Tɛhɛnɛ Baa Kilɛ ya tigire shan wu sipyii pu na
2
Ayiwa, caŋa ka, Tɛhɛnɛ Baa Kilɛ wo mɛlɛkɛ wʼa yìri Giligali kulo li ni, na gari Bokimu ni, na shɛ Izirayɛli nagoo pu pye: «Nɛ wʼa yee yeege Misira fiige ki ni, na yee pye yee ya jé ke fiige ki ni, kee kemu wo ɲɔmɛɛ nɛ lɔ yee sefɛlɛɛ pu mu ni kaaga ni ge. Nɛ bi jo: ‹Nɛ da ga na kariɲɛɛgɛ ɲɔmɛɛ li kyɛɛgi ni yee ni bada wɛ. 2 Yee bɛ pi ge, yi bɛ ganha bu kariɲɛɛgɛ ɲɔmɛɛ leŋɛ ni ke fiige ke shɛɛn pu ni wɛ, yʼi pu saraya tawoloyo yi ja.› Ga yee ya ta nɛ ɲɔmɛɛ co wɛ. Ɲaha kʼa pa ni lee ni wɛ?a 3 Wee tuun wu ni, a nɛ jo: ‹Nɛ da ke fiige ke shɛɛn pu kɔri di laha wà yee mu wɛ. Pu na ba binnɛ diin ni yee ni, pu wo kilɛlɛɛ pu na bye ye wo co co tifuuyo.› » 4 Ba Tɛhɛnɛ Baa Kilɛ wo mɛlɛkɛ wʼa pee jomɔ pu jo xɔ Izirayɛli nagoo pu mu wɛ, a sipyiire ti bɛɛri di ɲɔ kɔn na sipyaa waa. 5 A pʼi wee xuu wu mɛgɛ le na Bokimu (Mɛsuu). A pʼi saraya wolo wà Tɛhɛnɛ Baa Kilɛ mu.Zhozuwe xu we
6 Ayiwa, a Zhozuwe di sipyiire ti yaha kari. A Izirayɛli nagoo pu bɛɛri di gari, pii bɛɛri, pʼa shɛ diin pu wo taa ɲiŋɛ ki na, kɔnhɔ pʼi bye fiige ki kafɛɛ. 7 A Izirayɛli nagoo pʼi labye pye Tɛhɛnɛ Baa Kilɛ mu Zhozuwe wo shi caŋa ɲii li bɛɛri ni. Zhozuwe ya xu na nɔhɔlɛɛ piimu yaha, pee bɛ dʼa Tɛhɛnɛ Baa Kilɛ wo kagbɔhɔɔ nibyegee ki ɲa Izirayɛli mu ge, a Izirayɛli nagoo pʼi labye pye Tɛhɛnɛ Baa Kilɛ mu pee bɛ wo shi wu caŋa ɲii li ni. A Izirayɛli nagoo pʼi labye pye Tɛhɛnɛ Baa Kilɛ mu Zhozuwe wo shi caŋa ɲii li bɛɛri, ni nɔhɔlɛɛ pu wo shi caŋa ɲɛhɛɛ ki bɛɛri ni Zhozuwe nixhugo na, pee piimu pʼa Tɛhɛnɛ Baa Kilɛ wo kagbɔhɔɔ nibyegee ki ɲa Izirayɛli mu ge. 8 Wee Zhozuwe wu wi ge, Nuni ja we, Kafɔɔ wo kapyebye we, wee bi xu na wu shi wu yaha yee xhuu nigin ni kɛ (110) na. 9 A pʼi wu le wu taa cɛn ɲiŋɛ ki na Timinati-Herɛsi ni, Efirayimu faaboboyo koomɔ pu ni, Gashi wo faaboboŋɔ ki suumɔ kulo kacɛ ki na.b 10 Zhozuwe wo tuun wu wo sipyii pu bɛɛri ya pa xhu xhu. A lɛɛ la di yìri pee bɛ kadugo piimu ya Tɛhɛnɛ Baa Kilɛ cɛ wɛ, lemu bɛ wʼa pye Izirayɛli nagoo pu mu ge, pʼi ya lee bɛ cɛ wɛ.
