Yusufu ceboonamaa pu shɛzhiinɛ Misira fiige ki ni
42
Ba Yakuba ya logo na shinma wa Misira fiige ki ni wɛ, a wu wu nagoo pu pye: «Ɲaha na yi dʼa tiin na yiyɛ wii mɛ wɛ? 2 Nɛ logo na shinma nibɛrɛmɛ wa daa Misira fiige ki ni. Yi shɛ shinma wa shɔ wà yi pa wù kan, kɔnhɔ xuugo ganha bu wù gbo wɛ.»3 A Yusufu ɲahafɛɛ kɛ di gari Misira fiige ki ni shinma wu tashɔgɔ ni. 4 Yakuba ya ta sɔɔ na Yusufu cuun Bɛnzhamɛ yaha kari ni wu cebooloo pu ni wɛ, bani wu bi jo: «Bɔɔngɔ ya yaa na wu ta wɛ.» 5 Sipyiire ti bi se na shinma wu shuu. A Izirayɛlia wo nagoo pu bɛ di gari Misira ni di zhɛ shinma wa shɔ, bani xuugo ki bye Kana fiige ki ni.
6 Lee bi Yusufu ta wee na ɲɛ Misira fiige ki ɲuŋɔ ni. Wee wu bi bɛrɛ wu pyi fiige ki sipyii pu bɛɛri mu. Ayiwa, a Yusufu ɲahafɛɛ pʼi nɔ na nuguro sin wu fɛɛ ni, na ɲahaya ye buri ɲiŋɛ na. 7 Ba Yusufu ya wu ɲahafɛɛ pu ɲa wɛ, na pu cɛ, ga na wuyɛ pye kanna wu ya pu cɛ wɛ. A wu kafilawa jo ni pu ni na: «Mii yee dʼa yìri wɛ?» A pʼi wu ɲɔ shɔ na: «Kana fiige ki ni wèe ya yìri na ba di ba ɲɔlige sha.»
8 A Yusufu di wu ɲahafɛɛ pu cɛ, ga pee di ya wu cɛ wɛ. 9 Ŋmunɔyɔ yemu yʼa jé toro wu ni pu shizhaa na ge, a wu funŋɔ di do yee na. A wu pu pye: «Kasɛɛgɛ na yee ya pa. Fiige ki tɛyɛ yemu fanha kʼa cɛ́rɛ ge, yee ya pa yʼi ba yee sha cɛ.» 10 A pʼi wu pye: «Ahayi, wù kafɔɔ, shinma tashɔgɔ ni ma kapyebyii pʼa pa. 11 Wèe bɛɛri pu ɲɛ ná nigin wo jalaa, see sipyii wèe ɲɛ. Ma kapyebyii pu ya ta pye kasɛɛgɛ pyevɛɛ wɛ.» 12 A Yusufu di pu pye: «Ahayi, fiige ki tɛyɛ yemu fanha kʼa cɛ́rɛ ge, yee ya pa yʼi ba yee kasɛɛgɛ pye.»
13 A pʼi wu pye: «Ma buloo pu ɲɛ namaa kɛ ni shuun (12), wèe bɛɛri ɲɛ ná nigin wo jalaa Kana fiige ki ni. Wèe bɛɛri kurogo wo wʼa kori wèe to wu tàan wà. Ná nigin wu wa wee wa nige wɛ.» 14 A Yusufu di guri jo: «Nɛ sii yi jo wɛ? Kasɛɛgɛ pyevɛɛ yee ɲɛ!» 15 Nɛ na ba yee nɔhɔ wolo wologana lemu na ge, lee li wa mɛ: «Farawɔn ɲìi wo wu mɛgɛ na, yee wa shishiin da ga ba foro naha na ta yee kurogo cuun wu ya pa wɛ.» 16 Yi shɛn nigin wa tun wee di shɛ ba ni yi cuun wu ni, yeesamaa na ba le kaso ni naha. Nɛ na ba yi jomɔ pu nɔhɔ faa lee funŋɔ ni pu bi ɲɛ can. Lee bye lʼi ya pye wɛ, Farawɔn ɲìi wo wu mɛgɛ na, kasɛɛgɛ pyevɛɛ yee ɲɛ.
17 A wu pu le kaso ni na ta cabyaa taanri.
Yusufu ya jo na pu pa ni Bɛnzhamɛ ni
18 Caŋa taanri wogo ki na a Yusufu di pu pye: «Yi le pye, yaaga wa da yi ta wɛ, bani nɛ fyagi Kilɛ na. 19 Yi bi ɲɛ see sipyii, shɛn nigin wa wu kori naha yi ni kaso wu ni, pusamaa di shɛ shinma wu kan yi puga shɛɛn xuugo wuu pu mu. 20 Yʼi shɛ guri pa ni yi cuun wu ni naha na yíri, lee funŋɔ ni yʼa yemu jo ge, yi nɔhɔ na jɛ, yi mʼa shɔ xu na.» A pʼi lee pye.
