Ishaaga ni Abimɛlɛki wo keree
26
Ayiwa, xuugo ka ya pa jé fiige ki ni, kee bɛ ya pye ki yɛ ni Ibirayima wo tuun wu wogo ki ni. A Ishaaga di gari Gerari kulo li ni, Filisiti shɛɛn wo saan Abimɛlɛki mu. 2 A Tɛhɛnɛ Baa Kilɛ di ba wuyɛ shɛ Ishaaga na, na wu pye: «Ma ganha bu shɛ Misira fiige ki ni wɛ, ga fiige kemu nʼa da zhɛɛ ma na ge, kee ni ma da diin. 3 Tiin naha ke fiige ke ni, nɛ na bye ni ma ni, na baraga le ma ni. Bani mu ni ma tirige shɛɛn pu mu nʼa da ba ye fiiye ye bɛɛri kan. Ɲɔmɛɛ lemu nɛ lɔ ma to Ibirayima wu mu ge, nɛ na ba lee ɲɔ fa lee funŋɔ ni. 4 Nɛ na ba ma tirige shɛɛn pu ɲɛhɛ ba fugba wɔrɔɔ ki ɲɛ wɛ, na ye fiiye ye bɛɛri kan pu mu. Ɲiŋɛ ke wo shi we bɛɛri na ba baraga ta ma tirige shɛɛn pu gbɔɔrɔ ni. 5 Bani Ibirayima ya nɛ ɲɔmɛɛ co, na na saliya we ni na kodorogoo kee ni na ɲɔmɛjogoo ki bɛɛri mara.» 6 A Ishaaga di gori Gerari ni.7 Ba wee xuu wu shɛɛn pʼa pa wu yege wu shɔ wu ɲɛɛrɛ wɛ, a wu jo: «Nɛ ceboroshɔ wu ɲɛ wii!» Wu bi gbara wu jo na wee shɔ wu ɲɛ wii wɛ, bani wu bi fyagi na wee xuu wu shɛɛn ganha bu da wu gbo cee wu fɛni wɛ, bani Erebeka bi sii ɲɔ.
8 A Ishaaga di mɔ wà Gerari ni. Caŋa ka, na saannaa Abimɛlɛki yaha wu kaban, Filisiti shɛɛn wo saan we, a wu ba wii fɛnɛtiri ni, na Ishaaga ɲa wu na xɔnhɔrɔ pyi ni wu shɔ Erebeka ni. 9 A Abimɛlɛki di Ishaaga yiri na wu pye: «Nakaara baa mu shɔ wu ɲɛ we! Ɲaha na ma dʼa jo na ma ceboroshɔ wu ɲɛ wii wɛ?» A Ishaaga di wu ɲɔ shɔ na: «Nɛ yee jo, bani nɛ bi fyagi jo pu ganha ba na gbo wu fɛni wɛ.» 10 A Abimɛlɛki di jo: «Ɲaha wuu ma dʼa pye mɛ wù na wɛ? Jɛɛrɛ yɛ kaa lʼa fɔ ke fiige ke wo sipya wa di sinnɛ ni ma shɔ wu ni. Go nahama ni mu bi da wèe le mɛ!»
11 Wee tuun wu ni a Abimɛlɛki di te tuduro te kan sipyii pu bɛɛri mu na: «Sipyaa sipya wʼa kpɔn we ná we, kelee wu shɔ wu na ge, weefɔɔ na gbo.»
12 Ayiwa, a Ishaaga di ba ɲiŋmɔhɔ tun lee yee le, a ɲiŋmɔhɔ kʼi sii taan wu na fo xuuni, bani Tɛhɛnɛ Baa Kilɛ bi baraga le wu ni. Lemu wʼa nugi ge, a wu lee tɛhɛɛ xhuu nigin ta.
Filisiti shɛɛn pʼa yogo kɔn Ishaaga na wu keeye ya fɛni
13 A wu naafuu ta, a la di ganha na faraa wu naafuu wu na fo wʼa pye naafuugbɔ fɔɔ. 14 Dubyagbaya ni sikagbaya ni niiyɛ kashɔyɔ bye Ishaaga mu, na fara kapyebyii niɲɛhɛmɛɛ bɛ na. Lee na, a wu ɲɛpɛɛn di jé Filisiti shɛɛn pu ni.
15 Ayiwa Ishaaga to Ibirayima wo kapyebyii pʼa bi keeye yemu bɛɛri tugi Ibirayima wo caŋa ɲii li ni ge, a Filisiti shɛɛn di yee keeye yi bɛɛri gbere ni puuro ni. 16 Lee kadugo na a Abimɛlɛki di Ishaaga pye: «Yìri laha wù tàan, bani fanha wa nimɛ mu ni na toro wèe tàan.»
17 A Ishaaga di yìri laha wee xuu wu ni, na shɛ wu buguro ti sin Gerari logoro li ni, na diin wà. 18 Wu to Ibirayima wʼa bi keeye yemu tugi wu wo caŋa ɲii li ni, a Filisiti shɛɛn pʼi ba yi gbere wu nixhugo na ge, a Ishaaga di guri yee wo puuro ti wolo sanha. Wu to wʼa bi mɛyɛ yemu le yi na ge, a wu yee ninuyɔ le yi na.
