Zhuda ni Tamari wo keree
38
Ayiwa, wee tuun we ni Zhuda ya pa yìri laha wu cebooloo pu tàan, na shɛ diin Adulamu kulo li ni ná wa mu wee mɛgɛ ki bye na Ira. 2 A wu ba Kana shɛn ná wa wo poro ɲa. Wee mɛgɛ ki bye na Shuwa. A wu wee cee wu leŋɛ na pye wu shɔ. 3 A cee wu ba yere yacɛrɛ na na ja se, a pʼi wu mɛgɛ le na Ɛri. 4 A wu ba yere sanha yacɛrɛ la bɛ na na lee bɛ se funana. A wu lee mɛgɛ le na Ona. 5 A wu ba funana la bɛ se sanha, na lee mɛgɛ le na Shela. Wu tigiduun wʼa bi Zhuda ta wu na ɲɛ Kezibu kulo li ni.6 A Zhuda di ba cee wa lɔ kan wu jashiimɛ Ɛri mu. Wee cee wu mɛgɛ ki bye na Tamari. 7 Ga Zhuda jashiimɛ Ɛri bi sii kolo Tɛhɛnɛ Baa Kilɛ ɲaha tàan, a Tɛhɛnɛ Baa Kilɛ di wu gbo. 8 Ayiwa, a Zhuda di Ona pye: «Mʼa ma nibyii cɛ ma ɲahafɔɔ wu shɔ wu shizhaa na. Mʼa yaa na wu lɔ na pye ma shɔ, kɔnhɔ mʼa nagoo ta wu na ma ɲahafɔɔ wu nixhugo ki mu.» 9 Ona bi li cɛ na pee nagoo pii da ba bye wee wuu wɛ. A wu bye ba wʼa sinnɛ ni cee wu ni tuun bɛɛri ni wɛ, wʼa ba ti wo ɲiŋɛ na, kɔnhɔ wu ganha bu pya ta di yaha wu ɲahafɔɔ wu mu wɛ. 10 Lemu wu bi byi ge, lee ya taan Tɛhɛnɛ Baa Kilɛ mu wɛ, a wu wee bɛ gbo. 11 A Zhuda di wu ja shɔ Tamari pye: «Shɛ diin ma to wu puga, mʼa gori yaha naxhugoshagara ti ni, ma ganha bu jé ná mu wɛ, fo na ja Shela wu ba lɛ na nɔ cee lɔmɔ.» Wu bi yu wuyɛ funŋɔ ni na: «Wee bɛ ya yaa wu xu wu ɲahafɛɛ pu wo xugana li na wɛ.» A Tamari di gari, na shɛ diin wu to puga.
12 Ba taatuunnɔ la ya toro wɛ, a Zhuda shɔ wu fɔ, Shuwa poro we. Ba Zhuda luu ya pa ɲiŋɛ wu shɔ wu vɔ wu na wɛ, a wu ba yìri caŋa ka, na gari Timina ni di zhɛ wu dubyaa shiire kɔnvɛɛ pu pɛrɛgi. Wu ni wu naɲii Adulamu shɛɛn Ira wu bye shiizhan. 13 A wa di shɛ Tamari pye: «Wii, ma pelɛgɛ ki wa gaaŋi Timina ni, di zhɛ wu yatɔɔyɔ yi shiire ti kɔn.» 14 A Tamari di wu naxhugoshaa fàya yi wolo, na fàŋa ka taga wuyɛ tɔ, na shɛ diin Enayimu kulo li ɲɔ ki na Timina koo li na. Bani wu bi li cɛ na Shela ya lɛ, pʼi ya ta wee kan wu mu wu pye wu shɔ wɛ.
