Kiiri Kɔnvɛɛ 3

Ayiwa, Izirayɛli nagoo piimu pu ɲɛ pu ya Kana fiige ki co co wo kashɛn ki ŋmɔ-ɛ ge, Tɛhɛnɛ Baa Kilɛ ya fiiye yatii shɛɛn pii yaha pee tɛ ni, kɔnhɔ pee di da pu leni nɔwuuro ni. 2 Izirayɛli nagoo piimu pu ɲɛ pu ya kashɛn pye ɲa-ɛ ge, wu funŋɔ ki bye bee bɛ di kashɛn cɛ. 3 Fiiye yatii shɛɛn piimu Tɛhɛnɛ Baa Kilɛ ya yaha ge, pee pu wa mɛ: Filisiti shɛɛn pu wo ɲuŋɔfɛɛ kaguro, ni Kana shɛɛn pu bɛɛri, ni Sidɔn shɛɛn pee, ni Xhɛvi shɛɛn piimu pʼa tiin Liban wo faaboboŋɔ ki na ge, na ɲɔ co Baali-Xherimɔ na, fo na shɛ nɔ Lebo-Amati na. 4 A Tɛhɛnɛ Baa Kilɛ di pee yaha wà fiige ki ni, kɔnhɔ pu da Izirayɛli nagoo pu leni nɔwuuro ni, pu bu da pu na da da wu ɲɔmɛjogoo ki koo ɲaari, kee kiimu wʼa bi kan pu sefɛlɛɛ pu mu Musa keŋɛ fɛni ge. 5 Lee funŋɔ ni a Izirayɛli nagoo pʼi diin mu Kana shɛɛn pee, ni Xhɛti shɛɛn pee, ni Amɔri shi shɛɛn pee, ni Ferɛzi shɛɛn pee, ni Xhɛvi shi shɛɛn pee, ni Zhebusi shɛɛn pu tɛ ni. 6 A Izirayɛli nagoo pʼi ganha na we shi we wo pushaa pu luu na byi pu cèe, na puyɛ pyaa ki wo pushaa kaan pu mu gbaya ni, na ganha na kapyeŋɛɛ pyi pu wo kilɛlɛɛ pu mu.

KIIRI KƆNVƐƐ PEE

Ɔtiniyɛli ya pye ɲuŋɔfɔɔ

7 Ayiwa, a Izirayɛli nagoo pʼi kaa pye lemu lʼa kolo Tɛhɛnɛ Baa Kilɛ mu ge. A pʼi funŋɔ wɔ Tɛhɛnɛ Baa Kilɛ, pu Kilɛ wu na, na ganha na yapɛrɛɛ Baali ni Ashera pɛlɛ. 8 A Tɛhɛnɛ Baa Kilɛ luu di yìri pu tàan, a wu pu ɲɔ yaha Mezopotami fiige ki wo saan wu mu, wee wemu wu ɲɛ Kushan-Irishatayimu ge. A pʼi yee gbarataanri pye wee wo fanha ki nɔhɔ ni. 9 Lee kadugo na, a Izirayɛli nagoo pʼi sipyaa wá Tɛhɛnɛ Baa Kilɛ mu, a Tɛhɛnɛ Baa Kilɛ di Ɲuŋɔ Wolovɔɔ yaha pa pu mu, a wee di ba pu ɲuŋɔ wolo. Wee mɛgɛ ki bye na Ɔtiniyɛli. Kalɛbu cuun Kenazi wo ja wu bye wii. 10 A Tɛhɛnɛ Baa Kilɛ di wu Munaa li tirige Ɔtiniyɛli na, a wu bye Izirayɛli shɛɛn pu ɲuŋɔfɔɔ. A wu gari kashɛn ki na, a Tɛhɛnɛ Baa Kilɛ di Kushan-Irishatayimu le wu keŋɛ, Mezopotami wo saan we. A wu wu fanha ki digi saan wu na. 11 A fiige ki ɲaha di ɲiŋɛ fo na shɛ da yee kɛlɛɛ shishɛɛrɛ (40). Lee kadugo na, a Kenazi ja Ɔtiniyɛli di ba xhu.

Exhudi ya pye ɲuŋɔfɔɔ

12 Ayiwa, a Izirayɛli nagoo pʼi ba kaa pye sanha lemu ya kolo Tɛhɛnɛ Baa Kilɛ mu ge. Lee na, a Tɛhɛnɛ Baa Kilɛ di fanha le Mowabu fiige ki saan Egilɔn ni, na toro Izirayɛli tàan, bani Izirayɛli bi kaa pye lemu lʼa kolo wu mu ge. 13 A Egilɔn di Amɔ shɛɛn pee ni Amalɛki shi shɛɛn pu sha na fara wu yɛ na. A pʼi shɛ do Izirayɛli nagoo pu na, na se ta pu na. A pʼi Zheriko kulo li co, tamali tiye yi wo kulo le. 14 A Izirayɛli nagoo pʼi yee kɛ ni gbarataanri pye saannaa Egilɔn wo fanha ki nɔhɔ ni.

