30
Ayiwa, ba Arasɛli ya li ɲa na wee sanha pya ta wu poo wu mu wɛ ge, a wu muzhɔ wu ɲɛpɛɛn di jé wu ni. A wu Yakuba pye: «Nagoo kan na mu, lee bɛ wɛ, nʼa da xhuu.» 2 A Yakuba luu di yìri Arasɛli tàan na jo: «Wee tuun wu ni, nɛ wu ɲɛ Kilɛ wu gɛ? Wee wʼa ma pye ma da pya ta wɛ.» 3 A Arasɛli di jo: «Na bulozhɔ Bila wu we, jé wu mu kɔnhɔ wu nagoo ta na mu. Na bɛ na ba nagoo ta wu gbɔɔrɔ ni.»4 Ayiwa, a Arasɛli di wu bulozhɔ Bila kan Yakuba mu wʼa pye wu shɔ. A wee di ganha na shuun ni wu ni. 5 A Bila di ba yere yacɛrɛ na, na ja se Yakuba mu. 6 A Arasɛli di jo: «Kilɛ ya kaɲii kan nɛ mu. Wʼa na jomɔ pu logo na ja kan nɛ mu.» Lee na a wu wu mɛgɛ le na Dana. 7 A Arasɛli bulozhɔ Bila di ba yere yacɛrɛ na sanha na ja shuun wo se Yakuba mu. 8 A Arasɛli di jo: «Nɛ zhaanra deele le ni na ceboroshɔ wu ni, na se ta wu na.» A wu wee mɛgɛ le na Nɛfitalib.
9 Ayiwa, Leya bɛ ya pa li ɲa na wee wo sege kʼa yere ge, a wu wu bulozhɔ Zilipa lɔ kan Yakuba mu, wu pye wu shɔ. 10 A Leya bulozhɔ Zilipa di ba ja se Yakuba mu. 11 A Leya di jo: «Nɛ ɲuŋɔ ya taan dɛ!». A wu pya wu mɛgɛ le na Gadic.
12 A Leya bulozhɔ Zilipa wu ba ja shuun wo se Yakuba mu. 13 A Leya di jo: «Pe ɲɛ fɛrɛmɛ dɛ! Cèe pu na ba yu na nɛ fɛrɛ.» A wu wee mɛgɛ le na Azɛrid.
14 Caŋa ka, yalɔɔrɔ tuun wu ni, Urubɛn ya pa foro kari kɛrɛyɛ yi ni na shɛ tige sɛyɛ ya ta wà, yemu mɛgɛ ki ɲɛ na madiragɔrɔɔ ge. A wu ba ni yi ni na pa gan wu nu Leya mu. A Arasɛli di Leya pye: «Nʼa ma ɲɛɛri, ma ja wu madiragɔrɔɔe pii kan na mu.»
15 Ga a Leya di Arasɛli ɲɔ shɔ na: «Mu ya nɛ poo wu shɔ nɛ na, lee ya ma yaa wɛ, na nɛ wu na ja madiragɔrɔɔ bɛ kan ma mu?»
A Arasɛli di jo: «Ayiwa ni li wa mu, Yakuba wu na zhɛ shɔn ma puga ke piige ke ni ma ja wu madiragɔrɔɔ pu tɛgɛ.»
16 Ayiwa, ba Yakuba ya pa yìri sige ki ni na ma yakoŋɔ ki ni wɛ, a Leya di shɛ jíri wu na, na wu pye: «Nɛ puga ma da zhɔn niɲaa, bani nɛ ja wu wo madiragɔrɔɔ pʼa pye lee wo pɛrɛmɛ.» A Yakuba di shɛ shɔn Leya puga kee piige ki ni. 17 A Kilɛ di Leya wo ɲɛrɛgɛ ki logo. A wu yere yacɛrɛ na, na ja kaguro wo se Yakuba mu. 18 A Leya di jo: «Nɛ na bulozhɔ wu kan na poo wu mu wʼa pye wu shɔ ge, lee wo saraa Tɛhɛnɛ Baa Kilɛ ya kan nɛ mu.» A wu wee mɛgɛ le na Isakarif.
19 A Leya di yere sanha yacɛrɛ la bɛ na, na ja gbaara wo se Yakuba mu. 20 A Leya jo: «Kilɛ ya loolodaa nijenɛ kan nɛ mu. Nimɛ kunni, na poo wu na ba pɛɛŋɛ taha na na, bani jalaa gbaara nɛ se wu mu.» A wu wee pya wu mɛgɛ le na Zabulɔng. 21 Lee kadugo na a wu ba fucɛɛrɛ bɛ se, na lee mɛgɛ le na Dina.
22 Ayiwa, a Kilɛ di wu funŋɔ yaha nidogo Arasɛli na, na wu jomɔ pu logo, na wu pye wʼa pya ta. 23 A Arasɛli di ba yere yacɛrɛ na na ja se. A wu jo: «Kilɛ ya nɛ wo shiige ki lɔ laha nɛ ɲuŋɔ ni.» 24 A wu pya wu mɛgɛ le na Yusufuh na jo: «Tɛhɛnɛ Baa Kilɛ wu ja wa fara we na na mu.»
