Yakuba ya wu ɲahafɔɔ wu ŋmahana
27
Ayiwa, Ishaaga ya pa lɛ, a wu ɲìi fanha di xhɔ fo na shɛ wu pye wu ya ɲaa wɛ. Wee tuun wu ni a wu ba wu jalɛ Ezawu yiri caŋa ka, na wu pye: «Na ja!» A wu wu ɲɔ shɔ na: «Ooyi.» 2 A Ishaaga di jo: «Go ma na ɲaa nʼa lɛ gɛ, di wa na xuduun cɛ wɛ. 3 Ma lozogo yɛrɛyɛ yi lɔ nimɛ, ma sindaa ke ni ma ŋmaya ye, mʼa shɛ sige ki ɲaari, mʼa xaara ta sha na mu. 4 Xaara shɔhɔgana le lʼa dan na ni ge, mʼa ba ti shɔhɔ lee shɔhɔgana li na, mʼa ba ti kan na mu, di ti xa di duba pye ma mu na ta di sanha xhu wɛ.»5 Lee di Erebeka ta wʼa ɲuwegee shan, Ishaaga ya yemu jo Ezawu mu ge, na yee bɛɛri logo. A Ezawu di gari sige ki ni di zhɛ xaara ti sha. 6 A Erebeka di shɛ wu ja Yakuba pye: «Wii, ye ma to wʼa jo ma ŋmamaɲii Ezawu mu ge, nɛ yi logo. Wʼa wu pye na: 7 ‹Shɛ sige xaara ta sha pa, mʼa ba ti kemɛ shɔhɔ na mu, di tee xa. Di bu tee xa, di duba pye ma mu Tɛhɛnɛ Baa Kilɛ ɲaha tàan na ta di sanha xhu wɛ.› 8 Na ja, na ɲɔmɛɛ co, lemu nʼa da jo ma mu nimɛ ge, mʼa lee pye. 9 Shɛ yatɔɔgbaha ki ni, mʼa shɛ sikapiye nijeye shuun wa co pa na kan. Xaara shɔhɔgana lemu lʼa dan ma to wu ni ge, di ba yi shɔhɔ lee shɔhɔgana li na. 10 Mʼa shɛ ti kan ma to wu mu, wu tee xa, kɔnhɔ wu duba pye ma mu na ta wu sanha xhu wɛ.»
11 A Yakuba di wu nu Erebeka pye: «Wii, nɛ ceborona Ezawu we, sipyitɔgɔ ki ɲɛ kii, shiire di wa nɛ wo ceesɛɛgɛ ki na wɛ. 12 Nɛ to wu bu shɛ nɛ taala taala, nɛ na bye wu mu naŋmahara fɔɔ. Lee di bu bye, nɛ na laŋi ta duba wu tɛgɛ dɛ.»
13 A wu nu wu wu ɲɔ shɔ na: «Wee laŋi we wu to nɛ ɲuŋɔ ni na ja. Na woyo yi logo yɛ, mʼa shɛ ba ni sikapiye yi ni.» 14 A Yakuba di shɛ yi co na pa gan wu nu wu mu. A nufɔɔ wu yi shɔhɔ wu to wu wo ɲidaan shɔhɔgana li na. 15 Lee kadugo na a Erebeka di wu jalɛ Ezawu wo fàya yi bɛɛri nizaaya lɔ, yee bye Erebeka kaban. A wu yi lɔ le wu kurogo ja Yakuba na. 16 A wu sika sɛɛgɛ ka taga Yakuba keye yi tɔ, na ka taga katige ke bɛ wo shiire baa xuu wu tɔ. 17 Wʼa xaara temu shɔhɔ ni buuri wemu ni ge, a wu yee kan wu ja Yakuba mu.
