Ezawu ni wu tirige shɛɛn pee
(1 Caŋa Ɲɛhɛɛ Jomɔ 1:34-37)
36
Ayiwa Ezawu, wee ninumɔ pʼa byi na Edomu. Wee ni wu wo tirige shɛɛn pu keree ki wa kiiri. 2 Kana shɛɛn pushaa Ezawu bi leŋɛ na pye wu cèe. Wu shɔ wa mɛgɛ ki bye na Ada, wee bye Xhɛti shi shɛɛn Elɔn wo poro. Wa mɛgɛ di ɲɛ na Olibama, wee bye Ana wo poro, na ɲɛ Xhɛvi shi shɛɛn Zibeyɔn wo ɲabige. 3 A wu ba Basimati bɛ leŋɛ, wee bye Isimayɛli wo poro, na ɲɛ Nebayɔtia ceboroshɔ. 4 A Ada di Elifazi se Ezawu mu, a Basimati di Erewɛli se, 5 A Olibama di Yewusi, ni Yalamu, ni Kore se. Pee pʼa pye Ezawu wo jalaa pee, piimu pʼa se wu mu Kana fiige ki ni ge.6 A Ezawu di ba wu cèe lɔ, ni wu jalaa, ni wu poro pushaa, ni wu puga ki kapyebyii pu bɛɛri, ni wu niiyɛ, ni wu yatɔɔyɔ bɛɛri, na fara wu naafuu wu na, wʼa bi wemu bɛɛri ta Kana fiige ki ni ge. A wu yi bɛɛri lɔ, na yìri kari fiige katii ni, na wuyɛ sanha lii wu cuun Yakuba na. 7 Bani pu shuun wu naafuu wu bi sii ɲɛhɛ fo pu da já diin puyɛ tàan wɛ. Fiige kemu bɛ ni pu bye tiinnɛ na ge, kee bɛ bi cɛ́rɛ pu yapɔrɔyɔ yi ni. 8 Lee funŋɔ ni a Ezawu di yìri shɛ diin Seyiri faaboboŋɔ ki na. Ezawu ninumɔ pʼa byi na Edomu.
9 Ayiwa, Ezawu wʼa pye Edomu shɛɛn pu wo sefɛlɛ. Wu tirige shɛɛn pu wa piiri na wu yaha Seyiri wo faaboboŋɔ ki na. 10 Ezawu wo jalaa pʼa pye: Ezawu shɔ Ada ja Elifazi, ni Ezawu shɔ Basimati ja Erewɛli.
11 Elifazi wo jalaa pʼa pye: Tema, ni Omari, ni Zefo, ni Gatamu ni Kenazi. 12 Ezawu ja Elifazi wo shɔ wa bɛ mɛgɛ ki bye na Timina, ga wee bye wu furupɔzhɔ wɛ. Wee Timina wu bɛ wʼa bi ja wa se Elifazi mu na Amalɛki. Pee pʼa pye Ezawu shɔ Ada wo ɲabiye ye.
13 Erewɛli wo jalaa pʼa pye: Naxhati, ni Zera, ni Shama, ni Miza. Pee pʼa pye Ezawu ni wu shɔ Basimati wo ɲabiye ye. 14 Ezawu shɔ Olibama wemu wu bye Ana wo poro, na ɲɛ Zibeyɔn wo ɲabige ge, wee wo jalaa pʼa pye: Yewusi, ni Yalamu, ni Kore.
15 Ayiwa, Ezawu wo tirige shɛɛn piimu pʼa pye ɲuŋɔfɛɛ ge, pee pʼa pye piiri: Tema, ni Omari, ni Zefo, ni Kenazi, 16 ni Kore, ni Gatamu, ni Amalɛki. Pee ya pye Ezawu ni wu shɔ Ada jashiimɛ Elifazi wo jalaa. Pee ya pye ɲuŋɔfɛɛ Edomu wo fiige ki ni.
17 Ezawu ja Erewɛli wo jalaa piimu pʼa pye ɲuŋɔfɛɛ ge, pee ɲɛ: Naxhati, ni Zera, ni Shama, ni Miza. Pee pʼa pye ɲuŋɔfɛɛ Erewɛli wo jalaa pu ni Edomu fiige ki ni. Pee ya pye Ezawu shɔ Basimati wo ɲabiye.
18 Ezawu shɔ Olibama wo jalaa piimu pʼa pye ɲuŋɔfɛɛ ge, pee pu ɲɛ piiri: Yewusi, ni Yalamu, ni Kore. Pee pʼa pye ɲuŋɔfɛɛ na foro Ezawu shɔ Olibama wo jalaa pu ni, Ana wo poro we. 19 Ezawu wemu pʼa byi Edomu ge, pii pʼa pye wee wo tirige shɛɛn pee. Ɲuŋɔfɛɛ pʼa pye pii pu wo shi wu niŋɛ ni.
