Ibirayima shɔ Ketura wo nagoo pee
25
Ayiwa, a Ibirayima di cee watii leŋɛ. Wee mɛgɛ ɲɛ na Ketura. 2 A wee di jalaa pii se wu mu, pee ɲɛ: Zimurani, Yokishan, Medani, Majan, Yishibaki ni Shuwa. 3 A Yokishan di Seba ni Dedan se. A Dedan wo tirige shɛɛn pʼi bye Ashuri shi shɛɛn pee, ni Letushi shi shɛɛn pee, ni Leyumimu shi shɛɛn pee. 4 Majan wo jalaa pu bye Efa, ni Efɛri, ni Henɔki, ni Abida, ni Elida. Pee bɛɛri pu bye Ketura wo tirige shɛɛn.5 A Ibirayima di wu keŋɛ yaŋmuyɔ yi bɛɛri kan Ishaaga mu. 6 Wu cèe pusamaa wo jalaa pu pi ge, a wu yaŋmuyɔ ya kan pee bɛ mu. Ga na wu yaha wu ɲiifɛɛrɛ ti ni, a wu pee jalaa pu yaha kari Kilɛ-nɔhɔ fiige ka ni na pu sanha lii wu ja Ishaaga na.
Ibirayima xu keree
7 Ibirayima ya shi wemu ta ge, wee ya pye yee xhuu nigin ni kɛlɛɛ gbarashuun ni kaguro (175), 8 a wu na xu. Kilɛ ya wu kan lɛgɛ, na wu kan loɲinɛ, wu shi caŋa ɲɛhɛɛ ki cavaŋa, a wu binnɛ ni wu sefɛlɛɛ pu ni. 9 A wu jalaa Ishaaga ni Isimayɛli di wu le Makipela faaga wege ki ni, Xhɛti* shi shɛɛn Zokari ja Efurɔn wo tɛgɛ ki ni Mamure kulo li ɲahatiimɛ pu ni. 10 Kee tɛgɛ ke Ibirayima bi shɔ Xhɛti shi shɛɛn pu mu. Wà pʼa Ibirayima ni wu shɔ Sara nixhuyo yi le.
11 Ba Ibirayima ya xu wɛ, a Kilɛ di duba wu ja Ishaaga mu. Laxayi-Ɔrɔyi * keeŋɛ ki ɲɔ na Ishaaga bi tiin.
Isimayɛli wo tirige shɛɛn pee
12 Ayiwa, pii pʼa pye Ibirayima ja Isimayɛli wo tirige shɛɛn pee. Ibirayima bi wee ja wu se wu shɔ Sara wo bulozhɔ Agari na, Misira fiige shɛn we. 13 Isimayɛli wo jalaa pu mɛyɛ yi wa ye. Yee mɛyɛ ye wa ka na saha ni pu lɛgɛ ki ni: Jashiimɛ wu bye Nebayɔti, na Kedari taha wà, ni Adibɛli, ni Mibisamu, 14 ni Mishema, ni Duma, ni Masa, 15 ni Adadi, ni Tema, ni Yeturi, ni Nafishi, ni Kedima. 16 Pii pʼa pye Isimayɛli wo jalaa kɛ ni shuun we. Wa bɛɛri wʼa pye gbawege ka wo ɲuŋɔfɔɔ. Kulogoo kiimu ni pu bi tiin ge, ni buguro temu na pu bi tiin ge, a pʼi pu mɛyɛ le kee kulogoo kee ni tee buguro ti na. 17 Isimayɛli ya shi wemu ta ge, wee ya pye yee xhuu nigin ni kɛlɛɛ taanri ni gbarashuun (137). A wu fɔ, na shɛ binnɛ ni wu sefɛlɛɛ pu ni. 18 Ma lɔ Xhavila koomɔ pu na fo na shɛ nɔ Shuri wo siwaga ki na, wee xuu wu ni wu tirige shɛɛn pu bi tiin. Wee xuu wu wa Misira fiige ki kabanugo Asiri fiige ki shizhaa wu na. Bɛganhara ti bye pu ni pu tiinɲii bɛɛri tɛ ni.