18 A Yakuba di gari ni yi ni wu to wu mu, na shɛ wu pye: «Na to.» A Ishaaga di wu ɲɔ shɔ na: «Ooyi na ja. Jɔgɔ wʼa wii wɛ?» 19 A Yakuba di wu to wu pye: «Nɛ ɲɛ ma jalɛ Ezawu we. Le mʼa jo na mu ge, nʼa li pye. Nʼa ma ɲɛɛri yìri tiin, mʼa na lozogo xaara ti xa, kɔnhɔ mʼa duba pye na mu.» 20 A Ishaaga di wu ja wu ɲɔ shɔ na: «Ga ma tɔrɔ dʼa wɛri bɛ! A mʼa tee ta dii wɛ?» A Yakuba di wu pye: «Ma Kafɔɔ Tɛhɛnɛ Baa Kilɛ we, wee wʼa na ɲuŋɔ taan.» 21 A Ishaaga di Yakuba pye: «Ayiwa na ja, fulo na na di ma taala taala wii, ma bi ɲɛ na ja Ezawu we can can na.» 22 A Yakuba di fulo wu to Ishaaga na, a wu wu taala taala na jo: «Mujuu le kunni wa Yakuba wuu, ga keye ye di ɲɛ Ezawu woyo.» 23 Wu ya ta wu cɛ wɛ, bani wu keye yi bi tɔ ba wu ɲahafɔɔ Ezawu woyo yi ɲɛ wɛ. Sani wu duba wu pye wu mu ge, 24 a wu wu pye: «Nɛ ja Ezawu yɛ pile pile mu ya sii ya?» A Yakuba di wu ɲɔ shɔ na: «Uun, were nɛ ɲɛ.» 25 A Ishaaga di wu pye: «Na ja, pa yalige ki yereŋɛ na tàan, di lozogo xaara ti xa, kɔnhɔ di duba pye ma mu.» A Yakuba di yalige ki kan wu mu. A wu li. A wu ba ni duvɛn wu bɛ ni wu mu, a wu gba.
26 Lee kadugo na a wu to wu wu pye: «Na ja, ayiwa, fulo na na mʼa na ɲɔ sɔn!» 27 A Yakuba di fulo wu na na wu ɲɔ sɔn. A wu to Ishaaga di wu fàya yi nugo ki logo, na duba* pye wu mu le pyegana le na na:
«Tɛhɛnɛ Baa Kilɛ ya wu duba wu tirige faa ɲiŋɛ kemu na ge,
kee nugo ni nɛ ja wu nugo bɛɛri ki ɲɛ nigin.
28 Kilɛ wu fugba mɛŋɛ ni ɲiŋɛ ki taceŋɛ kan ma mu,
wu ma pye shinma niɲɛhɛmɛ ni duvɛn niɲɛhɛmɛ tavɔɔ.
29 Shi wu da labye pyi ma mu,
shi wu da nuguro sinni ma fɛɛ ni.
Mʼa bye ma ceboronamaa ɲuŋɔfɔɔ.
Namaa piimu pu wa ma nu sii li ni ge,
pee di da nuguro sinni ma fɛɛ ni.
Wa bu ma laŋi, weefɔɔ wu laŋi.
Wa bu duba pye ma mu,
weefɔɔ wu pye duba fɔɔ*.»
