Yakuba ya kari Padani-Aramu fiige ki ni
28
Wee tuun wu ni a Ishaaga di Yakuba yiri na duba pye wu mu, na yi jo waha wu mu na: «Ma ganha da Kana fiige ki cee wa shishiin leŋɛ wɛ. 2 Yìri, mʼa shɛ Betuwɛli kaban, ma nu wu to we, Padani-Aramua wo mura wu ni. Mʼa shɛ ma nu wu ɲahafɔɔ Laban wo fucɛɛrɛ la lɔ ma shɔ. 3 Se Bɛɛri Fɔɔ Kilɛ wu duba ma mu. Wu ma pye sege fɔɔ, wu ma sege ki ɲɛhɛ, kɔnhɔ shi niɲɛhɛmɛ di foro ma ni. 4 Kilɛ wu Ibirayima wo duba wu kan ma mu; shi we wʼa ma ma kadugo ge, wu wu kan wee bɛ mu. Kilɛ ya fiige kemu kan Ibirayima mu ma di ɲɛ ki nadadiinmɛ ge, kee di bye ma wogo*.» 5 A Ishaaga di Yakuba yaha kari Padani-Aramu wo mura wu ni, Aramu shɛɛn Betuwɛli ja Laban yíri, Erebeka ceborona we. Erebeka bye Yakuba ni Ezawu nu.6 A Ezawu di li cɛ na Ishaaga ya duba pye Yakuba mu, na wu yaha kari Padani-Aramu wo mura wu ni, kɔnhɔ wu shɛ cee lɔ wà. Ezawu bi li cɛ sanha bɛ na tuun wemu ni Ishaaga bi duba wu pyi Yakuba mu ge, wʼa bi wu pye na: «Ma ganha bu da Kana shɛɛn pu poro pushɔ wa leŋɛ wɛ dɛ!» 7 A Yakuba di wu to ni wu nu wu ɲɔmɛɛ co, na gari Padani-Aramu ni. 8 A lee di Ezawu pye wʼa li cɛ na Kana fiige ki fucɛɛgɛɛ ki kaa ya dan wu to Ishaaga ni wɛ. 9 Ayiwa ba wʼa lee cɛ mu wɛ, na gari Ibirayima ja Isimayɛli yíri, na shɛ wee wo poro pushɔ Maxhalati leŋɛ, Nebayɔti ceboroshɔ we, a wu wee leŋɛ na fara piipu cèe pu na.
Yakuba ya ŋmunɔgɔ ka ŋmunɔ
10 Ayiwa, a Yakuba di foro Bɛɛrisheba kulo li ni, na koo lɔ na gaaŋi Karan kulo li ni. 11 A wu ba shɛ nɔ xuu wa ni, na jo wʼi shɔn wà, bani caŋa ki bi to. A wu kagereŋɛ ka lɔ wà, na wu ɲuŋɔ taha kee na, na sinnɛ, na ŋmunɔ wà. 12 A wu ba ŋmunɔgɔ ka ŋmunɔ, na katadinnɛ la ɲa lʼa sin ɲiŋɛ ke na, li ɲuŋɔ ke dʼa shɛ nɔ fo fugba we na. Kilɛ wo mɛlɛkɛɛ pʼi duri, na diri li na. 13 A wu Tɛhɛnɛ Baa Kilɛ niyerege ɲa lee fugba ni. A wee di wu pye: «Nɛ ɲɛ Tɛhɛnɛ Baa Kilɛ, ma tolɛ Ibirayima wo Kilɛ we, ni Ishaaga wo we. Ɲiŋɛ kemu na mʼa sinnɛ ge, nɛ na ba kee kan ma mu, shi we wʼa ma ma kadugo ge, na ki kan wee bɛ mu.* 14 Ma shi wu na ba sii ɲɛhɛ ba gbazhɛnhɛpya ɲɛ wɛ. Wu na ba jaaga na kari Kilɛ-nɔhɔ, ni caŋatomɔ, ni Kilɛ-parama kabaya shuun wu bɛɛri na. Ɲiŋɛ ke kpɔnhɔɔ ki bɛɛri na ba duba ta na foro mu ni ma shi wu ni.* 15 Wii, nɛ na bye ni ma ni. Xuu xuu ni mʼa se ge, nɛ na ma mara, na ba ma kuruŋɔ na pa ke fiige ke ni sanha. Nʼa da ga ma yaha wɛ, nʼa ɲɔmɛɛ lemu lɔ ma mu ge, fo di bu lee bɛɛri koo ɲaari.»
16 A Yakuba di ɲɛ ŋmunumɔ pu na na jo: «Can na nahamɛ Tɛhɛnɛ Baa Kilɛ ɲɛ, ga nɛ bi ta lee cɛ wɛ.» 17 A wu fya na jo: «Ga we xuu we ɲɛ fyaara wo xuuni dɛ! We ɲɛ xuu watii Kilɛ puga kadugo na wɛ. Fugba wu kuɲɔjii li ɲɛ naha.»
18 A Yakuba di ba soo yìri, kagereŋɛ kemu na wu bi wu ɲuŋɔ ki taha ge, a wu kee yirige sin ba beni ɲɛ wɛ, na sìnmɛ wo ki ɲuŋɔ ni. 19 A wu wee xuu wu mɛgɛ le na Bɛtɛlib. Ga wee xuu wu mɛgɛ ki bi fɛnhɛ pye na Luzi. 20 A Yakuba di ɲɔ faa na: «Kilɛ bu gori ni nɛ ni, na nɛ mara le ɲaagoo le na, wu ba nɛ ɲɔlige kaan nɛ mu, na nɛ cére faleye kaan nɛ mu, 21 fo na shɛ nɛ kuruŋɔ pa leŋɛ na to wu puga ki ni sicuumɔ na, wee tuun wu ni Tɛhɛnɛ Baa Kilɛ na bye nɛ Kilɛ. 22 Ke kagereŋɛ ke nɛ yereŋɛ na pye beni ge, kee na ba bye Kilɛ wo puga. Yaŋmuyɔ yemu bɛɛri ma da ba gan na mu ge, nɛ na ba yee bɛɛri wo taaga kɛ wogo ki wolo gan ma mu.»