Yakuba ya nɔ Padani-Aramu wo mura wu ni
29
Lee kadugo na a Yakuba di koo li lɔ na gaaŋi, na shɛ nɔ Kilɛ-nɔhɔ shɛɛn pu wo fiige ki ni. 2 A wu keeŋɛ ka ɲa wà sige ki ni, yatɔɔgbaya taanri dʼa sinnɛ ki ɲɔ na. Bani kee keeŋɛ ki na pu bi yapɔrɔyɔ yi gbuu, ga faakageegbɔhɔ dʼa taga keeŋɛ ki ɲɔ tɔ. 3 Ba yapɔrɔyɔ yi bɛɛri ya pa yiyɛ pinnɛ xɔ tuun wemu ni wɛ, pʼa faakagereŋɛ ki gologolo laha keeŋɛ ki ɲɔ na, na yapɔrɔyɔ yi kan yʼa gba, na nɔhɔ faakagereŋɛ ki taga keeŋɛ ki ɲɔ tɔ wà sanha. 4 A Yakuba di yatɔɔnahamaa pu pye: «Na cebooloo mii yee dʼa yìri wɛ?» A pʼi wu ɲɔ shɔ na: «Wèe ya yìri Karan ni.» 5 A wu pu pye: «Ta yee ya Nakɔri ɲabige Laban cɛ?» A pʼi wu ɲɔ shɔ na: «Uun, wèe ya wu cɛ.» 6 A wu pu pye: «Wʼa cuuŋɔ ya?» A pʼi wu ɲɔ shɔ na: «Uun, wʼa cuuŋɔ, wu poro Arasɛli wʼa ma mɛ ni wu yatɔɔyɔ ni.» 7 A Yakuba di pu pye: «Caŋa ki sanha xhɔ pʼa yapɔrɔbya wu pinnɛɛ wɛ. Yi yi kan yʼi gba, yʼi guri yʼa se ni yi ni tanahaŋa ni.» 8 A pʼi wu ɲɔ shɔ na: «Wèe da já lee pye wɛ, fo yapɔrɔbya wu bɛɛri ba ba binnɛ tuun wemu ni. Wù ma na faakagereŋɛ ki gologolo laha wà keeŋɛ ki ɲɔ na, na da yatɔɔyɔ yi gba.»Yakuba ya círi saha ni Arasɛli ni
9 Ayiwa, na Yakuba yaha pee jomɔ pu na ni pu ni, a Arasɛli di nɔ ni wu to wu wo yatɔɔgbaha ki ni, bani wee wu bye yatɔɔnahama we. 10 Wee tuun wu ni, ba Yakuba ya wu yalɔ Laban poro Arasɛli ɲa, na wu yalɔ wu wo yatɔɔgbaha ki bɛ ɲa wɛ, a wu fulo na faakagereŋɛ ki gologolo laha keeŋɛ ki ɲɔ na, na wu yalɔ wu yatɔɔyɔ yi kan yʼa gba. 11 Lee kadugo na a Yakuba di taanɲɛɛgɛ fò kan Arasɛli mu, na waha mɛɛ na. 12 A wu Arasɛli pye: «Nɛ ɲɛ mu to wu cuun fucɛɛrɛ ja. Nɛ ɲɛ Erebeka ja.» A Arasɛli di baa kari na shɛ yee jo wu to wu mu. 13 Ba Laban ya wu cuun fucɛɛrɛ li ja Yakuba kaa logo wɛ, a wu baa kari na shɛ wu ɲuŋɔ círi, na migile wu ni, na wu ɲɔ sɔn. Na ba ni wu ni wu kaban. A Yakuba di kii keree kii bɛɛri ɲaha jo wu mu. 14 A Laban di wu pye: «Nakaara baa, nɛ kaciiye ni nɛ ceexaara yɛ pyaa mu ɲɛ.»
