Yakuba ya tuduro tun Ezawu mu
32
A Laban di ba soo yìri, na ɲɔsɔɔnrɔ fo kan wu poro pushaa pu mu, ni wu ɲabiye yi ni, na duba pye pu mu. Lee kadugo na a wu guri kari wu tatɛɛngɛ ki ni. 2 A Yakuba di koo lɔ na gaaŋi. A Kilɛ wo mɛlɛkɛɛ pii di shɛ wu ɲuŋɔ círi. 3 Ba Yakuba ya pu ɲa wɛ, na jo: «Kilɛ wo kashɛn keŋɛ ki tasinŋɛ ki ɲɛ ke.» A wu wee xuu wu mɛgɛ le na Mahanayimua.4 A Yakuba di tudunmɔɔ pii yaha kari wuyɛ ɲaha na wu ɲahafɔɔ Ezawu mu, Seyiri fiige ki ni, Edomu koomɔ pu ni. 5 A wu pee tudunmɔɔ pu pye: «Yi shɛ yi jo na kafɔɔ Ezawu mu na nɛ Yakuba, wu bulona we, na nɛ bye nadadɛɛnrɛ na Laban yíri fo na pa gbara niɲaa na. 6 Niiyɛ, ni kafaya, ni yapɔrɔbya wa nɛ mu, na fara bulonamaa ni bulozhaa na, nɛ ye jo pu shɛ jo na kafɔɔ wu mu, kɔnhɔ na kaa di daan wu mu.» 7 Ba tudunmɔɔ pʼa kuri pa wɛ, na ba Yakuba pye: «Wèe ya nɔ ma ɲahafɔɔ Ezawu wu na. Wuyɛ pyaa ki bɛ wʼa ma di ba ma ɲuŋɔ círi ni namaa xhuu shishɛɛrɛ (400) ni.» 8 A Yakuba di fya fo xuuni, a wu funŋɔ di sii pɛn. A wu wu sipyii pu taa na pye kuruyo shuun. Yapɔrɔbya wu fara niiyɛ ye ni ɲɔhɔyɔ yi na, a wu yee bɛ taa taaya shuun. 9 A wu jo: «Ezawu bu ba do taaga ka na, kekisaŋa na kiyɛ sha shɔmɔ.» 10 A wu jo sanha na: «Na tolɛ Ibirayima wo Kilɛ we, na to Ishaaga wo Kilɛ we, Tɛhɛnɛ Baa Kilɛ, mu ya nɛ pye na nɛ wu kuri da se na to kulo li ni, na cebooloo pu yíri, na mu na ba saama pye nɛ na. 11 Saama pemu bɛɛri ni ɲɔmɛɛ fɛɛrɛ temu bɛɛri mu ya pye nɛ mu ge, nɛ wemu wu ɲɛ mu wo bulo ge, nɛ bi ta yaa ni lee la shishiin bɛ ni wɛ. Bani caŋa ɲii lemu ni nɛ we Zhurudɛn Gba we kɔn ge, yaaga bɛ bye nɛ mu na pubiin li yɛ kadugo na wɛ. Nimɛ nʼa taa na pye kuruyo shuun. 12 Nʼa ma ɲɛɛri, na shɔ na ɲahafɔɔ Ezawu na. Bani nɛ fyagi jo wu ganha ba do wù na, wu nɔhɔpiire te, ni ti nii pu gbo wɛ. 13 Na ta mu dʼa nɛ pye bɛ na mu na ba ma saama pu pye nɛ mu, na nɛ kadugo ki ɲɛhɛ fo wa da já pu tɔrɔ wɛ, ba suumɔ lɔhɔ ɲɔ gbazhɛnhɛ ɲɛ wɛ.»*
14 A Yakuba di shɔn wee xuu wu ni wà. A wu ya lɔ wu keŋɛ yaŋmuyɔ yi bɛɛri ni, di zhɛ gan wu ɲahafɔɔ Ezawu mu. 15 Yaŋmuyɔ yemu wʼa lɔ ge, yee yi wa mɛ: Sikashaa xhuu shuun (200) ni sikapee kɛlɛɛ shuun. Dubyashaa xhuu shuun (200) ni dubyapee kɛlɛɛ shuun, 16 ɲɔhɔzhaa kɛlɛɛ taanri (30) ni yi nagoo, nushaa kɛlɛɛ shishɛɛrɛ (40) ni nupɛhɛɛ kɛ, kafazhaa kɛlɛɛ shuun ni kafabee kɛ. 17 A wu ye yatɔɔgbaya ye kaa le wu buloo pii keŋɛ ni, na