Yakuba ya kuri pa Bɛtɛli ni
35
Ayiwa caŋa ka a Kilɛ di ba Yakuba pye: «Yìri mʼa shɛ Bɛtɛli ni, mʼa shɛ diin wà. Mʼa saraya tawologo ka yaa wà Kilɛ mu, Kilɛ wemu wʼa wuyɛ shɛ ma na ma paaduun wu ni ma ɲahafɔɔ Ezawu wu ɲaha na ge.»*2 Wee tuun wu ni a Yakuba di wu puga shɛɛn ni wu sipyii pu bɛɛri pye: «Pɛɛŋɛ yaŋmuyɔ yemu bɛɛri yi wa yi mu ge, yi yee bɛɛri yeege yiyɛ tɛ ni, yʼi yiyɛ pye fɛɛfɛɛ, yʼi yi cére fàya yi faa. 3 Yʼi yìri wù shɛ Bɛtɛli ni, di shɛ saraya tawologo ka yàa wà Kilɛ mu, wee Kilɛ wemu wʼa nɛ ɲɛrɛgɛ ki logo na cɔnrɔmɔ pu caŋa, na gori nɛ mu na tashɛyɛ yi bɛɛri ni ge.» 4 Pɛɛŋɛ yaŋmuyɔ yemu bɛɛri yi bye pu keŋɛ ni ge, na fara pu niye fegemɛɛ na, a pʼi yee bɛɛri kan Yakuba mu. Tige ka bye wà Sisɛmu kulo li tàan, a Yakuba di yi ŋmɔhɔ kee nɔhɔ ni. 5 A pii yìri laha ke tɛgɛ ki ni a Kilɛ di fyaara nigbɔɔrɔ shan pu taan kulogoo ki bɛɛri na, wa shishiin ya ta Yakuba jalaa pu nɔhɔ niinɛ wɛ. 6 A Yakuba ni wu sipyii pu bɛɛri di nɔ Luzi kulo li ni, lee ɲɛ Bɛtɛli kulo le, Kana fiige ki ni. 7 A wu saraya tawologo ka yàa wà, na wee xuu wu mɛgɛ le na Ɛli Bɛtɛlia, bani wee xuu wu ni Kilɛ wʼa bi wuyɛ shɛ wu na wu paaduun wu ni wu ɲahafɔɔ wu ɲaha na. 8 A Debora di ba xhu, Erebeka wo biivɔɔ we. A pʼi wu ɲuŋɔ ŋmɔhɔ Bɛtɛli tàan tigbɔhɔ ka nɔhɔ ni, a pʼi kee tige ki mɛgɛ le na: «Ɲɛsinmɛ tige.»
9 Ba Yakuba ya yìri Padani-Aramu wo mura wu ni na pa wɛ, a Kilɛ di ba wuyɛ shɛ wu na sanha, na duba wu mu. 10 A Kilɛ di wu pye: «Mu mɛgɛ ki ɲɛ Yakuba. Ga pu da da ma yiri nige Yakuba wɛ, ma mɛgɛ ki da bye Izirayɛlib.» A wu Yakuba mɛgɛ ki ɲɛri na Izirayɛli. 11 A Kilɛ di wu pye sanha na:
«Nɛ ɲɛ Se Bɛɛri Fɔɔ Kilɛ.
Pye sege fɔɔ
ma nagoo niɲɛhɛmɛɛ se.
Shi niɲɛhɛmɛ na ba foro ma ni.
Saannaa bɛ na ba foro ma ni.
12 Fiige kemu nɛ kan Ibirayima ni Ishaaga mu ge,
nɛ na ba kee kan ma mu,
di ki kan ma kadugo shi nibama wu bɛ mu.»*
13 Xuu wemu ni Kilɛ ya jo ni wu ni ge, a Kilɛ di wu yaha wee xuu wu ni, na yìri dugi na kari fugba wu ni. 14 Kilɛ bi wuyɛ shɛ Yakuba na xuu wemu ni ge, a wu beni wa yereŋɛ wà, faakagereŋɛ beni, na saraga niwoŋɔ ni sìnmɛ wo kee na. 15 Kilɛ bi jo ni Yakuba ni xuu wemu ni ge, a wu wee mɛgɛ le na Bɛtɛli*.
Arasɛli ya fɔ
16 A pʼi yìri Bɛtɛli ni na gaaŋi Efirata yíri. Na pu yaha koo na, a Arasɛli yacɛrɛ lʼi yìri. A wu tigimɛ di bɛn. 17 Na wu yaha laa li yama pu na, a lacozhɔ wu jo: «Ma ganha bu fya wɛ, bani funana la bɛ mʼa ta.» 18 Ba wʼa zhaa di xhuu wɛ, na pya wu mɛgɛ le na Bɛni-Oni «Lee kɔ́ri ɲɛ na yama ja». Ga a wu to wu wu mɛgɛ le na Bɛnzhamɛ. «Lee kɔ́ri ɲɛ na kanige ja.» 19 A Arasɛli di fɔ, a pʼi wu ɲuŋɔ ŋmɔhɔ Efirata koo li na, wee xuu wu pʼa byi na Bɛtilɛhɛmu. 20 A Yakuba di beni wa sin wà wu faŋa ki ɲuŋɔ ni, wee beni we ɲɛ wa niɲaa bɛ ni.
21 A Izirayɛli di yìri wee xuu wu ni, na shɛ wu fàya piyɛyɛ yi sin Migidali-Edɛri ni.
Yakuba nagoo kɛ ni shuun we
(1 Caŋa Ɲɛhɛɛ Jomɔ 2:1-2)
22 Na Izirayɛli yaha tiinnɛ na kee fiige ki ni, wu bi jé wu bulozhɔ Bila wemu mu ge, a Urubɛn di shɛ sinnɛ ni wee bulozhɔ wu ni. A Izirayɛli di yi logo. Jalaa kɛ ni shuun wu bye Yakuba mu. 23 Leya wo nagoo pu ɲɛ: Urubɛn, wee ɲɛ Yakuba wo jashiimɛ we, ni Simiɲɔ, ni Levi, ni Zhuda, ni Isakari, ni Zabulɔn. 24 Arasɛli wo nagoo pu ɲɛ: Yusufu ni Bɛnzhamɛ. 25 Arasɛli wo bulozhɔ Bila wo nagoo pu ɲɛ: Dan ni Nɛfitali. 26 Leya bɛ wo bulozhɔ Zilipa wo nagoo pu ɲɛ: Gadi ni Azɛri. Pii pʼa pye Yakuba wo nagoo pee, wʼa piimu se na wu yaha Padani-Aramu wo mura wu ni ge.
27 Ayiwa, a Yakuba di shɛ nɔ wu to Ishaaga wu yíri Mamure ni, Kiriyati-Araba kulo li ni, lee ɲɛ Eburɔn kulo le. Lee kulo li ni Ibirayima ni Ishaaga ya pu wo tiinnɛ li pye. 28 Ishaaga shi wu caŋa ɲɛhɛɛ ki bɛɛri ya pye yee xhuu nigin ni kɛlɛɛ gbarataanri (180). 29 Wʼa shi ta fo xuuni, na wu shi wu torogo bɛ ɲaɲiŋɛ na, na da xu. A pʼi shɛ wu fara wu sefɛlɛɛ pu na. A wu jalaa pʼi wu ɲuŋɔ ŋmɔhɔ, Ezawu ni Yakuba ni.