Debora ni Baraki wo tɛrɛ le
4
Ayiwa, ba Exhudi ya xu wɛ, a Izirayɛli nagoo pʼi kaa pye sanha lemu ya kolo Tɛhɛnɛ Baa Kilɛ mu ge. 2 Wee tuun wu ni, a Tɛhɛnɛ Baa Kilɛ di pu le saannaa Yabɛn keŋɛ ni, Kana fiige ki wo saan wa. Wu saanra kulo li bye Asɔri. Wu kashɛn keŋɛ ki ɲuŋɔfɔɔ wu mɛgɛ ki bye na Sisera, wee bye Arashɛti-Goyimu kulo li ni. 3 Kashɛn wotoriyo tɔɔrɔ woyo xhuu gbarashɛɛrɛ (900) wu bye Yabɛn mu. A wu wu fanha ki digi Izirayɛli nagoo pu na fo na shɛ da yee kɛlɛɛ shuun (20). Wee tuun wu ni a pʼi sipyaa wá Tɛhɛnɛ Baa Kilɛ mu.4 Lee caŋa ɲii li ni, Kilɛ tudunmɔɔ Debora, Lapidoti wo shɔ we, wee wu bi bye Izirayɛli ɲuŋɔ ni. 5 Wu bi se na dɛn Debora wo tamalia tige ki nɔhɔ ni, Arama ni Bɛtɛli tɛ wu ni, Efirayimu wo faaboboyo yi wo koomɔ pu ni. Wee xuu wu ni Izirayɛli nagoo pu bi se na wu taa, wʼi pu keree ki shɔɔnri. 6 A wu Abinɔmu ja Baraki yiri na foro Kedɛshi-Nɛfitali ni, na ba wu pye: «Te tuduro te Tɛhɛnɛ Baa Kilɛ, Izirayɛli wo Kilɛ wʼa jo ma mu na: ‹Yìri, mʼa shɛ namaa kabɔfoŋɔɔ kɛ (10.000) lɔ Nɛfitali ni Zabulɔn wo tirige shɛɛn pu ni, mʼa ba ni pu ni Tabɔri faaboboŋɔ ki na. 7 Nʼa da Yabɛn wo kashɛn keŋɛ ki ɲuŋɔfɔɔ Sisera kile di ba ma mu, Kishɔn dugo ki ɲɔ ki na. Wu na ba ni wu kashɛn wotoriyo ye, ni wu kashɛn keye yi ni. Nʼa da pu le ma keŋɛ ni.› » 8 A Baraki di Debora pye: «Ma bu da ma na da binnɛ ni na ni, nɛ na zhɛ, ga ma bu da ma da binnɛ ni na ni wɛ, nʼa da zhɛ wɛ.» 9 A Debora di jo: «Nɛ na binnɛ ni ma ni, ga mʼa li cɛ na ma da ba mɛgɛ ta ke kashɛn ke ni-i dɛ, bani cee keŋɛ ni Tɛhɛnɛ Baa Kilɛ wʼa da ba Sisera le.» Lee kadugo na, a Debora di binnɛ ni Baraki ni na kari Kedɛshi ni. 10 A Baraki di Nɛfitali ni Zabulɔn wo tirige shɛɛn pu yiri pinnɛ Kedɛshi ni, a namaa kabɔfoŋɔɔ kɛ (10.000) di sɔɔ na daha wu fɛni na kari. A Debora bɛ di gari ni pu ni.
