Zhenɛzi 34

Dina ni Sisɛmu shɛɛn keree

Ayiwa Leya bi fucɛɛrɛ la ta Yakuba mu, lee mɛgɛ bye na Dina. A lee fucɛɛrɛ lʼi ba gari di zhɛ foro fiige ki shɛɛn pu wo fucɛɛgɛɛ ki na. 2 Xhɛvi shi shɛɛn Amɔri wemu wu ɲɛ fiige ki wo saan wu ge, a wee wo ja Sisɛmu di shɛ wu ɲa, na wu co, na sinnɛ ni wu ni fanha na. 3 A Dina kaa di sii taan wu ni fo xuuni, Yakuba wo poro we. A wu ganha na kafilatan yu wu mu. 4 A Sisɛmu di ba wu to Amɔri pye: «Shɛ le fucɛɛrɛ le sha na mu, lʼi ba bye na shɔ.» 5 Ayiwa, a Yakuba di ba yi logo na Sisɛmu ya ɲuzogoro wa wu poro Dina na. Ga lee bi wu jalaa pu ta kɛrɛyɛ yi ni ni wu yapɔrɔyɔ yi ni. A wu cari wuyɛ na fo na shɛ pee pye pʼa kuri pa.

6 A Sisɛmu to Amɔri di shɛ Yakuba mu na shɛ jo ni wu ni. 7 Ba Yakuba jalaa pʼa pa yìri kɛrɛyɛ yi ni na pa puga wɛ. A pʼi ba wee kafila wu logo. A pʼi lee ta puyɛ mu fanhara, a pu logoo di yìri fo xuuni bani katanhana Sisɛmu bi pye Izirayɛli na, ma sinnɛ ni Yakuba poro wu ni. Lee bi yaa ni bye ni wɛ. 8 A Amɔri di pu pye: «Yee poro wu kaa ya taan fo xuuni nɛ ja Sisɛmu mu. Nʼa yi ɲɛɛri jo yi wu kan wu mu, wu bye wu shɔ. 9 Yi pye ni wù ni ceborogo ni cekaanra shizhaa na, yi na ba yi pushaa kaan wù mu, na wù bɛ wuu leŋɛɛ na byi yi cèe. 10 Yi na ba diin ni wù ni shiizhan, fiige ki ɲɔ na ba yaha yi mu. Yi tiin yi da kegaaŋa pyi, yʼi bye yara fɛɛ.»

11 A Sisɛmu di ba Dina to we ni wu ceboonamaa pu pye: «Yi bu lemu bɛɛri jo, nɛ na ba lee kan yi mu, kɔnhɔ na kaa di daan yi mu. 12 Yi na já furu naafuu niɲɛhɛmɛ ni mamama yaŋmuyɔ niɲɛhɛyɛ sha na mu, yemu bɛɛri kaa yʼa da ba jo ge, nɛ na ba yee bɛɛri kan yi mu, kɔnhɔ yʼi doɲiŋɛ pushɔ wu kan na mu na shɔ.»

13 A Yakuba jalaa pʼi Sisɛmu ni wu to Amɔri ɲɔ shɔ ni shizhiinmɛ ni, bani Sisɛmu bi ɲuzogoro wá pu ceboroshɔ Dina na. 14 A pʼi pu pye: «Ná wemu ya cekɔɔnrɔ pye wɛ, wèe da já wu ceboroshɔ wu kan wee mu wɛ. Shiige kaa li ɲɛ lere wèe mu. 15 Lemu lʼa da wèe pye wèe pu sɔɔ yee wo nijoyo yi na ge, lee li wa mɛ, fo yee namaa pu bɛɛri nigin nigin bu cekɔɔnrɔ pye, yi bɛ di bye ba wèe ɲɛ wɛ. 16 Lee bu bye, wù na da wù pushaa kaan yi mu, na yi wuu leŋɛɛ na byi wù cèe. Wù na diin yi mu, na binnɛ pye shɛn nigin ni yi ni. 17 Ga yi bye yʼi ya sɔɔ na cekɔɔnrɔ ti pye wɛ, wù na wù wo poro wu shɔ, na yìri na gaaŋi.» 18 A pee jomɔ pʼi daan Amɔri ni wu ja Sisɛmu mu. 19 A lɛvɔɔ wu bye wu ya lee pye kamɔnɔ wɛ, bani Yakuba poro wu kaa bi dan wu ni fo xuuni. Wee wu bye wu to wu puga ki bɛɛri wo sipyigbɔ we.

