Zhedeyɔn ya se ta Majan nagoo pu na
7
Kee caŋa ki ɲimuguro ti ɲisɔɔgɔ ki na, Zhedeyɔn wemu pʼa byi sanha na Yeru-Baali ge, a wee di wu sipyiire ti bɛɛri ɲaha co, na shɛ wu kashɛn keŋɛ ki sin Harɔdi lobulowii li ɲɔ na. Majan wo kashɛn keŋɛ kʼa bi bye suumɔ kulo kacɛ ki na, More yaŋaboŋɔ ki shizhaa na fadaan li na. 2 A Tɛhɛnɛ Baa Kilɛ di yi jo Zhedeyɔn mu na: «Ma sipyii pʼa ɲɛhɛ toro, nɛ funŋɔ wa di Majan nagoo pu le pu keŋɛ ni wɛ. Lee nibyii na, Izirayɛli nagoo pu na ba puyɛ pɛlɛ na yu na pee wo fanha keŋɛ kʼa pee shɔ nɛ kadugo na. 3 Nimɛ pe jomɔ pe jo sipyiire ti mu na sipyii piimu pʼa fyagi ni piimu pʼa jɛlɛ ge, na pee pu kuri, pʼi laha Galadi faaboboŋɔ ki na pʼa se puga.» Ba wʼa yee jo wɛ, a sipyii kabɔfoŋɔɔ kɛlɛɛ shuun ni shuun (22.000) di guri sipyiire ti ni, a pusamaa di gori sipyii kabɔfoŋɔɔ kɛ (10.000).a 4 A Tɛhɛnɛ Baa Kilɛ di Zhedeyɔn pye sanha na: «Sipyii pa ɲɛhɛ toro sanha. Tigi shɛ ni pu ni lɔhɔ ki ɲɔ ki na, di shɛ pu shɔɔnri ma mu wà. Sipyii piimu kaa nʼa da ba jo ma mu ge, pee na ba shɛ ni ma ni. Piimu nʼa da ba bye jo pu ganha bu daha ma fɛni-i ge, pee ganha bu shɛ ni ma ni wɛ.» 5 Lee nibyii na, a Zhedeyɔn di digi kari ni pu ni lɔhɔ ki ɲɔ ki na. A Tɛhɛnɛ Baa Kilɛ di wu pye: «Sipyii piimu bɛɛri pʼa da ba shɛ lɔhɔ ki laala ni pu ɲilee ni ba puun ɲɛ-ɛ ge, mʼa pee yaha pu yɛ. Piimu na ba nuguro sin na lɔhɔ ki gba ge, mʼa pee bɛ yaha puyɛ.» 6 Sipyii piimu pʼa lɔhɔ ki ko ni pu keye ni, na ki laala ni pu ɲilee ni ge, pee bye sipyii xhuu taanri (300). Ga a sipyii pusamaa di nuguro sin na gba. 7 Wee tuun wu ni a Tɛhɛnɛ Baa Kilɛ di yi jo Zhedeyɔn mu na: «Namaa xhuu taanri (300) we wa lɔhɔ ki ko ni pu keye yi ni na laala ge, pee fanha ni nʼa da ba yi ɲuŋɔ wolo. Pee fanha ni nʼa da ba Majan le yi keŋɛ ni. Sipyii pusamaa pu kuri pʼa se pu piyɛyɛ ni.» 8 A sipyii xhuu taanri (300) wu piipu sipyii pusamaa wo yaliye ye ni pu maya yi shɔ. Lee kadugo na, a Zhedeyɔn di pu yaha kari pu piyɛyɛ yi ni, na gori ni namaa xhuu taanri (300) wu ni. Lee bi Majan wo kashɛn keŋɛ ki ta Zhedeyɔn wogo ki tigitigimɛ pu ni fadaan li na.9 Kee piige ki ni a Tɛhɛnɛ Baa Kilɛ di ba Zhedeyɔn pye: «Yìri mʼa digi shɛ Majan wo kashɛn keŋɛ ki fɛni, bani nɛ ki le ma keŋɛ ni. 10 Ma bu da ma na fyagi, tigi shɛ ni ma kapyebye Pura ni pu kashɛn keŋɛ ki tasinŋɛ ki ni. 11 Yemu pʼa da zhɛ jo ge, mʼa yee logo, lee bu bye, lee na ma luu waha, mʼa shɛ do kashɛn keŋɛ ki na.» A Zhedeyɔn di digi kari ni Pura ni, wu kapyebye we. A pʼi shɛ yere fo kashɛn keŋɛ ki fɛɛ ni. 12 Majan shɛɛn pee, ni Amalɛki shi we, ni Kilɛ-nɔhɔ shɛɛn pu bɛɛri bi pii fadaaŋa ki na ba kabeeŋɛ niɲɛhɛŋɛ ɲɛ wɛ. Pu ɲɔhɔyɔ yi bi sii ɲɛhɛ ɲɔ baa, ba suumɔ lɔhɔ ɲɔ gbazhɛnhɛ ɲɛ wɛ. 13 Zhedeyɔn ya nɔ tuun wemu ni ge, lee bi ná wa ta wu na ŋmunɔgɔ ka paari wu kaafɔɔ mu na: «Ŋmunɔgɔ ka nɛ ŋmunɔ: Ɔrijɛ nivogɔ wo buuri ɲuŋɔ ka bi golo-golo na ma Majan wo kashɛn keŋɛ ki mu. A kʼi golo-golo shɛ nɔ fo fàya puga ki na, na ki kuu. A fàya puga kʼi do. A kʼi fàya puga ki shan, na ki ɲɛri buri.» 14 A wu kaafɔɔ wu jo: «Le wa latii na ye Zhowazi ja Zhedeyɔn wo ŋmɔpara li na wɛ, Izirayɛli wo ná we. Kilɛ ya Majan ni kashɛn keŋɛ ki bɛɛri le wu keŋɛ ni!» 15 Ba Zhedeyɔn ya kee ŋmunɔgɔ ki logo, na ki kɔ́ri wu bɛ logo wɛ, a wu nuguro sin, na Kilɛ pɛlɛ. Lee kadugo na, a wu guri pa Izirayɛli nagoo pu wo kashɛn keŋɛ ki na, na ba jo: «Yi yìri! Tɛhɛnɛ Baa Kilɛ ya Majan wo kashɛn keŋɛ ki le yi keŋɛ ni!»
