Yakuba ya Ezawu ɲuŋɔ círi
33
Ayiwa, a Yakuba di ba wu ɲuŋɔ yirige, na wii, na Ezawu ɲa wu na ma ni sipyii xhuu shishɛɛrɛ (400) ni. A wu wu nɔhɔpiire ti taa taa Leya, Arasɛli ni bulozhaa shuun wu na. 2 A wu bulozhaa pu ni pu wo nagoo pu torogo ɲahagbaa li na, na Leya ni wu wo nagoo pu taha wà, na na Arasɛli ni Yusufu taha wà. 3 A wuyɛ pyaa di doro pu ɲahagbaa na. Ba wʼa shɛ dɛrɛŋɛ wu ɲahafɔɔ Ezawu wu na wɛ, na ganha na nuguro sinni na se fo na shɛ da tɔɔɲii gbarashuun: ma nuguro ti sin, na ɲaha ke buri ɲiŋɛ ki na. 4 Ga a Ezawu di baa círi wu na, na migile wu ni, na ɲɔsɔɔnrɔ fò kan wu mu. A pʼi mɛhɛɛ su. 5 A Ezawu di wu ɲuŋɔ yirige, na cèe pu ni nɔhɔpiire ti ɲa, na jo: «Jɔfɛɛ pʼi ɲɛ mɛ ni ma ni wɛ?» A Yakuba di jo: «Kilɛ ya nagoo piimu kan wu wo saama pu funŋɔ ni ma bulona wu mu ni wee ɲɛ nɛ ge, pee pu wa.» 6 A bulozhaa pee ni pu nagoo pʼi fulo, na nuguro sin ɲiŋɛ ki na. 7 A Leya bɛ ni wu nagoo di fulo, na nuguro sin ɲiŋɛ ki na, lee kadugo na, a Yusufu ni Arasɛli bɛ di fulo na nuguro sin ɲiŋɛ ki na.8 A Ezawu di jo: «Pii sipyii pii bɛɛri na nɛ círi ge, pee wo kaɲuŋɔ di ɲɛ kekɛ wɛ?» A Yakuba di jo: «Pu kaɲuŋɔ ki wa, kɔnhɔ di nayɛ kaa taan ma mu, na kafɔɔ.» 9 A Ezawu di jo: «Cuunvɔɔ we, yara le li wa nɛ mu ge, lee na nɛ yaa. Ma wo keŋɛ yara li yaha wà mayɛ mu.» 10 A Yakuba di jo: «Ahayi! Nʼa ma ɲɛɛri, nɛ kaa bu da lʼa taan ma mu, na yakanya yi shɔ. Bani nɛ mu ɲaha ki ɲa kanna ba sipya ma Kilɛ ɲaha ɲa mɛ wɛ. Mʼa na ɲuŋɔ círi ɲɔ saama na. 11 Nʼa ma ɲɛɛri, yaŋmuyɔ yemu nʼa gaan ma mu ge, yi shɔ. Kilɛ wʼa ɲuŋɔ ɲaari nɛ na, na yaŋmuyɔ yi bɛɛri kan nɛ mu.» A wu nɔrɔ yaha Ezawu na fo na ba wu pye wʼa pa yi shɔ.
12 A Ezawu di jo: «Wu yìri wù binnɛ wʼà gaaŋi. Nɛ na ba doro ɲaha ki na.» 13 A Yakuba di wu pye: «Na kafɔɔ, mʼa li cɛ na baraga wa nɔhɔpiire te ni wɛ, nɛ di wa ni dubyaseye ni nuseye bɛ ni. Wù bu ɲara li karamu ali caŋa nigin bɛ, yapɔrɔyɔ yi bɛɛri yʼa da xhuu. 14 Nʼa ma ɲɛɛri na kafɔɔ, toro na ɲaha na. Nɛ na ba yapɔrɔyɔ yi torogo nayɛ ɲaha na, na se kasɛɛgɛ na na saha ni nɔhɔpiire te ni yapɔrɔyɔ yi wo toɲaraga ki ni, fo na shɛ nɔ na kafɔɔ wu na Seyiri ni.» 15 A Ezawu di jo: «Wee tuun wu ni, nɛ na na wo sipyii pii yaha ma mu.» A Yakuba di wu pye: «Ɲaha na wɛ? Nɛ kaa bu da lʼa taan xɔ nɛ kafɔɔ wu mu, lee na nɛ yaa.»
16 A Ezawu di guri kee caŋa kiyɛ pyaa na gaaŋi Seyiri ni. 17 Yakuba wi ge, a wee di gari Sukɔti ni. A wu puga ka yàa wà wuyɛ mu, na buguloo pɔ wu yatɔɔyɔ yi mu. Lee na pʼa kee tɛgɛ ki mɛgɛ le na Sukɔtia.
18 A Yakuba di yìri Padani-Aramu ni, na nɔ sicuumɔ na Sisɛmu kulo li ni Kana fiige ki ni. A wu wu fàya puga ki sin kulo li ɲahagbaa li na. 19 Tɛgɛ kemu ni wu bi puga ki sin ge, wu bi kee shɔ Amɔri shi shɛɛn pu mu warifyɛn tuuyo xhuu nigin (100). Sisɛmu wo to wʼa pye Amɔri we. 20 A wu saraya tawologo ka yereŋɛ wà na ki mɛgɛ le na Eli-Elowe-Izirayɛli.b