20 A Amɔri ni wu ja Sisɛmu di shɛ diin pu kulo li tajege ki ɲɔ na, na ganha na yu ni sipyiire ti ni na: 21 «Fungɔngɔ nizaaŋa wa pii sipyii pii mu na ɲaha tii wèe na. Wù pu yaha pʼi diin wù mu, wù wo fiige ki ni, pu da kegaaŋa pyi, fiige kʼa pɛlɛ, pu tatɛɛngɛ wa da voo wɛ. Wù na já da pu pushaa leŋɛɛ, na wù wuu kaan pu mu. 22 Ga pu da ga sɔɔ pu tiin wèe mu, pʼi binnɛ pye shi nigin ni wèe ni wɛ, fo wèe wo namaa pu bɛɛri nigin nigin bu cekɔɔnrɔ pye, ba puyɛ pyaa ki wa wɛ. 23 Ta pu kashɔyɔ ye, ni pu naafuu we, ni pu yatɔɔyɔ yi bɛɛri da ba bye wèe woyo wɛ? Wù sɔɔ yɛ pu wo nijoyo yi na kɔnhɔ pʼi gori wù mu.»

24 Piimu bɛɛri pu bye kulo li tajege ki ɲɔ na ge, a pee bɛɛri di Amɔri ni wu ja Sisɛmu jomɔ pu logo. Kulo li namaa pu bɛɛri pʼa foro kulo li tajege ki ɲɔ na ge, a pee bɛɛri di cekɔɔnrɔ pye.

25 Ayiwa, pu cekɔɔnrɔ ti caŋa taanri wogo ki na, na pu yaha ni pee yama pu ni, a Yakuba jalaa shuun wa, Simiɲɔ ni Levi, Dina wo ɲahafɛɛ pʼa. A pee shuun wu pu ŋmɔparaa lɔ, na gari kulo li funŋɔ ni ni lowaa ni, na shɛ li namaa pu bɛɛri gbo. 26 A pʼi Amɔri ni wu ja Sisɛmu bɛ gbo ni ŋmɔpara ni, na Dina co foro Sisɛmu puga ki ni na kari. 27 A Yakuba jalaa pusamaa di shɛ yee sipyixuyo yi fɛni, na shɛ kulo li yaŋmuyɔ yi bɛɛri kuu, bani pu bi ɲuzogoro wá pu cuun wu na. 28 A pʼi pu yatɔɔyɔ ye, ni pu niiye ye, ni pu kafaya yi co, na kanha ki yaŋmuyɔ ye, ni kɛrɛyɛ yi woyo yi bɛ lɔ. 29 A pʼi pu naafuu wu bɛɛri kuu, na nɔhɔpiire te ni pu cèe pu bɛɛri co, na pu piyɛyɛ yi yaŋmuyɔ yi bɛɛri lɔ.

30 A Yakuba di Simiɲɔ ni Levi pye: «Yee ya funzhaga wá nɛ na, na nɛ tɔn pɛn ke fiige ke shɛɛn mu, Kana shɛɛn ni Ferɛzi shɛɛn pee. Sipyii piitiilee wa na mu wɛ, pu na ba puyɛ pinnɛ na fɛni, na ba do na na, na na puga ki bɛɛri kyɛɛgi.» 31 A pʼi wu ɲɔ shɔ na: «Ta lʼa saha pu wèe ceboroshɔ wu pye ba navarashɔ ɲɛ-ɛ ya?»