Yakuba cèe pu leŋɛgana
A Yakuba di yeboŋɔ pye wu kaban. 15 A caŋa ka di ba nɔ, a Laban di Yakuba pye: «Nɛ ɲɛ mu ceboro, ga lee da já ɲɛri nago mu wʼa kapyeŋɛɛ pyi nɛ mu saraa baa wɛ. Le lʼa yaa li pye ma saraa ge, lee jo na mu.» 16 Lee bi Laban ta ni pushaa shuun ni. Nilɛ wu mɛgɛ ɲɛ na Leya, kurogo wo wu mɛgɛ ɲɛ na Arasɛli. 17 Leya ɲìi ki bi ɲɔ wɛ,a ga Arasɛli, wee dʼa sii ɲɔ ɲaha ni, wu cére ti lemɛ bɛ dʼa ɲɔ. 18 Arasɛli di bi dan Yakuba ni, a wu Laban pye: «Nʼa da yee gbarashuun pye ma mu labye ni, mʼa ma kurogo poro Arasɛli wu kan na mu.» 19 A Laban di jo: «Lee wa kapii wɛ, wʼa kan mu mu, lee ya pɔrɔ wu kan ná watii mu. Tiin naha na yíri.»
20 A Yakuba di yee gbarashuun labye pye wu mu Arasɛli wuu na. Wu bi dan wu ni taangana lekɛ na ge, a wu yee gbarashuun wu ta wʼa toro ba cabyaa dama dama ɲɛ wɛ. 21 Ba kee ya toro wɛ, a Yakuba di wu yalɔ wu pye: «Na shɔ wu kan na mu di wu leŋɛ, bani tuun wemu w’à shɛ wùyɛ na ge, wʼa fa.» 22 A Laban di wee xuu wu sipyii pu bɛɛri yiri, na yaligee niɲɛhɛŋɛɛ pye pu mu. 23 Ga ba piige kʼa pa wɔ wɛ, a Laban di wu poro Leya lɔ na shɛ gan Yakuba mu, a Yakuba di shɔn ni wee ni. 24 A Laban di wu bulozhɔ Zilipa kan Leya mu wʼa pye wu bulozhɔ. 25 Ba ɲiga kʼa pa mugi wɛ, a wu da Leya. A Yakuba di wu yalɔ wu pye: «Ɲaha wuu ma dʼa pye mɛ na na wɛ? Ta Arasɛli wuu na bɛ nɛ ya labye wu pye mu mu wɛ? Lekɛ na ma dʼa na nɔhɔ yaha wɛ?» 26 A Laban di wu pye: «Na cuunvɔɔ kan muzhɔ fɔɔ ɲaha na, lee ya byi wèe mu wɛ. 27 Cekaanra ti wo cewuu lisana pye ni muzhɔ fɔɔ wu ni, wù na cuunvɔɔ wu bɛ kan ma mu, mʼa yee gbarashuun wa bɛ labye pye na mu sanha.»
28 A Yakuba di li pye mu. A wu cewuu lisana pye ni Leya ni. A Laban di na Arasɛli kan wu mu wʼa pye wu shɔ. 29 A Laban di wu bulozhɔ Bila kan wu poro Arasɛli mu wʼa pye wu bulozhɔ. 30 A Yakuba di ganha na se Arasɛli bɛ puga. Arasɛli bi dan wu ni xuuni na toro Leya tàan. A wu yee gbarashuun wa bɛ labye pye sanha Laban mu.
Yakuba nagoo pu keree
31 Ayiwa Leya kaa bi dan wu poo wu ni wɛ. Tɛhɛnɛ Baa Kilɛ ya lee cɛ ge, na Leya pye sege fɔɔ, ga Arasɛli ya ta pya ta wɛ. 32 A Leya di ba yere yacɛrɛ na, na ja se. A wu wu mɛgɛ le na Urubɛnb, bani wu bi jo: «Tɛhɛnɛ Baa Kilɛ ya nɛ wo shiige ki ɲa. Nimɛ kunni, nɛ kaa na daan na poo wu mu.»
33 A wu ba yere yacɛrɛ la bɛ na sanha na ja wa bɛ se. A wu jo: «Tɛhɛnɛ Baa Kilɛ bi li cɛ na nɛ kaa ya dan na poo wu ni wɛ. Lee na wʼa we bɛ kan nɛ mu.» A wu wu mɛgɛ le na Simiɲɔc.
34 A Leya di ba yere yacɛrɛ la bɛ na sanha na ja wa bɛ se. A wu jo: «Nimɛ kunni nakaara baa, na poo wu na ba nɔrɔ na na, bani nɛ jalaa taanri se wu mu.» Lee na wʼa wee mɛgɛ le na Levid. 35 A wu ba yere yacɛrɛ la bɛ na sanha, na ba lee bɛ se funana, na jo: «Nɛ na ba Tɛhɛnɛ Baa Kilɛ sɔ le tɔrɔ le ni». Lee na wʼa wee mɛgɛ le na Zhudae.
Lee kadugo a wu sege kʼi yere.