Debora wo yoceege ke
5
A Debora di yogo ka cee kee caŋa ke, wu ni Abinɔmu ja Baraki ni. A pʼi ki cee na:2 «Yʼa Tɛhɛnɛ Baa Kilɛ sɔni!
Izirayɛli nagoo pu wo kashɛnŋmuu pʼa gbegele kashɛn ki kaa na.
Sipyiire tʼa tiyɛ kan kashɛn ki mu.
3 Saannaa pee, yi logo! Ɲuŋɔfɛɛ pee, yi ɲuwegee shan!
Nʼa da yogo cee Tɛhɛnɛ Baa Kilɛ mu!
Oo dɛ, nʼa da yogo cee Tɛhɛnɛ Baa Kilɛ, Izirayɛli wo Kilɛ wu mu.
4 Tɛhɛnɛ Baa Kilɛ, tuun wemu ni mu ya foro Seyiri ni ge,
Tuun wemu ni mu ya foro Edomu ni ge, a ɲiŋɛ kʼi jɛlɛ,
a fugba wu sɛri lɔhɔ na, a ɲahaya yʼi sɛri lɔhɔ na.
5 A faaboboyo yʼi jɛlɛ Tɛhɛnɛ Baa Kilɛ ɲaha tàan
Sinayi wo Kafɔɔ we, Tɛhɛnɛ Baa Kilɛ, Izirayɛli wo Kilɛ we.a
6 Anati ja Shamugari wo caŋa ɲii li ni, Yayɛli wo caŋa ɲii li ni,
sipya wa shishiin bi doroo kogboroyo yi ni wɛ.
A ɲaaɲaalaa pʼi ganha na doroo konahaya yi ni.
7 Ɲuŋɔfɛɛ bye nige Izirayɛli ni wɛ, ɲuŋɔfɛɛ bye nige wɛ,
fo na shɛ nɛ Debora pye nɛ pa, na ba bye Izirayɛli nu.
8 Pɛɛŋɛ yaaya nivoyo ya pu bi bɛlɛ, lee na do,
a kashɛn di ba nɔ taapile ni kulo li kuɲɔgɔɔ ki ɲɔ na.
Ga ma bu Izirayɛli kashɛnŋmuu kabɔfoŋɔɔ kɛlɛɛ shishɛɛrɛ (40.000) lɔ,
ma da ŋmasigiŋɛ nigin, kelee canmi nigin bɛ ta pu mu wɛ.
9 Izirayɛli wo ɲuŋɔfɛɛ pee, nɛ zɔ wu wa ni yee ni,
yee piimu pʼa yiyɛ kan kashɛn ki na ge,
Yʼa Tɛhɛnɛ Baa Kilɛ sɔni!
10 Yee piimu pʼa duri kafazhaa nivyɛnmɛɛ na ge,
yee piimu pʼa tiin tiin fàya nizaaya na ge,
yee piimu pʼa ɲaari korogoo ki ni ge, yi yi funyɔ kɔn li na!
11 Lokaan pu Kilɛ masɔyɔ yi wʼa duri, lɔhɔ tamaraya yi tɛ wu ni.
Pee wa na Tɛhɛnɛ Baa Kilɛ sɔni wu kasaaŋaa ki wuu na,
kasaaŋaa kiimu wʼa pye Izirayɛli wo ɲuŋɔfɛɛ pu mu ge.
Wee tuun wu ni, a Tɛhɛnɛ Baa Kilɛ wo sipyiire tʼi digi kari
kulogoo ki tajeye yi ɲɔ na.
12 Yìri ŋmunumɔ pu na Debora! Yìri ŋmunumɔ pu na!
Yìri ŋmunumɔ pu na, yìri ŋmunumɔ pu na, mʼa yogo ka le!
Yiri Baraki! Abinɔmu ja we, ta se ni ma kashɛn buloo pu ni!
13 Shɛɛn nigin nigin wemu wʼa kori ɲìi na ge,
pee ya tigi kari fanhafɛɛ pu fɛni,
Tɛhɛnɛ Baa Kilɛ wo sipyii pʼa tigi kari naŋmaya yi fɛni,
na shɛ se ta pu na na kan nɛ mu.
14 Piimu pʼa se ta Amalɛki shi wu na ge,
Efirayimu ni pʼa yìri.
Bɛnzhamɛ bɛ ya taha pu fɛni.
Wu bɛ wu wa ni pu ni.
Makiri wo kpuun lʼa ɲuŋɔfɛɛ kan.
A Zabulɔn wo gbawege kʼi kashɛn ɲuŋɔfɛɛ kan.
15 Isakari wo ɲuŋɔfɛɛ pʼa pa fara Debora na.
Isakari wo sipyii pʼa pye ɲɔmɛhɛɛ fɛɛ Baraki mu.
Pʼa gburogi foro, na gari ni wu ni mura wu ni.
Ga Urubɛn wo kpuun li na,
pʼa nakaara pye fo na mɔ.
16 Ɲaha na yee dʼa kori yaha kashɔyɔ yi tɛ wu ni,
na yapɔrɔnahamaa pu wo sibeŋɛɛ ki nuri yapɔrɔyɔ yi tàan wɛ?