Majan shɛɛn pʼa paa caaga
16 A Zhedeyɔn di namaa xhuu taanri (300) wu taa kuruyo taanri, na maya niwiye kan pu bɛɛri mu, ni puuro shɔhɔɔ ki niwagaa, a pʼi namuuyo le kee funŋɔ ni. 17 Lee kadugo na, a wu yi jo pu mu na: «Yʼa na wii, di ba lemu bɛɛri pye, yi bɛ di lee pye. Nɛ ba shɛ nɔ kashɛn keŋɛ ki ɲɔ ki na tuun wemu ni na lemu bɛɛri pye, yi bɛ di lee pye. 18 Di ba maga ki wi tuun wemu ni, piimu pu wa ni na ni ge, pu bɛ di pu wo maya yi wi. Wa bɛɛri wu ɲɛ kashɛn keŋɛ ki kabaŋa ka bɛɛri na ge, wu bɛ di wu wo maga ki wi wu xhuulo xuuni na: ‹Tɛhɛnɛ Baa Kilɛ wuu na! Zhedeyɔn wuu na!› »
19 Ayiwa, a Zhedeyɔn ni wu wo namaa xhuu nigin (100) wu nɔ kashɛn keŋɛ ki tàan ɲiɲiŋɛ ki na. Majan wo kashɛnŋmuu piimu pu bye kasɛɛgɛ ki na ge, lee bi pu ta pʼa pii taga pee faa. Taapile ni a Zhedeyɔn ni wu wo sipyii pʼi pu wo maya yi wi, shɔhɔɔ kiimu ki bye pu keye ni ge, na kee ja ja. 20 A yee kashɛn keye taanri wu sipyii pu bɛɛri di wakaraa pu wo maya yi wi, na pu wo shɔhɔɔ ki bɛ ja ja. Pu bɛɛri bi pu wo mubɔhɔɔ ki co pu kamɛnɛ keyɛ yi ni, maya yʼi ɲɛ pu kanige keye yi ni na wi. Lee kadugo na, a pʼi ganha na xhuulo, na yu: «Tɛhɛnɛ Baa Kilɛ wo ŋmɔpara le! Zhedeyɔn wo ŋmɔpara le!» 21 Na pu niyereye yaha mu na Majan nagoo pu wo kashɛn keŋɛ ki maha, a Majan nagoo pu wo kashɛn keŋɛ ki bɛɛri di sipyaa ɲɔ kɔn na waa, na ganha na fe. 22 A pee namaa xhuu taanri (300) wu bɛɛri di ganha na pu wo maya yi wi. A Tɛhɛnɛ Baa Kilɛ di Majan shɛɛn pu pye pʼa ŋmɔparaa lɔ puyɛ fɛni kashɛn keŋɛ ki bɛɛri ni. A pu bɛɛri di baa fo na shɛ nɔ Bɛti-Shita ni, Tisereda kulo li shizhaa, fo na shɛ nɔ Abɛli-Mexhola kulo li ni, Tabati kulo li tàan.
23 Izirayɛli nagoo piimusamaa pu ɲɛ Nɛfitali wuu pee, ni Azɛri wuu pee, ni Manase wuu pu ge, a pee bɛɛri di puyɛ pinnɛ na Majan shɛɛn pu nɔhɔ niinɛ. 24 A Zhedeyɔn di tuduro yaha pʼa shɛ jo Efirayimu faaboboyo koomɔ pu bɛɛri ni na: «Yi tigi yʼi shɛ Majan shɛɛn pu koo pari, yʼi shɛ Zhurudɛn Gba wu takɔnɲɛrɛyɛ yi shɔ pu na, yi shɛ nɔ fo Bɛti-Bara ni.» A Efirayimu shi shɛɛn pu bɛɛri di foro, na shɛ Zhurudɛn Gba wu takɔnɲɛrɛyɛ yi co, fo na shɛ nɔ Bɛti-Bara ni. 25 A pʼi Majan wo ɲuŋɔfɛɛ shuun wo co, Orɛbu ni Zebu. A pʼi Orɛbu gbo Orɛbu wo faaboboŋɔ ki na, na Zebu gbo Zebu wo ɛrɛzɛn lɔhɔ tawologo ki ni. A pʼi Majan shɛɛn pu nɔhɔ niinɛ, na shɛ Orɛbu ni Zebu wo ɲuŋmogoo ki kan Zhedeyɔn mu Zhurudɛn Gba wu kogii wu na.