Yakuba ya naafuu ta
25 Ayiwa, ba Arasɛli ya Yusufu se wɛ, a Yakuba di Laban pye: «Koo kan na mu di guri da gaaŋi na puga, na wo fiige ki ni. 26 Na cèe ni na nagoo pu kan na mu, di da gaaŋi. Pee kaa na nɛ wa labye wu na ma mu. Labye wemu nɛ pye mu mu ge, mʼa wu cɛ.» 27 A Laban di wu pye: «Nɛ bu da nɛ kaa ya tàan ma mu, kori naha. Bani nɛ celɔrɔ cee, na li ɲa na mu wuu na Tɛhɛnɛ Baa Kilɛ ya baraga le nɛ ni.» 28 A wu jo sanha na: «Lemu lʼa bɛ ni ma saraa ni ge, lee jo, nɛ na ba lee kan ma mu.»
29 A Yakuba di jo: «Nɛ labye wu pye mu mu pyegana lemu na ge, a ma yapɔrɔyɔ yi bɛ di bye lemu nɛ keŋɛ ni ge, muyɛ pyaa kʼa lee cɛ. 30 Nifɛnhɛnɛ lemu li bye ma keŋɛ ni sani nɛ wu pa ge, lee ya sii ɲɛhɛ nimɛ. Ba nɛ da jé mu puga wɛ, a Tɛhɛnɛ Baa Kilɛ di baraga le mu ni. Ga nimɛ, tuun wekɛ ni nɛ da ba labye ɲɔ kɔn da byi nayɛ pyaa wo puga ki mu wɛ?»
31 A Laban di wu pye: «Lekɛ nɛ da yaa na kan ma mu wɛ?» A Yakuba di wu ɲɔ shɔ: «Ma ganha bu yaaga bɛ kan na mu wɛ. Ga yemu nʼa da jo ma mu ge, ma bu sɔɔ yee na, nɛ na da ma yatɔɔyɔ yi naha, ba nʼa bi li pyi wɛ. 32 Nɛ na ba ma yatɔɔyɔ yi bɛɛri saala niɲaa, dubya bɛɛri wʼa wɔ, kelee na ɲɛgɛlɛ, kelee na ɲɛ ni tabereye ni ge, ni sika bɛɛri wʼa ɲɛgɛlɛ, kelee na ɲɛ ni tabereye ni ge, yee bɛɛri na ba shɔɔnri yaha yi yɛ, yee na ba bye nɛ wo saraa we. 33 Nɛ bu da nɛ tii, ma ga ba na yatɔɔyɔ yi wii ɲibaŋa na, lee na jɛ. Ma ba ba yatɔɔgɔ bɛɛri ta taberege baa, kʼi ya wɔ kelee na ɲɛgɛlɛ wɛ, lee ɲɛ kanna nɛ yee yu.» 34 A Laban di jo: «Oo! Wù na ba li pye ba mʼa yi jo wɛ».
35 Ga kee caŋa ki yɛ pyaa, a Laban di sikapee ni sikashaa pu shɔɔnri wolo, piimu bɛɛri pu ɲɛ ni tafiye ni kelee na ɲɛgɛlɛ ge. Dubyaa piimu bɛɛri pu ɲɛ ni taberege ni, kelee pu na wɔ ge, a wu pee bɛ shɔɔnri wolo, na yee kan wu wo jalaa pu mu. 36 Na pu yaha kari xuu watii ni, kɔnhɔ pʼi laraga kɔn Yakuba na, laraga kemu ya cabyaa taanri ɲara wo laraga xɔ ge. A Yakuba di ganha na Laban wo yatɔɔyɔ yisaya naha.
37 Ayiwa, a Yakuba di pepiliye tiye ni amandi tiye ni pilatani tiye geye niburiye kɔn, na tɛyɛ ya wo kɔrɔyɔ lahala yi na fo na yi tafiye yi yeege yaha. 38 A wu yee geye tafiye woyo yi le le yatɔɔyɔ yi wo logbakɔrɔyɔ yi ni, kɔnhɔ yi ba ba tagbaga ni, yʼi ba yee ɲaa. Bani yatɔɔyɔ yi bu gari tagbaga ni, wee tuun wu ni yi ma duri yiyɛ na. 39 Ayiwa, a yatɔɔyɔ yi shiin di ganha na duri yiyɛ na na yee geye tafiye woyo yi yaha yi ɲaha tàan. Yʼa pa nagoo piimu bɛɛri se ge, a pee bɛɛri di ɲɛgɛlɛ, kelee na wɔ, kelee na pye ni tabereye ni. 40 Dubyapiye yemu Yakuba bi shɔɔnri yaha ge, wu ma yee ɲaha tii ni Laban wo dubyashaa pu ni, pee piimu pʼa ɲɛgɛlɛ ge. Lee shagana li na Yakuba ya wu yatɔɔyɔ yi sha. Wu ya ta yi pinnɛ Laban woyo yi ni wɛ. 41 Baraga ɲɛ yatɔɔyɔ yemu bɛɛri ni ge, yee ba da dugi yiyɛ na, Yakuba ma yee geye tafiye woyo yi le yi logbakɔrɔyɔ yi ni, kɔnhɔ yi dugi yiyɛ na ma yee geye tafiye woyo yi yaha yi ɲaha tàan. 42 Ga yatɔɔyɔ yi bu da yʼa shɔgɔ shɔgɔ, wu da geye yi le yi logbakɔrɔyɔ yi ni wɛ. Lee funŋɔ ni yatɔɔyɔ yemu bɛɛri yi ɲɛ baraga baa woyo ge, a yee di bye Laban woyo. Yemu bɛɛri yi ɲɛ ni baraga ni ge, a yee di bye Yakuba woyo.
43 Ayiwa a Yakuba di bye mu naafuugbɔ fɔɔ lee pyegana li na. A wu sii yapɔrɔyɔ niɲɛhɛyɛ ta, ni bulonamaa ni bulozhaa, ni ɲɔhɔyɔ ni kafaya.