Ɔri shi shɛn Seyiri wo tirige ke
(1 Caŋa Ɲɛhɛɛ Jomɔ 1:38-42)
20 Ayiwa, sipyii piimu pʼa pye Edomu fiige ki shɛnshiilee pu ge, pee ya pye Seyiri wo jalaa. Ɔri shi shɛn wu bye Seyiri. Wu jalaa pu mɛyɛ yi wa ye: Lotan, ni Sobali, ni Zibeyɔn, ni Ana, 21 ni Disɔn, ni Ezɛri, ni Disan. Pee pʼa pye Ɔri shi shɛɛn pu wo ɲuŋɔfɛɛ pee Edomu fiige ki ni. Seyiri wo jalaa pʼa pye pii. 22 Lotan wo jalaa pʼa pye: Ɔri, ni Emamu. Timina wʼa pye Lotan wo ceboroshɔ. 23 Sobali wo jalaa pu piiri: Alivan, ni Manaxhati, ni Ebali, ni Sefo, ni Onamu. 24 Zibeyɔn wo jalaa pu piiri: Aya ni Ana. Wee Ana we, na wu yaha wu na wu to Zibeyɔn wo kafaya yi naha, wee wʼa pa shɛ foro caŋa ka, lobulowii la na siwaga ki ni, lemu wo lɔhɔ kʼa wɛri ge. 25 Ana wo nagoo pu piiri: wu ja Disɔn ni wu poro Olibama. 26 Disɔn wo jalaa pu piiri: Ɛmudan, ni Ɛsiban, ni Yiteran, ni Keran. 27 Ezɛri wo jalaa pu piiri: Bilan, ni Zavan ni Akan. 28 Disan wo jalaa pu piiri: Uzi, ni Aran.
29 Ɔri shi shɛɛn pu wo ɲuŋɔfɛɛ pu ɲɛ: Lotan, ni Sobali, ni Zibeyɔn, ni Ana, 30 ni Disɔn, ni Ezɛri, ni Disan. Pee pʼa pye Ɔri shi shɛɛn pu wo ɲuŋɔfɛɛ pee na foro Seyiri fiige ki ni.
Edomu wo saannaa pee
(1 Caŋa Ɲɛhɛɛ Jomɔ 1:43-54)
31 Ayiwa, saannaa piimu pʼa Edomu fiige ki mara toro sani saan wa wu pa diin Izirayɛli shi wu ɲuŋɔ ni ge, pee pʼa pye piiri: 32 Nizhiimɛ wʼa pye Bewɔri ja Bela, wee ya pye Edomu fiige ki saan, wu kugbɔɔ li mɛgɛ ki bye na Dinaba. 33 Ba Bela ya pa fɔ wɛ, a Zera ja Yobabu di diin wu tɛgɛ saanra ti na. Wee bye Bɔsira shɛn. 34 Yobabu ya pa fɔ ge, a Tema fiige shɛɛn Usamu di diin wu tɛgɛ saanra ti na. 35 Usamu ya pa fɔ ge, a Bedadi ja Adadi di diin wu tɛgɛ saanra ti na. Wee wʼa se ta Majan shɛɛn pu na Mowabu fiige ki ni. Wu wo kulo li mɛgɛ ki bye na Aviti. 36 Adadi ya pa xhu ge, a Masareka shɛɛn Samela di diin wu tɛgɛ saanra ti na. 37 Samela ya pa fɔ ge, a Sɔli di diin wu tɛgɛ saanra ti na. Wee bi yìri Ereboti ni, gba wu ɲɔ ki na. 38 Sɔli ya pa fɔ ge, a Akibɔri ja Baali-Ana di diin wu tɛgɛ saanra ti na. 39 Akibɔri ja Baali-Ana ya pa fɔ ge, a Adari di diin wu tɛgɛ saanra ti na. Wee ya yìri Pawu kulo li ni. Wu shɔ mɛgɛ ki bye na Metabɛli. Wee cee wu bye Matɛrɛdi wo poro, na ɲɛ Mɛzabu wo ɲabige.
40 Ayiwa, ɲuŋɔfɛɛ piimu pʼa foro Ezawu wo tirige ki ni ge, pee wo mɛyɛ yi wa ye na saha ni pu gbaweye ye, ni pu tatɛɛnyɛ ye, ni pu mɛyɛ yi ni. Timina, ni Aliva, ni Yetɛti, 41 ni Olibama, ni Ela, ni Pinɔ, 42 ni Kenazi, ni Tema, ni Mibisari, 43 ni Magidɛli, ni Iramu. Pee pʼa pye Edomu shi shɛɛn pu wo ɲuŋɔfɛɛ pee na saha ni pu tatɛɛnyɛ ni pu koomɔ pu ni. Ezawu wʼa pye Edomu shi wu wo tolɛ we.