Izirayɛli nagoo pʼa kadugo le Tɛhɛnɛ Baa Kilɛ ni
11 A Izirayɛli nagoo pʼi kakuunɔ pye Tɛhɛnɛ Baa Kilɛ na, na sogolo yasunyɔ ya fɛɛ ni yemu mɛgɛ ki ɲɛ Baali ge. 12 Tɛhɛnɛ Baa Kilɛ, pu sefɛlɛɛ pu wo Kilɛ we, wee wemu wʼa bi pu yeege Misira fiige ki ni ge, pʼa wee yaha na daha pɛɛŋɛ yaŋmuyɔ yatii fɛni, pu kabanugo fiiye yi wo pɛɛŋɛ yaŋmuyɔ ye, a pʼi ganha na sogolo yee fɛɛ ni, na Tɛhɛnɛ Baa Kilɛ wo luu li yirige. 13 Mu na pʼa pye na Tɛhɛnɛ Baa Kilɛ yaha, na shɛ yasunyɔ Baali ni Ashera pɛlɛ. 14 Lee wuu na Tɛhɛnɛ Baa Kilɛ luu ya yìri Izirayɛli nagoo pu tàan. A wu pu le pu tuuro fɛɛ keŋɛ ni, a pee di pu yaŋmuyɔ yi bɛɛri kuu. A wu pu ɲɔ yaha pu pɛɛn pu mu pee piimu pu ɲɛ pu kabanugo fiiye yi ge. Tayerege ya ta pu na pu pɛɛn pu ɲaha tàan bada wɛ. 15 Tɛhɛnɛ Baa Kilɛ wo keŋɛ ki bi bɔɔngɔ nɔni pu na, tuun bɛɛri ni pʼa foro kari kashɛn na ge, na nɛri shaan pu ɲuŋɔ ni ma na jo ba Tɛhɛnɛ Baa Kilɛ bi yi jo pu mu na gàa wɛ. A pʼi sii kanha xuuni. 16 Wee tuun wu ni a Tɛhɛnɛ Baa Kilɛ di ganha na kiiri kɔnvɛɛ kaan pu mu, a pee di ganha na pu wo pu yaŋmuyɔ yi kuuvɛɛ pu keŋɛ ni. 17 Ga Izirayɛli nagoo pu bi ta na pu kiirikɔɔn pu bɛ jo nuri wɛ. A pʼi ganha na kilɛlɛɛ piitiilee pɛlɛ, na nuguro sinni pee fɛɛ ni. Pu tii pʼa bi Tɛhɛnɛ Baa Kilɛ wo ɲɔmɛjogoo ki koo ɲaari, na se kodoronɔ lemu ni ge, a pʼi kadugo le lee ni tɔvuyo na. Pu ya ta shɛ pu tii pu wo koo li ni wɛ. 18 Tuun wemu bɛɛri ni Tɛhɛnɛ Baa Kilɛ bi kiiri kɔnvɛɛ pu teŋɛɛ pu mu ge, wu bye ni pee kiiri kɔnvɛɛ pu ni. Wa bɛɛri bu diin fanha ki na, wʼa ganha na pu shuu pu pɛɛn pu na wee wo shi caŋa ɲii li bɛɛri ni. Tɛhɛnɛ Baa Kilɛ bu Izirayɛli nagoo pu kanhama wuu, cɔnrɔmɔ wuu ɲa pu pɛɛn pu keŋɛ ni tuun bɛɛri ni, wʼa ɲuŋɔ ɲaari pu na. 19 Lee kadugo na ba wee kiiri kɔnvɔɔ wʼa xu wɛ, Izirayɛli nagoo pu na guri puyɛ nɔrɔgɔ sanha fo na ye pu sefɛlɛɛ pu na, na daha pɛɛŋɛ yaŋmuyɔ yatii fɛni, na ganha na labye pyi yee mu na yi pɛlɛ. Pu funŋɔ bye pʼi pu kakuuyo kelee pu pu niwewaa li ɲɔ yaha wɛ.
Tɛhɛnɛ Baa Kilɛ ya Izirayɛli nɔhɔ wolo wii
20 Ayiwa, a Tɛhɛnɛ Baa Kilɛ luu di yìri Izirayɛli nagoo pu tàan, a wu jo: «Kariɲɛɛgɛ ɲɔmɛɛ lemu nɛ lɔ ni we shi we wo sefɛlɛɛ pu ni ge, we shi we ya lee kyɛɛgi, pu ya ta nɛ ɲɔmɛɛ co wɛ. 21 Lee wuu na do, Zhozuwe ya xu na fiiye yatii shɛɛn piimu yaha pu fiige ki ni ge, nɛ da ga wee wa shishiin bɛ kɔri laha nige pu ɲahagbaa na wɛ. 22 Nɛ na ba wee shi we taga na pu nɔhɔ wo, kɔnhɔ di li cɛ Izirayɛli nagoo pu bu da pu na da gbara pʼi na ɲɔmɛɛ co, ba pu sefɛlɛɛ pʼa li pye wɛ, kelee pu shiin bu da pu da gbara lee na-ɛ laa.» 23 Lee funŋɔ ni a Tɛhɛnɛ Baa Kilɛ di wee shi we yaha ɲaɲiŋɛ na, wu ya pu kɔri tɔvuyo na wɛ. Wu bi ta pee le Zhozuwe keŋɛ ni wɛ.