21 Wee tuun wu ni a pʼi puyɛ pye: «Can na wèe ya nahana wù cuun wu mu. Wèe bɛɛri ya li ɲa na wʼa wèe ɲɛɛri ni yama ni wu funŋɔ ni, ga wèe ya ta sɔɔ na wu ɲɛrɛgɛ ki logo wɛ. Lee lʼa ke bɔɔngɔ ke pye kʼa wèe ta.» 22 A Urubɛn di jo: «Ta nɛ bi sii yi jo yee mu jo yi ganha bu pya we xakɛ lɔ-ɛ, a yee di li she wɛ? Nimɛ wu shishan pu foo wa yegee wèe na.» 23 Pu bi cɛ jo Yusufu ya pu jomɔ pu nuri wɛ, bani wa wu bi yi ɲɛri pu mu. 24 A wu kadugo le pu ni, na laara kɔn pu na, na mɛɛ su. Lee kadugo na a wu guri pa na pa yu ni pu ni. A wu Simiɲɔ co pu niŋɛ ni, na wu pɔ pu ɲii na.
25 Lee kadugo na a Yusufu di jo na pu pu bɔrɔyɔ yi ɲi shinma wu na, na pʼi wa bɛɛri wo wari kuruŋɔ le wu shinma bɔri wu ni, pʼi guri pʼi ɲaagoo li bɛ wo yaligee kan pu mu. A pu shiin di li pye mu. 26 A pʼi pu shinma bɔrɔyɔ yi taha pu kafaya yi na, na ganha na gaaŋi. 27 Piige ya pa shɛ pu wɔ xuu wekɛ ni ge, a pʼi shɔn wà. A pu shɛn nigin wa di wu wo bɔri ɲɔ mugi, kɔnhɔ wu yaliye kan wu kafaŋa ki mu. A wee di wu wo wari wu ta wà bɔri wu funŋɔ ni. 28 A wu wu cebooloo pu pye: «Nɛ wo wari wʼa tɛrɛŋɛ nɛ na, wu we shinma bɔri wu ni!» A lee di pu ɲaha wɔ fo xuuni, a pʼi shɔ na jɛlɛ, na ganha na puyɛ pyi: «Lekɛ Kilɛ dʼa pye mɛ wèe na wɛ?»
29 Ba pʼa kuri pa Kana fiige ki ni pu to wu yíri wɛ, keree kiimu bɛɛri kʼa pye pu na ge, a pu kee bɛɛri paari wu mu. 30 A pʼi jo: «Ná wemu wu ɲɛ fiige ki ɲuŋɔ ni ge, wee ya kafilawa jo ni wèe ni, na jo na kasɛɛgɛ tapyege ni wèe ya pa. 31 Ga a wèe di wu pye jo see sipyii wèe ɲɛ, jo wèe ɲɛ kasɛɛgɛ pyevɛɛ wɛ. 32 Jo namaa kɛ ni shuun wèe di bye, ná nigin jalaa, jo nigin wu wa wee wa nige wɛ, jo wèe kurogo cuun wu wa wà wèe to wu tàan Kana fiige ki ni. 33 Ayiwa, a fiige ki ɲuŋɔfɔɔ wu jo: ‹Lemu na nʼa da li cɛ na yee ya pa kasɛɛgɛ na-ɛ ge, lee li wa mɛ: Yi yi ceborona nigin wa yaha naha na mu, yʼi ɲɔlige ki lɔ yʼa se yi puga shɛɛn xuugo wuu pu mu. 34 Yʼi shɛ ba ni yi kurogo cuun wu ni. Lee na nʼa da li cɛ jo yi wa ta pa kasɛɛgɛ na wɛ, jo see sipyii yi wa. Nɛ mʼa yi cuun wu kuruŋɔ na kan yi mu, yi ma ganha na jagi pyi bɛ sanha na wo fiige ki ni.› »
35 Ba pʼa shinma wu ɲɔ kɔn na garaŋa wɛ, a wa bɛɛri di wu wo wari wu ta wu wo shinma bɔri wu funŋɔ ni. Pu ni pu to wu ni, ba pʼa wari wu ɲa shinma bɔrilɔɔ pu ni wɛ, a pu bɛɛri di sii fya. 36 A pu to Yakuba wu pu pye: «Yee ya nɛ buun na jalaa pu ni. Yusufu ɲɛ nige wɛ, Simiɲɔ bɛ ɲɛ nige wɛ, yʼi giin da gaaŋi ni Bɛnzhamɛ bɛ ni. Kii keree kii bɛɛri wa dun nɛ ɲuŋɔ ni.» 37 A Urubɛn di wu to pye: «Nɛ bye nɛ ya pa ni wu ni wɛ, ma na ba na jalaa shuun wu gbo. Wu kaa le na keŋɛ ni, nɛ na ba wu kuruŋɔ ba ma kan.» 38 A Yakuba di jo: «Nɛ ja wu da ba shɛ ni yee ni wɛ, bani wu ɲahafɔɔ wʼa fɔ, a wu yɛ nigin di gori. Kakuunɔ ba shɛ wu ta yee mu koo li na, yee na ba na ɲuzhiifiire wo wu pye wʼa kari xuu kulo ni ni yama ni.»