋmɔ xɔ, na guri na ma ge, a wu doro Ɛrɛsi faaga ki taduguŋɔ ki wo koo li ni. 14 A wu Sukɔti kulo li wo lɛvɔɔ wa ta, na wee co, na wu yege. A wee di Sukɔti kulo li ɲuŋɔfɛɛ pee, ni li nɔhɔlɛɛ pu mɛyɛ ka na kan wu mu, pu bɛɛri ya pye namaa kɛlɛɛ gbarashuun ni gbarashuun (77). 15 Lee kadugo na, a wu gari Sukɔti shɛɛn pu fɛni, na shɛ pu pye: «Yee ya nɛ fanha Zeba ni Salimuna keree na, na jo: ‹Lekɛ lʼi da wèe pye wèe pu buuri kan ma kashɛnŋmuu pu niganhaya yi mu, na ta mu di sanha se ta Zeba ni Salimu na na-ɛ wɛ?› A go pee pu wa piiri!» 16 Wee tuun wu ni a Zhedeyɔn di kulo li nɔhɔlɛɛ pu co, na xhuyo kashɛngɛɛ, ni siwaga ki wo xhutɔɔnyɔ yi taga pu kpɔn. 17 A wu Penuwɛli wo zangaso-tɔɔngɔ ki bɛ ja, na kulo li shɛɛn pu gbo.
18 Lee kadugo na, a wu Zeba ni Salimuna yege na: «Namaa piimu yee ya gbo Tabɔri faaboboŋɔ ki na ge, dii pu bye wɛ?» A pʼi wu ɲɔ shɔ na: «Pu bye kanna mu wi. Pu bi bye kanna saannaa nagoo pi.» 19 Wee tuun wu ni a Zhedeyɔn di jo: «Nɛ ceboronamaa pu bye pii, nɛ nu wu jalaa. Tɛhɛnɛ Baa Kilɛ ɲìi wo wu mɛgɛ na, yee da bi pu yaha gbobaa, nɛ bɛ bi da ga yee gbo wɛ!» 20 Lee kadugo na, a wu wu jashiimɛ Yetɛri pye: «Pu gbo!» Ga lɛvɔɔ wu ya ta wu ŋmɔpara li kɔɔngi wɛ, bani wu bi fyagi. Nɔhɔcɛrɛɛ wu bye wii. 21 A Zeba ni Salimuna di Zhedeyɔn pye: «Mayɛ pyaa ki wù gbo! Bani ba ná ɲɛ wɛ, mu wu fanha ki bɛ ɲɛ.» A Zhedeyɔn di Zeba ni Salimuna gbo. Yalere temu ti bye pu ɲɔhɔyɔ yi katiye yi ni ge, a wu tee wolo.
Zhedeyɔn ya li she wu da bye saan wɛ
22 Ayiwa, lee kadugo na, a Izirayɛli nagoo pʼi ba Zhedeyɔn pye: «Tiin wù ɲuŋɔ ni, bani mʼa wèe shɔ Majan shɛɛn na. Ma ja wu na ba ma faa, wee bɛ wo ja na ba wu faa.» 23 A Zhedeyɔn di pu pye: «Nʼa da ba diin yi ɲuŋɔ ni wɛ, na ja wu bɛ wɛ. Tɛhɛnɛ Baa Kilɛ wʼa da ba diin yee ɲuŋɔ ni.»
24 A Zhedeyɔn di pu pye: «Kaa nigin nʼa da zha yi mu. Wa bɛɛri wu sanni kabelenɛ nigin wolo wu kashɛn naafuu wu ni wu kan na mu.» (Sanni kabeleŋɛɛ ki bye pu pɛɛn pu mu, bani Isimayɛli shi shɛɛn pu bye pii.) 25 A pʼi jo: «Lʼa taan wèe ni wèe pu wù sanni kabeleŋɛɛ ki kan ma mu.» A pʼi fadegbɔhɔ ka pii ɲiŋɛ ki na, a wa bɛɛri di sanni kabelenɛ nigin wolo wu kashɛn naafuu wu ni na pa zhan kee na. 26 Sanni kabeleŋɛɛ kiimu wʼa sha pu mu ge, a kee wo tidugumɔ pʼi bye sikilee kabɔfonɔ nigin ni xhuu gbarashuun (1 700). A pʼi yalere ta bɛ, ni nige tɔɔrɔ bɛ kan wu mu. Saannaa fadegbɔyɔ niɲɛɛyɛ yemu Majan saannaa pʼa bi leni ge, a pʼi yee bɛ kan wu mu, na fara ɲɔhɔyɔ yi wo katiye yalere ti na. 27 A Zhedeyɔn di wee sanni wu taga efodi†a wa yàa, na shɛ wee yaha Ofira kulo li ni, wuyɛ pyaa wo kulo le. A Izirayɛli nagoo pu bɛɛri di ganha na ma na wee jaa wu pɛlɛ. A wee jaa wu bye Zhedeyɔn ni wu kpuun li wo co co tifuugo.
Zhedeyɔn wo caŋa ɲii li taxɔgɔ
28 Mu na Izirayɛli nagoo pʼa Majan nagoo pu fanha xɔ. Pu ya ɲuyirige ta nige wɛ. Ayiwa, a Izirayɛli fiige kʼi fɛrɛmɛ ta yee kɛlɛɛ shishɛɛrɛ (40) funŋɔ ni Zhedeyɔn wo shi caŋa ɲɛhɛɛ ki bɛɛri funŋɔ ni.
29 Ayiwa, lee bi Zhowazi ja Yeru-Baali ta wʼa kuri kari na shɛ diin wu puga. 30 Jalaa kɛlɛɛ gbarashuun (70) Zhedeyɔn ya ta, wuyɛ pyaa ki wo nizii, bani cèe niɲɛhɛmɛɛ pu bye wu mu. 31 Wu furupɔbaa shɔ wemu wu bye Sisɛmu kulo li ni ge, wee bɛ bi ja wa ta wu mu. Wʼa bi wee mɛgɛ le na Abimɛlɛki.
32 Zhedeyɔn bi sii lɛ fo xuuni, na da xu. A pʼi wu le wu to Zhowazi wo faŋa ki ni, Ofira kulo li ni, lee lemu li ɲɛ Abyezɛri wo tirige shɛɛn pu wo kulo li ge.
33 Ayiwa, ba Zhedeyɔn ya xu wɛ, a Izirayɛli nagoo pʼi ɲɔ kɔn sanha na yapɛrɛɛ Baali pɛlɛ. A pʼi Baali-Beriti yaha ba kilɛ ɲɛ wɛ. 34 Izirayɛli nagoo pu ya ta pu funŋɔ yaha nidogo Tɛhɛnɛ Baa Kilɛ, pu Kilɛ wu na wɛ, wee wemu wʼa bi pu wolo pu mahama pu wo pɛɛn pu bɛɛri keŋɛ ni ge. 35 Zhedeyɔn wemu pʼa bi Yeru-Baali ge, wee ya kasaaŋaa kiimu pye Izirayɛli mu ge, kee bɛ ni ki wuu ni, pu ya ta pye ɲɔmɛhɛɛ fɛɛ wee bɛ wo kpuun li mu wɛ.