30 Ba Ishaaga ya duba wu pye Yakuba mu wɛ, a Yakuba di foro. Wʼa foro yɛ mɛ, a wu ɲahafɔɔ Ezawu di nɔ jé, na yìri sige ki taɲaraga ni. 31 A Ezawu bɛ di xaara ta kemɛ shɔhɔ, na shɛ ni ti ni wu to wu mu. Na wu pye: «Na to, yìri mʼa ma ja wu sige xaara ti xa, kɔnhɔ mʼa duba pye na mu.» 32 A wu to Ishaaga wu wu pye: «Mu jɔgɔ wɛ?» A wu wu ɲɔ shɔ na: «Nɛ Ezawu wi, ma jalɛ we.» 33 A Ishaaga di sii cɛlɛ xuuni na jo: «Wekɛ dʼa shɛ sige ki ɲaari, na xaara ti sha na pa nɛ kan wɛ? Nɛ li na xɔ na mu ta mu sanha ba wɛ. Nɛ duba wu pye weefɔɔ mu, weefɔɔ di na wu ta bɛ.» 34 Ba Ezawu ya wu to wu jomɔ pu logo wɛ, a wu ɲatanhaŋa wo di sii mujugbɔɔ la wá, na wuyɛ tirige, na wu to wu kemɛ ɲɛɛri na: «Na to, duba pye na bɛ mu gɛ!» 35 A Ishaaga di wu ɲɔ shɔ na: «Ma cuun wʼa pa ni naŋmahara ni, duba we nɛ bi da bye mu mu ge, na ba wee círi shɔ.» 36 A Ezawu di jo: «Pʼa sii wu mɛgɛ cɛ, na ki le Yakubaa. Wʼa nɛ ŋmahana fo tɔɔɲii shuun. Wʼa fɛnhɛ na lɛgɛ kuduun shɔ na na, nimɛ bɛ na na duba círi shɔ na na.»* Ta mu ya ta duba yafiin bɛ yaha nɛ mu-i ya?
37 A Ishaaga di wu ɲɔ shɔ na: «Nɛ wu pye ma kafɔɔ, na wu cebooloo pu bɛɛri pye wu kapyebyii, na guri na shinma ni duvɛn fɛɛrɛ kan wu mu. Ayiwa, nɛ ma lekɛ pye mu mu wɛ, na ja?» 38 A Ezawu di wu to wu pye: «Ta wee duba wu yɛ nigin pe wu ɲɛ mu ya, na to? Duba pye na bɛ mu gɛ, na to!» A wu ɲɔ kɔn na mɛɛgɛ suu.
39 A wu to Ishaaga di wu ɲɔ shɔ na:
«Ma tatɛɛngɛ ki na ba lii ɲiŋɛ nijeŋɛ na,
kʼa da ba mɛŋɛ bɛ taa na yìri fugba wu ni wɛ.
40 Ma na ba ma ɲɔlige taa ma ŋmɔpara li ni,
na bye ma cuun wu wo bulo.
Ga ma ba se ɲaha na kapyeŋɛɛ ni,
ma na ba wu zhu wu kɛgi na wolo ma katige ki ni.»
Yakuba ya paa laha Ezawu tàan
41 Ayiwa, Ishaaga ya duba wemu pye Yakuba mu ge, a wee duba we kaa di Yakuba tɔn pɛn Ezawu mu. A Ezawu di jo wuyɛ funŋɔ ni na: «Nɛ to wu Kilɛ caŋa wʼa lii nige wɛ. Wu ga bye wu ɲɛ wɛ, nɛ da na cuun Yakuba gbo.» 42 A wa di shɛ Erebeka jashiimɛ Ezawu kafila wu jo wu nu Erebeka wu mu. A nufɔɔ wu wu ja shuun wo Yakuba wu yiri, na wu pye: «Ma ɲahafɔɔ Ezawu wʼa ma shaa di gbo wu wuu li footɔnɔ. 43 Nimɛ yemu nʼa da jo ma mu ge, yee logo! Yìri mʼa baa shɛ Karan kulo li ni na ɲahafɔɔ Laban kaban. 44 Mʼa shɛ tuun wa pye wà fo la ba foro ma ɲahafɔɔ wu loyire li ni. 45 Ma ɲahafɔɔ wu luu li ba sinnɛ, lemu mʼa pye wu na ge, wu funŋɔ ba wɔ lee na, nɛ na tuduro tun ma mu mʼa guri pa. Na funŋɔ wa di buun yi shuun wu bɛɛri ni caŋa nigin wɛ.»
46 A Erebeka di Ishaaga pye: «Xhɛti shi shɛɛn pushaa pʼa sii nɛ kanha xuuni fo na koŋɔ la wolo nɛ na. Yakuba bu ke fiige ke wo poro wa leŋɛ ba pii ɲɛ wɛ, Xhɛti shi shɛɛn pu wo poro wa kunni, ta ɲuŋɔ na bye nɛ wo ɲiifɛɛrɛ ti na?»