Na Yusufu yaha Potifari kaban
39
Ayiwa, a Isimayɛli shi shɛɛn pʼi gari ni Yusufu ni Misira fiige ki ni, na shɛ wu pɛrɛ Misira shɛn wa mu, wee mɛgɛ ki bye na Potifari. Farawɔn wo gɛdii ɲuŋɔfɔɔ wu bye wee Potifari we.2 A Tɛhɛnɛ Baa Kilɛ di gori yaha ni Yusufu ni. A wu keree ki bɛɛri di ganha na ɲɔgi. A wu bye wu kafɔɔ Misira shɛn wu kaban. 3 A wu kafɔɔ wu li ɲa na Tɛhɛnɛ Baa Kilɛ wu wa ni wu ni, na wu bu jé kaa lemu bɛɛri ni, Tɛhɛnɛ Baa Kilɛ na lee ɲɔ kan wu mu. 4 A Yusufu kaa di daan wu kafɔɔ wu mu, a wu ganha na wu kafɔɔ wu kapyeŋɛɛ ki pyi. A wu kafɔɔ wu wu teŋɛ wu puga ki bɛɛri ɲuŋɔ ni, na wu keŋɛ yaŋmuyɔ yi bɛɛri kaa le wu keŋɛ ni. 5 Tuun wemu tɛhɛnɛ na Potifari ya wu teŋɛ wu puga ke, ni wu keŋɛ yaŋmuyɔ yi bɛɛri ɲuŋɔ ni ge, a Tɛhɛnɛ Baa Kilɛ di baraga le Misira shɛn wu ni Yusufu wuu na. A Tɛhɛnɛ Baa Kilɛ di baraga le wu keŋɛ yaŋmuyɔ yi bɛɛri ni, wu puga woyo yi fara kɛrɛyɛ yi woyo yi na.
Potifari shɔ wu ɲii ya foro Yusufu fɛni
6 Yusufu bi ɲɔ ɲɛwiinɛ ni, wu cére ti lemɛ bɛ dʼa ɲɔ. 7 A tuun wa di ba nɔ a Yusufu kafɔɔ wu shɔ wu ɲaha yeege wu fɛni. A wu Yusufu pye: «Sinnɛ ni na ni.» 8 Ga, a Yusufu di li she, na wu kafɔɔ wu shɔ wu pye: «Nɛ kafɔɔ wu ya jin nige nɛ ni kaa la shishiin tɛ ni ke puga ke ni wɛ. Kemu bɛɛri ki ɲɛ wu wogo ge, wʼa yee bɛɛri kaa le nɛ keŋɛ ni. 9 Sipya wa ke puga ke ni wemu wʼa ye nɛ na wɛ, wu di ya nɛ ɲaha kɔn kaa la shishiin na wɛ, fo mu, bani mu ɲɛ wu shɔ. Nɛ ma bye dii na Kilɛ xakɛ lɔ ni lee kakuutiinɛ le la wo bye ni wɛ?» 10 Caŋa caŋa wu bi yee yu ni Yusufu ni, ga Yusufu ya ta pye ɲa bɛ wu fɛni, wa wu ta wʼa go na sinnɛ ni wu ni wɛ.
11 Caŋa ka a Yusufu di ba jé puga ki ni na wu wo kapyeŋɛɛ ki pyi. Bulo wa shishiin bye puga ki ni kee caŋa wɛ. 12 A cee wu di wu co fadeŋɛ ke na, na jo: «Pa sinnɛ ni na ni!» A Yusufu di fadeŋɛ ki yaha wu keŋɛ ni, na baa foro kpɛɛngɛ ki na. 13 Ba cee wʼa li ɲa na Yusufu ya wu fadeŋɛ ki yaha wu keŋɛ ni, na baa foro kpɛɛngɛ ki na wɛ, 14 a wu xhuulo, na puga ki shɛɛn pu yiri na pu pye: «Yi le wii dɛ! Ɲɔcoro kaa na we Heburu we ya pa naha. Nɛ fɛni wʼa pa jé na wu sinnɛ ni nɛ ni, ga a nɛ li she, na xhuulo saama na. 15 Wʼa nɛ ɲa nɛ na xhuulo saama na ge, a wu wu fadeŋɛ yaha nɛ keŋɛ ni, na baa foro kpɛɛngɛ ki na.»
16 A cee wu Yusufu fadeŋɛ ki yaha wuyɛ tàan fo na shɛ wu poo wu pye wʼa pa. 17 Ná wʼa pa ba ge, a wu wu pye: «Heburu bulona wemu ni mʼa pa ge, wʼa pa jé nɛ fɛni na wu sinnɛ ni nɛ ni. 18 Ba nɛ sipyaa le na suu wɛ, a wu wu fadeŋɛ ki yaha nɛ keŋɛ ni, na baa foro kpɛɛngɛ ki na.»
Pʼa Yusufu le kaso ni
19 Ba Yusufu kafɔɔ wʼa yi logo wu shɔ wu ɲɔ na na le Yusufu ya pye wu na wɛ, a wu luu di yìri. 20 A wu kafɔɔ wu wu le kaso ni. Saan wu wo kasolemɛɛ pu ɲɛ kaso gbaha kemu ni ge, kee ni wu bye. A wu bye wà kaso wu ni.
21 A Tɛhɛnɛ Baa Kilɛ di gori yaha ni Yusufu ni, na wu tɔn taan kaso gbaha ki ɲuŋɔfɔɔ wu mu. 22 A kaso gbaha ki ɲuŋɔfɔɔ wu kasolemɛɛ pu bɛɛri wo keree yaha Yusufu keŋɛ na. Kaa bɛɛri li bi byi wà ge, Yusufu wu da li ɲaha co. 23 Kaso gbaha ki ɲuŋɔfɔɔ wu jate bi nɔ Yusufu keŋɛ kaa la shishiin na wɛ, bani Tɛhɛnɛ Baa Kilɛ bye ni wu ni. Wu bu kaa bɛɛri ɲɔ wolo, Tɛhɛnɛ Baa Kilɛ na lee ɲɔ.