Ishaaga shɔ Erebeka keree
24
Ayiwa, Ibirayima bi sii lɛ fo xuuni, Tɛhɛnɛ Baa Kilɛ bi wu pye shi fɔɔ, na duba wu mu keree bɛɛri ni. 2 Bulo wemu caŋa kʼa mɔ Ibirayima mu na toro wu buloo pusamaa bɛɛri tàan ge, wee wemu wʼa bi wu keŋɛ yaŋmuyɔ yi bɛɛri keree shɔɔnri ge, a Ibirayima di ba wu yiri caŋa ka, na wu pye: «Pa ma keŋɛ ki taha na shii le na, 3 mʼa gàa fanha bɛ na Tɛhɛnɛ Baa Kilɛ na, fugba ni ɲiŋɛ ki Kafɔɔ we, na Kana shɛɛn piimu niŋɛ ni wèe wa tiinnɛ na ge, na mu wa da wee wa wo poro wa shishiin lɔ di gan nɛ ja wu mu wu shɔ wɛ. 4 Ga shɛ fo na to puga ki ni, mʼa shɛ cee wa lɔ wà na cebooloo pu mu ma pa gan na ja Ishaaga wu mu.»5 A bulo wu wu pye: «Cee wu bye wu di ya shɛ sɔɔ na taha nɛ na na pa ke fiige ke ni-i do? Di guri ba ma ja wu lɔ zhɛ ma to kulo li ni gɛ?»
6 A Ibirayima di wu pye: «Ma ganha bu da guri zhɛ ni na ja wu ni na to kulo li ni bada wɛ! 7 Tɛhɛnɛ Baa Kilɛ, fugba Kilɛ we, wee wemu wʼa nɛ yeege na to puga ki ni ge, na fiige ki ni ge, na gaa nɛ mu, na jo na wee na ba ke fiige ke kan nɛ kadugo shi nibama wu mu ge, weeyɛ pyaa na ba wu mɛlɛkɛ wu tun ma ɲaha na, mʼa shɛ cee lɔ wà na pa gan nɛ ja wu mu. 8 Cee wu bye wu di ya shɛ sɔɔ na taha ma na na pa wɛ, wee tuun wu ni, nʼa ma pye mʼa kaaga kemu kàa na mu ge, ma na zhɔ kee na. Ga ma kunni ganha bu shɛ ni na ja wu ni wà wɛ.» 9 A bulo wu wu keŋɛ ki taha wu kafɔɔ Ibirayima wu shii li na, na gaa wu mu kee keree ki na.
10 A bulo wu ɲɔhɔyɔ kɛ co Ibirayima wo ɲɔhɔyɔ yi ni, na wu kafɔɔ wu keŋɛ yaŋmuyɔ yi bɛɛri nijeye ya lɔ. A wu gari Mezopotami fiige ki ni, na shɛ nɔ Nakɔri kulo li ni. 11 Ba wʼa nɔ wà wɛ, na wu ɲɔhɔyɔ yi pye yʼa nuguro sin kanha ki kadugo, keeŋɛ ka ɲɔ na, yakoŋɔ ki ni, wee tuun wu ni cèe pu ma fòro na pu lɔhɔ kori. 12 A wu jo: «Tɛhɛnɛ Baa Kilɛ, na kafɔɔ Ibirayima wo Kilɛ we, nʼa ma ɲɛɛri jo ma le kaa le faha na mu niɲaa, mʼa ma saama pu pye na kafɔɔ Ibirayima wu mu. 13 Nɛ wʼi yere ke keeŋɛ ke tàan, kulo li pushaa pʼi wa ma di ba lɔhɔ ko. 14 Di ba doɲiŋɛ pushɔ wemu pye jo wu ɲɔ wuyɛ na wʼi wu lokoyaaga ki tirige di gba, a wee di nɛ pye na nɛ wu gba, na wee na ɲɔhɔyɔ yi bɛ gba, cee wemu ɲaha mʼa bulo ma bulona Ishaaga wu mu ge, wʼi da were. Lee na nʼa da ba li cɛ jo mʼa ma saama pu pye na kafɔɔ wu mu.»
15 Wʼa jo wʼa xɔ kee ɲɛrɛgɛ ki na ge, a Betuwɛli poro Erebeka di ɲaha yeege na ma ni wu lokoyaaga ni wu kapaŋa na. Betuwɛli bi bye Milika wo ja, Milika di ɲɛ Ibirayima ceborona Nakɔri wo shɔ. 16 Doɲiŋɛ pushɔ nacɛbaa wu bye wii, wu bi sii ɲɔ xuuni. Ná wa shishiin bi sanha sinnɛ ɲa ni wu ni wɛ. A wu nɔ keeŋɛ ki na, na wu lokoyaaga ki ɲi, na ki lɔ na gaaŋi. 17 A Ibirayima wo bulo wu baa pa wu ɲuŋɔ círi, na wu pye: «Ɲɔ mayɛ na mʼa lɔhɔ ka kan na mu di gba.» 18 A doɲiŋɛ fucɛri wu wu pye: «Pa gba na kafɔɔ!» A wu lɔhɔ ki tirige tɔvuyo na, ná wu mu wʼa gba. 19 Ba ná wʼa gba xɔ wɛ, a doɲiŋɛ fucɛri wu jo: «Nʼa da lɔhɔ ka yeege di gan ma ɲɔhɔyɔ yi bɛ mu yʼi gba.» 20 A wu lokoyaaga ki wo lɔhɔ ki kaaŋa tɔvuyo na na le logbakɔrɔ li ni, na baa kari keeŋɛ ki na lɔhɔ ka fɛni. A wu ɲɔhɔyɔ yi bɛɛri kan yʼa gba.