15 Ba Zhuda ya wee cee wu ɲa wɛ, na wu pye dɔdɔshɔ wa, bani wu ɲaha ki bi tɔ. 16 Wu bi ta li cɛ na wee wo jashɔ wu wʼa wii wɛ. A wu gbara wu na na wu pye: «Na yaha di shɛ sinnɛ ni ma ni». A cee wu jo: «Ɲaha ma di da gan na mu, mʼa na sinnɛ ni na ni wɛ?» 17 A Zhuda di jo: «Nɛ na ba ma kan sikapige.» A cee wu jo: «Uun! Ga fo ma bu ma keŋɛ yaaga ka tiimɛ na mu, fo sikapige ki ba shɛ ba.» 18 A Zhuda di jo: «Ma di wa giin nɛ di yaaga kekɛ tiimɛ ma mu wɛ?» A cee wu jo: «Mʼa ma keŋɛ fɛ pu kpuun ni yaaga kemu ni ge, kee ni ki mɛɛ li tiimɛ na mu naha na fara pubiin li na, lee lemu li wa ma keŋɛ ki ni ge.» A Zhuda di yee yaŋmuyɔ yi kan wu mu, na sinnɛ ni wu ni, a wu yere yacɛrɛ na. 19 A cee wu yìri kari, na shɛ fàŋa ki laha wu ɲaha ki na, na wu naxhugoshaa fàya yi le.
20 A Zhuda di sikapige ki kan wu naɲii Adulamu shɛn wu mu wu shɛ gan, wu wu keŋɛ yaŋmuyɔ yi shɔ cee wu mu. Ga naɲii wu ya shɛ cee wu ɲa wɛ. 21 Sipyii piimu pu ɲɛ wà ge, a Ira di pee yege na: «Navarashɔ we wu bye naha Enayimu koo li na ge, mii wu dʼa kari wɛ?» A pʼi wu pye: «Navarashɔ wa shishiin sanha bye ɲa naha wɛ.» 22 A Ira di guri shɛ Zhuda mu na shɛ wu pye: «Nɛ ta shɛ cee wu ɲa-ɛ dɛ! A wee xuu wu sipyii pu bɛ di jo na navarashɔ wa shishiin sanha bye ɲa wà wɛ.» 23 A Zhuda di jo: «Wu yi ta wà. Wù ganha bu shiige nɔ wùyɛ na wɛ. Nɛ kunni ya wu sikapige ki kan shɛ, a mu di bye mu ya ta shɛ wu ta wà wɛ.»
24 Ba yebyaa taanri shishiin ya toro wɛ, a pʼi ba Zhuda pye: «Ma ja shɔ Tamari wʼa dɔdɔɔrɔ pye, fo wu na yere yacɛrɛ bɛ na tee dɔdɔɔrɔ ti funŋɔ ni.» A Zhuda di jo: «Yi wu yeege kpɛɛngɛ ki na, wu ɲìi wo wu sòrogo.» 25 Na pu yaha pu na gaaŋi ni wu ni kpɛɛngɛ ki na, a wu te tuduro te kan shɛ jo wu pelɛgɛ ki mu na: «Ná wemu woyo yi wa ye yaŋmuyɔ ye ge, wee mu nɛ laa li ta. Nʼa ma ɲɛɛri, ke fɛ kpɔn kpɔn yaaga ke ni ki mɛɛ le, ni le pubiin le fɔɔ sha mʼa wu cɛ.» 26 A Zhuda di yee yaŋmuyɔ yi cɛ wu woyo na jo: «Nɛ wo nahama pʼa pɛlɛ ye wu wo pu na. Nɛ bi yaa na wu kan na ja Shela mu wu pye wu shɔ, ga nɛ ta lee pye wɛ.» Zhuda ya sinnɛ nige ni Tamari ni lee kadugo na wɛ.
27 Ba laa li seduun ya pa nɔ wɛ, a lʼi da ŋmamaa laa. 28 Wu tigiduun wu ni, a pya wa di ba wu keŋɛ yeege, a lacozhɔ wu kee co, na lizemɛɛ niɲira pɔ kee na, na jo: «We wʼa foro shɛnshiimɛ we». 29 Ga a wee di wu keŋɛ ki kuruŋɔ leŋɛ wà, a wu ŋmamaɲii wu foro. Ayiwa a lacozhɔ wu jo: «Kapahaŋa mʼa mugi dɛ!» A pʼi wu mɛgɛ le na Pɛrɛzia. 30 Lee kadugo na a wewu di na foro ni lizemɛɛ niɲira li ni wu keŋɛ ki na. A pʼi wee mɛgɛ le na Zera.