Misira saan wʼa wu kapyebyii shuun wa le kaso ni
40
Ba kee keree kʼa toro wɛ, a caŋa ka di ba nɔ, a Misira saan wu wo yagbaya yi ɲuŋɔfɔɔ we, ni wu buuriyaalaa pu ɲuŋɔfɔɔ we, a pee di ba kakuunɔ la pye saan wu na. 2 A Farawɔn luu di yìri pee ɲuŋɔfɛɛ shuun wu tàan, yagbaya yi ɲuŋɔfɔɔ we, ni buuriyaalaa pu ɲuŋɔfɔɔ we. 3 A wu pu kan gɛdii ɲuŋɔfɔɔ wu mu wʼa le kaso ni wu puga. Kee kaso gbaha ke ni Yusufu bɛ bye. 4 A gɛdii ɲuŋɔfɔɔ wu pu kaa le Yusufu keŋɛ ni, na wu kasɛɛgɛ yaha pu na. A pʼi tuun wa ta wà wee kaso wu ni.Kapyebyii pʼa ŋmunɔyɔ ya ŋmunɔ, a Yusufu di yi kɔ́ri jo pu mu
5 Ayiwa, caŋa ka wo piige ni, a pu shuun wu bɛɛri di ba ŋmunɔyɔ ya ŋmunɔ na pu yaha kaso wu ni, Misira saan wu wo yagbaya yi ɲuŋɔfɔɔ we, ni buuriyaalaa pu ɲuŋɔfɔɔ we. Ŋmunɔgɔ ka ɲɛ ni ka ni ninuŋɔ wɛ, yi kɔ́ri wu bɛ di ɲɛ nigin wɛ. 6 Kee caŋa ki wo ɲisɔɔgɔ ki na, ba Yusufu ya pa pu yíri wɛ, na ba pu ɲahaya ta yʼa tanha. 7 A Yusufu di pu pye: «Ɲaha na yee ɲahaya dʼa tanha niɲaa wɛ?» 8 A pʼi wu pye: «Ŋmunɔyɔ ya wèe ya ŋmunɔ ŋmunɔ, sipya wa di wa naha wemu na já yi kɔ́ri jo wèe mu wɛ.» A Yusufu di pu pye: «Ta Kilɛ bɛ wʼa ŋmunɔyɔ kɔ́ri yu wɛ? Na yi ɲɛɛri, yi yi paari na mu.»
9 A yagbaya ɲuŋɔfɔɔ wʼi wu wo ŋmunɔgɔ ki paari Yusufu mu na: «Nɛ ŋmunɔgɔ ŋmunɔ, na ɛrɛzɛn tige ka ɲa na ɲahagbaa na. 10 Geye taanri wu bye kee tige ki na. A tige kʼi fun, na fyɛɛnrɛ pye, na ɛrɛzɛn nilɛ pye. 11 Lee bi Farawɔn wo cɛɛgbuu li ta nɛ keŋɛ ni. A nɛ di ɛrɛzɛn nilɛ wu lɔ, na wu yugi le Farawɔn wo cɛɛgbuu li ni, na li le Farawɔn keŋɛ ni.»
12 A Yusufu di wu pye: «Ma ŋmunɔgɔ ki kɔ́ri wu we: Tige geye taanri wu ɲɛ cabyaa taanri. 13 Cabyaa taanri bu doro, Farawɔn na ba ma ɲuŋɔ ki yirige, na ma teŋɛ ma labye wu na. Ma na ba Farawɔn wo cɛɛgbuu li leni wu keŋɛ ni sanha ba mʼa bi fɛnhɛ na li pyi, na ma yaha wu wo yagbaya yi ɲuŋɔfɛɛrɛ ti na wɛ. 14 Ga, ma ba ba pee fɛrɛmɛ pu ta tuun wemu ni, mʼa ma funŋɔ yaha nidogo na na, nʼa ma ɲɛɛri jo ma saama pye na na. Mʼa na kaa jo Farawɔn mu, kɔnhɔ wu na yeege we kaso we ni. 15 Bani fanha na pʼa nɛ co yeege Heburuu fiige ki ni na pa naha, nɛ di wa kaa la pye nahamɛ bɛ lemu na kaso nɔ na na wɛ.»
16 Ayiwa, buuriyaalaa ɲuŋɔfɔɔ wʼa kee ŋmunɔgɔ ki kɔ́ri ta wʼa ɲɔ ge, a wu bɛ di Yusufu pye: «Nɛ bɛ ya ŋmunɔgɔ ŋmunɔ jo buuri nivyɛn daya taanri wu bye nɛ ɲuŋɔ ni. 17 Daŋa kemu ki bye yi bɛɛri ɲuŋɔ ni ge, yaligee tuuyo yemu bɛɛri Farawɔn ya li ge, yee bɛɛri yi bye kee ni, ga shazhɛɛrɛ di ma na yi juuri daŋa ki ni nɛ ɲuŋɔ ki ni.» 18 A Yusufu di wu ɲɔ shɔ na jo: «Ki kɔ́ri wu we: Daya taanri wu ɲɛ cabyaa taanri. 19 Cabyaa taanri bu doro Farawɔn na ba ma ɲuŋɔ ki yirige yirigegana la na lemu la ɲɛ ma na wɛ, na ma pɔ tige na, shazhɛɛrɛ na ganha na ma ceexaara ti juuri.»
20 Ayiwa, a kee caŋa taanri wogo kʼi ba bɛ ni Farawɔn wo cazege caŋa ni. A wu yaligee niɲɛhɛŋɛɛ yàa wu wo kapyebyii pu bɛɛri mu. A wu yagbaya yi ɲuŋɔfɔɔ we, ni buuriyaalaa ɲuŋɔfɔɔ wu yeege kaso wu ni wu kapyebyii pu bɛɛri ɲii na. 21 A wu yagbaya ɲuŋɔfɔɔ wu teŋɛ sanha wu wo labye wu na, a wee di ganha na cɛɛgbuu li kaan Farawɔn mu. 22 Ga a wu buuriyaalaa ɲuŋɔfɔɔ wu yirige suri tige ni na saha ni Yusufu wo nijoyo yi ni pu mu.
23 Yagbaya yi ɲuŋɔfɔɔ wu ya ta wu funŋɔ sha ni Yusufu kaa ni wɛ. A wu funŋɔ di wɔ.