Ezawu ni Yakuba keree
19 Ayiwa, pii pʼa pye Ibirayima ja Ishaaga wo tirige shɛɛn pee: Ibirayima wʼa Ishaaga se. 20 Ishaaga shi wu bye yee kɛlɛɛ shishɛɛrɛ (40) tuun wemu ni wʼa Erebeka leŋɛ ge. Erebeka bi bye Aramu shɛɛn Betuwɛli poro Padani-Aramu wo mura ni, na ɲɛ Aramu shɛɛn Laban wo ceboroshɔ. 21 Erebeka bi bye seganha, a Ishaaga di Tɛhɛnɛ Baa Kilɛ ɲɛɛri wu mu. A Tɛhɛnɛ Baa Kilɛ di wu ɲɛrɛgɛ ki logo, a wu shɔ Erebeka wu yere yacɛrɛ na. 22 Ga, a nɔhɔpiire tʼi ganha na tiyɛ guugaani nufɔɔ wu funŋɔ ni. A wu jo: «Ni li ɲɛ mu, na laa kalɔɔ ɲuŋɔ?» A wu gari na shɛ Tɛhɛnɛ Baa Kilɛ yege lee na. 23 A Kafɔɔ di wu pye:
«Shi tɛhɛɛ shuun wu ɲɛ mu funŋɔ ni.
Shi tɛhɛɛ shuun mu da ba se,
pʼa waagi laha puyɛ na.
Shi wa fanha na ba ɲɛhɛ wa wogo na.
Lɛgɛ fɔɔ wu na ba bye cuunvɔɔ wu wo kapyebye*.»
24 Ba Erebeka tigiduun ya pa nɔ wɛ, a lʼi da nago ŋmamaa yacɛrɛ li bye wu mu. 25 Nizhiimɛ wu wʼa foro ge, wee bi ɲaaŋa, wu ceesɛɛgɛ ki bɛɛri dʼa tɔ ba shiire fadeŋɛ ɲɛ wɛ. A pʼi wee mɛgɛ le na Ezawua. 26 Lee kadugo na a cuunvɔɔ wu foro, wu nivorogo dʼa Ezawu co wu ɲidavenɛ le na. A pʼi wee mɛgɛ le na Yakubab. Pu seduun wʼa Ishaaga shi wu ta yee kɛlɛɛ gbaara (60).
27 A nɔhɔpiire tʼi ganha na lɛgi. A Ezawu di bye lozo kabesinnɛ wo. Siɲaana li bi dan wu ni. A Yakuba di bye sipya wemu wʼa fuunnɔ ge, wee bi goroo deeye ni fàya piyɛyɛ yi ni. 28 Sige xaara ti bi dan Ishaaga ni, lee funŋɔ ni a Ezawu kaa di daan wee mu. A Yakuba kaa di daan Erebeka mu.
Ezawu ya wu lɛgɛ kuduun wu pɛrɛ
29 Caŋa ka Yakuba ya pa caa taha. A Ezawu di ba yìri sige ki ni na nɔ, wu dʼa sii kanha. 30 A wu Yakuba pye: «We caaɲɛ we wa kan na mu di lii, bani nʼa kanha.» Lee wuu na pʼa Ezawu pyi na Edomuc. 31 A Yakuba di wu pye: «Fɛnhɛ ma lɛgɛ kuduun wu pɛrɛ na mu niɲaa.» 32 A Ezawu di wu ɲɔ shɔ na: «Nɛ wii nɛ na taxuyo shaa xuugo keŋɛ ni, ɲaha lɛgɛ kuduun di wa da ɲɔ nɛ na wɛ?» 33 A Yakuba di nɔhɔ jo: «Fɛnhɛ kàa na mu.» A Ezawu di gàa, na wu lɛgɛ kuduun wu pɛrɛ Yakuba mu. 34 Lee kadugo na a Yakuba di na buuri ni caa wa kan Ezawu mu. A wu li na gba, na yìri kari. Wee cogo wu na Ezawu ya shɔɔgɔ shan wu lɛgɛ kuduun wu na.