Can na dɛ, Urubɛn wo kpuun li na,
pʼa nakaara pye fo na mɔ.
17 Galadi ya kori yaha wà Zhurudɛn Gba wu Kilɛ-nɔhɔ ki na.
Dan ya kori yaha wu lɔhɔ kɔrɔyɔ yi tàan.
Azɛri bɛ ya kori yaha suumɔ lɔhɔ ki ɲɔ na,
wu kɔrɔyɔ yi tayereye yi tàan.
18 Zabulɔn ni Nɛfitali ya pye shi wemu wʼa xu ɲuŋɔ círi ge,
Pʼa kari fo kashɛn sige ki fugba tɛgɛ ki ni.
19 Saannaa pʼa pa na ba kashɛn ki ŋmɔ.
Kana wo saannaa pʼa kashɛn ŋmɔ Taanaki, ni Megido wo lɔhɔyɔ yi ɲɔ ki na.
Ga pu ya yaaga bɛ ta na kari wɛ, pu ya wari bɛ ta wɛ.
20 Wɔrɔɔ kʼa tiin fugba wu ni, na kashɛn ki ŋmɔ,
Na ki yaha ki na se ki wo kozhɛɛ li ni, kʼa kashɛn kɔn Sisera na.
21 Kishɔn dugo kʼa pu fɔ̀ lɔ.
Kee dugo kemu kʼa fúu fo tɛɛlɛɛ li ni ge,
Kishɔn dugo ke.
Wù la le! Wù kafugo le wùyɛ ni kashɛn ki fɛni!
22 Ee, pu shɔnyɔ yi wa tafɛrɛ ɲɔ laha,
yi fereye yi wa na daraa ɲiŋɛ ki na.
23 Yi Merozi laŋi, Tɛhɛnɛ Baa Kilɛ wo tudunmɔ wʼa jo mu.
Yi wu sipyii pu laŋi!
Bani pu ya ta pa Tɛhɛnɛ Baa Kilɛ tɛgɛ wɛ,
pu ya ta pa kashɛn ki ŋmɔ ni wu kashɛn naŋmaya yi ni wɛ.
24 Kilɛ wu baraga le Yayɛli ni cèe pusamaa tɛ ni,
Keni shi shɛɛn Ebɛri wo shɔ we!
Oo dɛ, cèe piimu pu ɲɛ fàya puga ni ge,
Kilɛ wu baraga le wu ni wu toro pee bɛɛri tàan!
25 Sisera ya lɔhɔ ɲɛɛri Yayɛli mu,
a Yayɛli di nujirimɛ kan wu mu, nulɛɛ ɲɛ pemu ni ge,
na pu le yaaga ka ni, kemu kʼa sii ɲɔ ge.
26 Lee kadugo na, a wu sikana la lɔ co ke keŋɛ ke ni,
na kapyebyii pu wo madari wu co wu kanige ki ni.
Na Sisera kpɔn, na wu ɲuŋɔ ja.
Wʼa wu ɲibɛgɛ ki su furi, na ki wá shuuri.
27 A Sisera di gurulo Yayɛli tɔɔyɔ yi ni. A wu do, na sinnɛ wà.
A wu gurulo wu tɔɔyɔ yi ni, na do.
Xuu wemu ni wʼa kurulo ge, wà wʼa to, na xhu.
28 Sisera nu wu wa na wii fenɛtiri wu laraya yi ni, na yu:
‹Ɲaha na wu kashɛn wotori wu dʼa mɔ niɲaa wɛ?
Ɲaha na pu kashɛn wotoriyo yi tɔrɔ dʼa ɲiŋɛ le ɲiŋɛgana le na wɛ?›
29 Wu pushaɲiinɛɛ fungɔnyɔ fɛɛ pʼa wu ɲɔ shɔ ni yemu ni ge,
a wu ganha na yee yu na dɛrɛɛ yee na na:
30 ‹Ma na zhɛ li ta kashɛn naafuu niɲɛhɛmɛ pʼa ta,
wee pu wa daani daani puyɛ na.
Kashɛnŋmɔ wa bɛɛri poro pushɔ nigin, poro pushaa shuun.
Sisera wo taa na bye fazaaya yemu wo lɔhɔyɔ tuuyo yʼa ɲɛhɛ ge,
fazaaya yemu lɔhɔyɔ tuuyo yʼa ɲɛhɛ, yi dʼa su bɛ ge.
Fazaaŋa kemu wo lɔhɔyɔ tuuyo yʼa ɲɛhɛ ge,
fasuyo shuun, yee na le se tavɔɔ wu wo katige ki ni.›
31 Tɛhɛnɛ Baa Kilɛ, ma pɛɛn pu bɛɛri pu xu ba Sisera ya xu wɛ!
Mʼa taan piimu bɛɛri mu ge, pee di bye ba caŋa ke ɲɛ wɛ,
ki ba fòro tuun wemu ni ni ki kafugo ki ni!»
A fiige ki ɲaha di ɲiŋɛ fo na shɛ da yee kɛlɛɛ shishɛɛrɛ (40).