Yusufu ya wu cebooloo pu nɔhɔ wolo sanha
44
Ayiwa a Yusufu di wu puga ki ɲuŋɔfɔɔ wu pye: «Shinma wu taga pii namaa pii wo bɔrilɔɔ pu ɲi xuuni. Wemu bɛɛri na pʼa da já ge, wee kan pu mu, mʼa wa bɛɛri wo wari wu kuruŋɔ le wu wo bɔri wu funŋɔ ni koɲɔ ki na. 2 Nɛ wo cɛɛgbuu le, warifyɛn cɛɛgbuu le, mʼa lee le pu bɛɛri kurogo wo wu wo bɔri wu funŋɔ ni ma fara wu wo wari wu na.» A puga ki ɲuŋɔfɔɔ wu li pye ba Yusufu ya yi jo wɛ.3 Ɲimuguro ti ɲisɔɔgɔ ki na, a pʼi pu yaha kari ni pu kafaya yi ni. 4 Pu na foro kanha ki ni, ga pʼi sanha lii wɛ, a Yusufu di wu puga ki ɲuŋɔfɔɔ wu pye: «Yiri mʼa pii sipyii pii niinɛ co, mʼa pu pye: ‹Ɲaha na yee dʼa kakuunɔ taga kasaana foo tɔ wɛ? 5 Cɛɛgbuu lemu ni nɛ kafɔɔ wʼa gbuu na wu celɔrɔ ti pyi ge, ɲaha na yee dʼa lee yu wɛ? Yee ya kakuunɔ pye dɛ!› »
6 A ná wu pu niinɛ co, na pee jomɔ pu jo ni pu ni. 7 A pʼi wu ɲɔ shɔ na: «Ɲaha na wèe kafɔɔ wʼi yu le jogana le na mɛ wɛ? Ma kapyebyii pu wa da ga sɔɔ wee kashi wu na bada wɛ! 8 Wèe ya wari wemu ta wù bɔrilɔɔ pu ni ge, wèe ya pa ni wee ni na yìri Kana ni, na pa gan mu mu. Wèe ma bye dii sanha na wari kelee sanni yu ma kafɔɔ wu puga ki ni wɛ? 9 Cɛɛgbuu li bu ɲa wemu fɛni ma kapyebyii pu ni, weefɔɔ na gbo, wèesamaa na bye ma buloo.» 10 A puga ki ɲuŋɔfɔɔ wu jo: «Ayiwa, yemu yʼa jo ge, yi na yaha yee na. Ga cɛɛgbuu li bu ɲa wemu fɛni, weefɔɔ yɛ nigin wu da bye nɛ wo bulo we, pusamaa ma bye jaagi baa fɛɛ.» 11 A pu bɛɛri nigin nigin wu pu bɔrɔyɔ yi tirige taapile ni na yi ɲɔyɔ mugi. 12 A Yusufu puga ki ɲuŋɔfɔɔ wʼi ɲɔ kɔn na bɔrɔyɔ yi funŋɔ shaa. A wu li ɲɔ kɔn pu bɛɛri wo lɛgɛ fɔɔ wu na, na ma pu bɛɛri wo kurogo wo wu mu. A cɛɛgbuu li ba ɲa Bɛnzhamɛ wo bɔri wu funŋɔ ni. 13 A pʼi pu fadeye shɛɛngi, a wa bɛɛri di wu tuguro taha wu kafaŋa na, a pʼi guri jé kanha ki ni.
Zhuda ya ɲɛrɛgɛ pye Bɛnzhamɛ kaa na
14 Ayiwa, a Zhuda ni wu cebooloo pʼi shɛ nɔ Yusufu kaban na wuyɛ pyaa ta wà, a pʼi nuguro sin, na ɲahaya ye buri ɲiŋɛ na wu fɛɛ ni. 15 A Yusufu di pu pye: «Ɲaha kʼa yee wá le na wɛ? Ta yee ya li cɛ na sipya wemu wu ɲɛ ba nɛ ɲɛ-ɛ ge, na wʼa kaŋmɔhɔŋɔɔ cɛ wɛ?» 16 A Zhuda di wu ɲɔ shɔ na: «Jomɔ pekɛ wèe di da já jo wɛ, na kafɔɔ? Yekɛ yʼi wa sanha wèe mu wɛ? Fiinŋɛgana lekɛ na wèe di da já wùyɛ fiinŋɛ wɛ? Kilɛ wʼa ma kapyebyii pu nɔhɔ mugi. Li wii, cɛɛgbuu lʼa ɲa wemu mu ge, wee fara wèe na, wèe bɛɛri pʼa da bye ma buloo.»