19 Caŋa ka, Ishaaga wo kapyebyii pʼa pa keeŋɛ ka tugi logoro li ni, na lobulowii nizaana la ta wà. 20 Ga a Gerari wo yatɔɔnahamaa pʼi yogo kɔn Ishaaga wuu pu na, na jo: «Wèe wogo ki ɲɛ ke lɔhɔ ke». A Ishaaga di kee keeŋɛ ki mɛgɛ le na Esɛkia, bani pʼa yogo kɔn wu na wake. 21 A Ishaaga wo kapyebyii pʼi ba keeŋɛ kabɛtii tugi, a pʼi yogo kɔn sanha wu na kee bɛ fɛni, a wu kee mɛgɛ le na Sitinab. 22 A wu yìri laha wee xuu wu ni, na shɛ keeŋɛ kabɛtii bɛ tugi, ga wa shishiin ya ta yogo kɔn wu na kee fɛni wɛ. A wu kee mɛgɛ le na Erebotic. Bani wu bi jo na: «Nimɛ Tɛhɛnɛ Baa Kilɛ ya tifahama kan wèe mu, wù keŋɛ yara li na ba bugo fiige ki ni».
23 A Ishaaga di ba yìri wee xuu wu ni, na gari Bɛɛrisheba ni. 24 Na wu yaha wà, a Tɛhɛnɛ Baa Kilɛ di ba wuyɛ shɛ wu na caŋa ka piige ni na jo:
«Nɛ ɲɛ ma to Ibirayima wo Kilɛ we.
Ma ganha bu fya wɛ, bani nɛ ɲɛ ni ma ni.
Nɛ na ba baraga le ma ni
na ma tirige shɛɛn pu ɲɛhɛ
na bulona Ibirayima wuu na.»
25 A Ishaaga di saraga tawologo ka yereŋɛ wee xuu wu ni, na Kilɛ pɛlɛ wà na wu mɛgɛ yiri na, Tɛhɛnɛ Baa Kilɛ. A wu wu fàya puga ki sin wà, a wu kapyebyii pʼi keeŋɛ ka bɛ tugi wà.
Ishaaga yʼa ɲɔmɛɛ lɔ Abimɛlɛki mu
26 Ayiwa, caŋa ka, a Abimɛlɛki ni wu naɲii Awuzati, ni wu kashɛn keŋɛ ki ɲuŋɔfɔɔ Pikoli di ba yìri Gerari ni, na shɛ foro Ishaaga na. 27 A Ishaaga di pu pye na: «Ɲaha fɛni yi dʼa pa foro na na wɛ? Ta yee ya nɛ kɔ, na na kɔri laha yiyɛ tàan wɛ?» 28 A pʼi wu ɲɔ shɔ na: «Wèe ya li ɲa see na, na Tɛhɛnɛ Baa Kilɛ wa ni mu ni. A wèe di wùyɛ funŋɔ kɔn na jo, wèe ni mu ni, wèe ya yaa na kàa, na ɲɔmɛɛ lɔ wùyɛ mu. Pa wù ba ɲɔmɛɛ lɔ wùyɛ mu. 29 Wèe ya li shaa ma mu jo ma kàa na mu wa da ga kakuunɔ pye wèe na wɛ, bani wèe ya yafiin bɛ pye ma na wɛ, fo saama, na nɔhɔ ma yaha kari ɲaɲiŋɛ na. Wii, Tɛhɛnɛ Baa Kilɛ wo baraga pya mu ɲɛ». 30 A Ishaaga di yalige nijeŋɛ kan pu mu, a pʼi li, na gba. 31 Kee caŋa ki ɲimuguro a pʼi soo yìri, na gàa puyɛ mu. Lee kadugo na a Ishaaga di koo kan pu mu, a pʼi gari ɲaɲiŋɛ na.
32 Kee caŋa ki ninuŋɔ Ishaaga wo kapyebyii pʼa pa pu wo keeŋɛ ki fiin jo wu mu, kee kemu pʼa bi duri ge. A pʼi ba wu pye na: «Wèe ya lɔhɔ ta.» 33 A Ishaaga di ki mɛgɛ le na Sheba, lee kɔ́ri ɲɛ na kàa. Lee na, fo na pa nɔ ba niɲaa ɲɛ wɛ, lee kulo li mɛgɛ ya le na Bɛɛrisheba (kaaga wo keeŋɛ ke).
Ezawu ya cèe leŋɛ
34 Ayiwa, na Ezawu shi wu yaha yee kɛlɛɛ shishɛɛrɛ (40) na, a wu Xhɛti shi shɛɛn Beeri poro Zhuditi, ni Xhɛti shi shɛɛn Elɔn poro Basimati leŋɛ. 35 A pee cèe shuun wu keree di Ishaaga ni Erebeka zɔ tɔɔri fo xuuni.