yi bɛɛri yaha yi yɛ yi yɛ. A wu pu pye: «Yi toro na ɲaha na, yʼi yapɔrɔyɔ yi yaha yʼi laraga kɔn yiyɛ na.» 18 Wemu wu ɲɛ ɲaha ki na ge, a wu wee pye: «Na ɲahafɔɔ Ezawu bu shɛ jíri ma na, na ma yege na jɔgɔ puga shɛn ma di ɲɛ wɛ? Na mii mʼa se wɛ? Yapɔrɔyɔ yemu ni ma wa ge, na jɔgɔ woyo yʼi wa wɛ? 19 Mʼa wu pye na wu bulona Yakuba woyo yi wa, na wʼa yi kan pu shɛ gan wu kafɔɔ Ezawu mu. Na wuyɛ pyaa ki bɛ wa kadugo yíri na ma.» 20 A wu yee ninuyɔ jo shuun wo wu bɛ mu, na yi jo taanri wo wu bɛ mu, na yi jo yapɔrɔyɔ fɛɛ pu bɛɛri mu, na pu ba shɛ nɔ Ezawu na, na pu yi jo mu lee jogana li na. 21 Na pʼi wu pye: «Ma bulona Yakuba wuyɛ pyaa bɛ wa kadugo yíri na ma.» Bani wu bi wuyɛ funŋɔ kɔɔn na: «Ye yakanya ye nʼa torogo nayɛ ɲaha na ge, yee na zhɛ wu luu ɲiŋɛ, lee kadugo tàan, wu ba jo wʼa na ɲa ge, wu na na co xuuni.»
22 A Yakuba di yakanya yi yaha kari wuyɛ ɲaha na lee karigana li na, a wuyɛ pyaa di gori kee piige ki ni buguro ti na ni wu puga shɛɛn pu ni.
Yakuba ya zhaanra le ni ná wa ni
23 Kee piige kiyɛ pyaa ni a Yakuba di yìri na wu cèe shuun wu lɔ ni wu bulozhaa shuun we, na fara wu nagoo kɛ ni nigin wu na, na pu pye pʼa Zhabɔki Gba wu kɔn ɲɛri. 24 A wu pu pye pʼa Zhabɔki Gba wu kɔn ɲɛri ni wu keŋɛ yaŋmuyɔ yi bɛɛri ni. 25 A Yakuba yɛ nigin di gori wà. A ná wa di ba wu puro, a pʼi zhaanra ti le fo na shɛ kpɛɛngɛ ki pye kʼa wo. 26 Wee ná wʼa pa li ta na wee wa da ba já Yakuba na-ɛ ge, na wu kpɔn wu losige ke na. A Yakuba losige kʼi ŋmahana na pu yaha zhaanra ti na. 27 A ná wu Yakuba pye: «Na yaha di da gaaŋi, bani ɲiga kʼa zhaa da muri.» A Yakuba di jo: «Mu ya duba nɛ mu wɛ, nɛ da ga ma yaha mʼa gaaŋi wɛ.» 28 A ná wu jo: «Dii mu mɛgɛ di ɲɛ wɛ?» A wu wu ɲɔ shɔ na: «Yakuba.» 29 A ná wu jo: «Ma mɛgɛ da da yiri nige Yakuba wɛ, ga fo Izirayɛlib, bani mu ni Kilɛ ya zhaanra le, a ma ni sipyii bɛ di zhaanra le, a mʼa se ta.» 30 A Yakuba di wu pye: «Nʼa ma ɲɛɛri, ma mɛgɛ shɛ na na.» A wu jo: «Ɲaha na mʼa na mɛgɛ yegee wɛ*?» A wu duba Yakuba mu. 31 A Yakuba di wee xuu wu mɛgɛ le na Peniyɛlic, bani wʼa bi jo na: «Nɛ Kilɛ ɲa ɲaha ni ɲaha, na bye ɲìi na sanha.» 32 Caŋa ki foroduun wu ni Yakuba bi Penuwɛli Gba wu kɔɔn. A Yakuba di ganha na shuu na dun wu losige ki na. 33 Lee wuu na kavan wemu wu ɲɛ losige na ge, Izirayɛli nagoo pu ya wee xaa niɲaa we bɛ ni wɛ, bani wu losige kavan wu na Kilɛ ya Yakuba kpɔn.