15 Lee kadugo na, a Izirayɛli nagoo pʼi sipyaa wá Tɛhɛnɛ Baa Kilɛ mu, a Tɛhɛnɛ Baa Kilɛ di ɲuŋɔ wolovɔɔ yaha pa pu mu. Wee mɛgɛ ki bye na Exhudi, Gera ja wu bye wii, na foro Bɛnzhamɛ wo tirige shɛɛn pu ni. Kamuu wu bye wii. A Izirayɛli nagoo pʼi pu munahaa pɛrɛmɛ pu pinnɛ kan Exhudi mu, na wu shɛ pu kan Egilɔn mu, Mowabu wo saan we. 16 A Exhudi di ɲɔyɔ shuun ŋmɔpara la kɔn, lemu tɔɔngɔ kʼa bɛ ni keŋɛ ɲii nigin ni ge, na lee pɔ wuyɛ na, wu fàya yi nɔhɔ ni, kanige cɛ wu ni. 17 A wu shɛ munahaa pɛrɛmɛ pu kan Mowabu saan Egilɔn mu. Egilɔn bi sii pɛlɛ fo xuuni. 18 Ba wʼa munahaa pɛrɛmɛ pu kan na xɔ tuun wemu ni wɛ, sipyii piimu pʼa pa ni wu ni ge, a wu foro na gaaŋi ni pee ni. 19 Faaya yapɛrɛɛ kiimu ki wa Giligali tàan ge, ba Exhudi ya shɛ nɔ kee tàan wɛ, na guri pa, na ba saan wu pye na: «Saan we, ŋmɔhɔrɔ jomɔ pa pu wa nɛ mu na yu ma mu.» A saan wu tàan sipyii pu bɛɛri pye na pu foro, a pu bɛɛri di foro. 20 Lee bi saan wu nidɛɛngɛ ta puga ka ni kafɛɛwama ɲɛ kemu ni ge, kee bi yaha wu mɛgɛ na zangaso wu fugba wu ni. A Exhudi di fulo wu na, na wu pye: «Kilɛ wo jomɔ pa pu wa nɛ mu na yu ma mu.» A saan wu yìri wu koro li ni. 21 Wee tuun wu ni a Exhudi di wu kamɛnɛ keŋɛ ki yeege, na ŋmɔpara li kɔɔngi wu kanige cɛ wu ni, na li curi saan wu yacɛrɛ li ni. 22 A ŋmɔpara li katinnɛ li bɛ di jé yacɛrɛ li ni. A sìnmɛ pʼi yɔri tɔ ŋmɔpara li na, bani Exhudi bi ta ŋmɔpara li wolo saan wu yacɛrɛ li ni wɛ, a lʼi shɛ foro kadugo yiri wu ni. 23 Lee kadugo na, a Exhudi di gburaya yi tɔ, na yi shɔ̀hɔ, na foro kpaan li wo taforogo ki ni. 24 Ba wʼa pa foro wɛ, a saan wu sipyii pʼi ba, na ba gburaya yi ta yʼa shɔ̀hɔ shɔ̀hɔ. A pʼi jo: «Ma na zhɛ saan wu ta wʼa nugunŋɔ kuri kafɛɛwama puga ki ni.» 25 A pʼi wu sige, fo na ba wu sige kanha. Pʼa wu ɲaha wii na ganha wu da ga ba gburaya yi mugi-i ge, a pʼi ba kenikaangaa ki lɔ, na gburaya yi mugi, na pu kafɔɔ wu nidogo ta ɲiŋɛ ki na, wu dʼa xu. 26 Na pu yaha pʼa tiin na yeree, a Exhudi di baa gbee. A wu shɛ doro faaya yi wo yapɛrɛɛ ki tàan, na shɔ pu na, na gari Seyira yíri. 27 Ba wʼa nɔ wà wɛ, na maga wi Efirayimu faaboboyo yi wo koomɔ pu ni. A Izirayɛli nagoo pʼi digi na yìri faaboboŋɔ ki na, a wu doro pu ɲaha na. 28 A wu pu pye: «Yi taha na fɛni, bani Tɛhɛnɛ Baa Kilɛ ya Mowabu shɛɛn pu le yi keŋɛ ni, yi pɛɛn pee.» A Izirayɛli nagoo pʼi daha wu fɛni, na shɛ Zhurudɛn Gba wu takɔngɔ ki co, Mowabu ɲahatiimɛ pu ni, pu ya sipya bɛ yaha wʼa toro wɛ. 29 Kee caŋa ke, a pʼi Mowabu namaa kabɔfoŋɔɔ kɛ (10.000) shishiin gbo. Pee bɛɛri bye naŋmaya baraga wuu. Pu shɛn nigin bɛ ya shɔ wɛ. 30 Na co kee caŋa ki na, a Mowabu shɛɛn di guu Izirayɛli nagoo pu mu. A fiige ki ɲaha di ɲiŋɛ fo na shɛ da yee kɛlɛɛ gbarataanri (80).

31 Ayiwa, ba Exhudi ya laha wà wɛ, a Shamugari di ba ɲuŋɔfɛɛrɛ ti na, wee bye Anati wo ja. Wee bi Filisiti shɛɛn namaa xhuu gbaara (600) gbo ni niiyɛ kɔri kɔri ŋmaa ni. Wee bɛ bi Izirayɛli nagoo pu ɲuŋɔ wolo.