17 A Yusufu di jo: «Bada, nɛ kunni da ga lee pye wɛ! Wemu mu cɛɛgbuu lʼa ɲa ge, wee yɛ nigin wʼa da bye nɛ wo bulo we. Yeesamaa pi ge, yee pʼa se ɲaɲiŋɛ na yi to wu yíri.»
18 A Zhuda di gbara Yusufu na na jo: «Kafari yoo na kafɔɔ we, ma kapyebye wu yaha wu ɲɔɲii kii jo ma mu, na ta ma luu ya yìri wu tàan wɛ, ali ma li ta bɛ ma ni Farawɔn bɛɛri ɲɛ tayerenuŋɔ ni. 19 Nɛ kafɔɔ wʼa wù kapyebyii pu yege tɔɔɲishiinɛ li ni na ta pu to wu wà sanha, na ta ceborona wa bɛ wa pu mu. 20 A wù ma pye: ‹Wèe to wu wa wà, wʼa lɛ. Pya wemu wʼa se wu nilɛxhɔgɔ ki na ge, wee ɲɛ wèe kurogo cuun. Wee kaa ya dan wèe to wu ni fo xuuni, bani wu ni wu ɲahafɔɔ wemu bye nu na ge, wee ya fɔ, a wu yɛ nigin di bye wu nu wu mu.› 21 A mʼi ma kapyebyii pu pye na pu pa ni wu ni, ma bile li ba ma ɲii taha wu na. 22 A wèe di ma pye jo pya wʼa da já laha wu to wu tàan wɛ. Wu bu laha wu to wu tàan, tofɔɔ wu na xhuu. 23 A mʼi wèe pye na wèe bye wèe di ya pa ni wù kurogo cuun wu ni wɛ, na wèe ɲii da daha ma na wɛ.
24 «Ayiwa, wèe ya shɛ nɔ wù to wu na ge, ma kapyebye we, na wù kafɔɔ wu jomɔ pu jo wu mu. 25 A wèe to wu ba jo na wèe pu kuri pa shinma dooni wa bɛ shɔ di zhɛ wu kan. 26 A wèe di wu pye: ‹Wèe wa da já zhɛ wà nige wɛ, fo wù kurogo cuun wu bu binnɛ ni wù ni. Bani wèe kurogo cuun wu bye wu ɲɛ ni wèe ni wɛ, wèe wa da já zhɛ ɲii taha we ná we na wɛ.› 27 A wèe to wu wèe pye, ma kapyebye we, na: ‹Yee ya li cɛ na jalaa shuun nɛ shɔ Arasɛli ya se nɛ mu. 28 A nigin di ba foro caŋa ka, nɛ giin jo yacoyo yʼa wee shɛɛngi shɛɛngi nakaara baa, bani fo na pa nɔ niɲaa na, nɛ sanha wu ɲa wɛ. 29 Yi bu we bɛ lɔ foro na tàan, a bɔɔngɔ di shɛ wu ta, yi na funyaŋa taga na shifiire wo wu tirige xuu kulo ni dɛ!›
30 «Ayiwa, nimɛ nɛ bu guri shɛ na to wu yíri, ma kapyebye we, nɛ bu guri shɛ wu yíri, na ta we pya we ɲɛ ni wèe ni wɛ, wu munaa lʼa pɔ pya wu wuu li na pɔgana lemu na ge, 31 wu bye wʼi ya shɛ pya wu ɲa ni wèe ni wɛ, wu na xhuu. Wèe ma bye kaɲuŋɔ, na wù to wu shifiire wo wu yaha kari xuu kulo ni ni funyaŋa ni. 32 Na fara lee na, nɛ li shɛ wù to wu na jo nɛ na ba yere ni pya wu ɲuŋɔ keree ni. Jo nɛ bye nɛ ya kuri shɛ ni wu ni wu mu wɛ, jo wu xakɛ wu na bye yaha na ɲuŋɔ ni na shi wu caŋa ɲɛhɛɛ ki bɛɛri ni. 33 Nimɛ nʼa ma ɲɛɛri jo ma ma kapyebye wu yaha wu gori naha ma mu, wu bye ma bulo pya wu tɛgɛ, kɔnhɔ pya wu da gaaŋi ni wu ɲahafɛɛ pu ni. 34 Dii nɛ di da já zhɛ na to wu yíri, na ta pya wu wa ni nɛ ni-i wɛ? Ee! Bɔɔngɔ ke ki da zhɛ nɔ nɛ to wu na ge, nɛ ɲii bu daha kee na, lee wa da xhu nɛ ni wɛ!»