11 Wee tuun wu bi Keni shi shɛn Ebɛri ta wee ya waa laha Keni wo tirige shɛɛn pusamaa na, na foro Obabu wo shi wu ni, Musa yafɛna we. A wu shɛ wu wo fàya puga ki sin Kedɛshi tàan Saanayimu wo shɛni tige ki tàan. 12 A Sisera di yi logo na Abinɔmu ja Baraki, ya dugi Tabɔri faaboboŋɔ ki na. 13 A Sisera di wu tɔɔrɔ kashɛn wotoriyo xhuu gbarashɛɛrɛ (900) wu yirige, na fara wu kashɛn keye yi bɛɛri na. A pʼi yìri Arashɛti-Goyimu ni, na gaaŋi Kishɔn dugo ki ni. 14 Wee tuun wu ni a Debora di Baraki pye: «Yìri, bani niɲaa Tɛhɛnɛ Baa Kilɛ ya Sisera le ma keŋɛ ni. Tɛhɛnɛ Baa Kilɛ yɛpyaa kʼa toro ma ɲaha na, na kashɛn ki ŋmɔ ma mu!» A Baraki di digi Tabɔri faaboboŋɔ ki na ni wu namaa kabɔfoŋɔɔ kɛ (10.000) wu ni. 15 A Tɛhɛnɛ Baa Kilɛ di Sisera ni wu tɔɔrɔ kashɛn wotoriyo yi bɛɛri, ni wu kashɛn keye yi bɛɛri pye yʼa fya fo xuuni, a ŋmɔpara di pu bɛɛri gbo Baraki ɲaha tàan. A Sisera di digi wu kashɛn wotori wu na, na baa tɔɔyɔ na. 16 A Baraki di Sisera wo kashɛn wotoriyo ye, ni wu kashɛn keye yi nɔhɔ niinɛ fo na shɛ nɔ Arashɛti-Goyimu ni. A pʼi ŋmɔpara taga Sisera wo kashɛn keye yi bɛɛri ɲuŋɔ tugo. Shɛn nigin bɛ ya shɔ to wɛ.
17 A Sisera di baa kari tɔɔyɔ na fo na shɛ nɔ Keni shi shɛn Ebɛri shɔ Yayɛli wo fàya puga ki na, bani bɛ wu bye Asɔri saan Yabɛn ni Keni shi shɛn Ebɛri wo puga ki tɛ ni. 18 A Yayɛli di foro na shɛ Sisera ɲuŋɔ círi, na wu pye: «Jé na kafɔɔ, jé na wo puga ki ni, ma ganha bu fya wɛ.» A Sisera di jé Yayɛli wo puga ki ni, a Yayɛli di fatɔŋɔ ka taga wu tɔ. 19 A Sisera di wu pye: «Na ma ɲɛɛri, lɔhɔ nifɛnhɛnɛ kan na mu di gba! Waga ki wa na na.» A Yayɛli di nujirimɛ kashaga ki ɲɔ mugi, na nujirimɛ pa kan wu mu wʼa gba, na xhɔ na fatɔŋɔ ki tɔ wu na. 20 A Sisera di Yayɛli pye sanha na: «Yere fàya puga ki tajege ku ɲɔ ki na, wa ba nɔ na ma yege na: ‹Ta wa ɲɛ naha?› Mʼa wufɔɔ ɲɔ shɔ na: ‹Ahayi!› » 21 A Sisera di ŋmunɔ tara, bani wu bi sii kanha. A Ebɛri shɔ Yayɛli di fàya puga ki wo sikana la lɔ, na madari lɔ, na beele fulo Sisera na, na sikana li kori wu ɲibɛgɛ ke ni, a lʼi doro ɲɛri na shɛ juri ɲiŋɛ ke ni. A Sisera di xhu. 22 Ayiwa, ba Baraki ya Sisera nɔhɔ niinɛ na nɔ wà wɛ, a Yayɛli di foro, na wu ɲuŋɔ círi, na wu pye: «Sipya wemu mʼa zhaa ge, pa di ba wu shɛ ma na.» Ba Baraki ya jé Yayɛli puga ki ni wɛ, na shɛ Sisera ta wʼa xu, sikana na ɲɛ wu ɲibɛgɛ ke ni.
23 A Kilɛ di Yabɛn tirige kee caŋa ke Izirayɛli nagoo pu mu, Kana shɛɛn pu wo saan we. 24 A Izirayɛli nagoo pʼi sii kafugo pɛlɛ Yabɛn na, Kana shɛɛn pu wo saan we, fo na shɛ se ta wu na, na wu gbo.