21 A ná wu cari wuyɛ na, na kasɛɛgɛ shan wu na, na wu wii Tɛhɛnɛ Baa Kilɛ bu da na da wu kaɲara ɲɔ. 22 Ba ɲɔhɔyɔ yʼa gba xɔ wɛ, sanni tɔɔrɔ temu tʼa leni munaa ni ge, a ná wu tee ta yeege, ti giramaa gbaara, ni sanni kaŋmegee shuun kee wo tidugumɔ pu ɲɛ sanni giramaa xhuu nigin ni kɛ (110). 23 A wu jo: «Jɔgɔ poro mu di ɲɛ wɛ? Ɲɔ mayɛ na mʼa wu fɔɔ shɛ na na. Ta wèe na tashɔngɔ ta yee deeye ni?» 24 A doɲiŋɛ pushɔ wu jo: «Betuwɛli poro nɛ ɲɛ, Milika ja we, wʼa wemu se Nakɔri mu ge.» 25 A wu jo sanha na: «Shɔngɔ ɲà ni yapɔrɔyɔ yaligee niɲɛhɛŋɛɛ wa wèe mu. Tashɔngɔ bɛ wa wèe mu.»
26 Wee tuun wu ni, a ná wu nuguro sin, na Tɛhɛnɛ Baa Kilɛ pɛlɛ, 27 na jo: «Tɛhɛnɛ Baa Kilɛ wʼa sɔni, nɛ kafɔɔ Ibirayima wo Kilɛ we. Wu ya ta wu cemɛ pe ni wu ɲɔmɛɛ fɛɛrɛ ti sanha lii nɛ kafɔɔ wu na wɛ. Tɛhɛnɛ Baa Kilɛ ya nɛ ɲaha co na pa na kafɔɔ wu cebooloo pu puga ki ni.»
28 A doɲiŋɛ pushɔ wu baa kari na shɛ yee ɲaha jo wu nu wu puga shɛɛn pu mu. 29-30 Erebeka ɲahafɔɔ wa mɛgɛ ki bye na Laban. Ba wee ya munaa li wo tɔɔrɔ ti ɲa, na kaŋmegee ki bɛ ɲa wu cuun wu na wɛ, na nugo yi logo wu cuun Erebeka ɲɔ na na ye ni ye ná wʼa jo wɛ, a wee di baa kari na shɛ ná wu ɲuŋɔ círi keeŋɛ ki na. Wu niyerege ki bye wu ɲɔhɔyɔ yi tàan keeŋɛ ki na. 31 A Laban di wu pye: «Ta ma, Tɛhɛnɛ Baa Kilɛ wo duba pya we! Ɲaha na ma da kori wà kpɛɛngɛ ki na wɛ? Nɛ puga ka gbegele xɔ mu mu, na ɲɔhɔyɔ yi bɛ wo tasinnɛgɛ ki yàa.»
32 A ná wu jé puga ki ni. A Laban di ɲɔhɔyɔ yi wo tuguro ti tirige, na ɲà ni yaligee kan yi mu. A pʼi lɔhɔ kan ná wu ni wu kaafɛɛ pu mu kɔnhɔ pʼi pu tɔɔyɔ je. 33 Lee kadugo na, a pʼi yalige kan pu mu. Ga a ná wu jo: «Ni nɛ ya na kaɲara jo wɛ, nɛ da ga li wɛ.» A Laban di jo: «Li jo.»
34 A ná wu jo: «Nɛ ɲɛ Ibirayima wo bulo. 35 Tɛhɛnɛ Baa Kilɛ ya duba nɛ kafɔɔ wu mu fo xuuni, a wu sii pye yara fɔɔ. Wʼa niiyɛ ni yatɔɔbya kan wu mu, ni warifyɛn ni sanni, ni kapyebyii, pu cèe ni pu namaa, ni ɲɔhɔyɔ ni kafaya. 36 Nɛ kafɔɔ wu shɔ Sara wu ni wu lɛgɛ ki ni, wʼa ja se nɛ kafɔɔ wu mu. A nɛ kafɔɔ wu wu keŋɛ yaŋmuyɔ yi bɛɛri kan wee mu. 37 Nɛ kafɔɔ wʼa nɛ karamu na nɛ pye nɛ kàa, na jo na Kana shɛɛn piimu niŋɛ ni wèe wa tiinnɛ na ge, na nɛ ganha bu wee wa wo poro wa shishiin lɔ di gan wu ja wu mu wu shɔ wɛ. 38 Ga na nɛ wu shɛ wee to kulo li ni, di shɛ cee wa lɔ wu cebooloo pu mu wu ja wu mu. 39 A nɛ na kafɔɔ wu pye jo cee wu bye wu di ya sɔɔ na taha nɛ fɛni na pa-ɛ do? 40 A wu nɛ pye na Tɛhɛnɛ Baa Kilɛ wemu wo koo wee ya ɲaari ge, wee na ba wu mɛlɛkɛ wa tun nɛ ɲaha na, wee na shɛ na kaɲara li ɲaha shɔɔnri, di ma shɛ cee wa lɔ wu ja wu mu wu wo gbawege ki ni, wu to puga ki ni. 41 Na nɛ bu já shɛ xɔ wee wo topuga ki ni, ali na pu ɲɛhɛ bye pu ya sɔɔ na cee kan nɛ mu wɛ, na nɛ na zhɔ wee wo kaaga ke ni wee wo laŋi wu na».
42 «Ayiwa, ba nɛ nɔ keeŋɛ ki na niɲaa wɛ, na jo: ‹Tɛhɛnɛ Baa Kilɛ, na kafɔɔ Ibirayima wo Kilɛ we, ma bu da mʼa sɔɔ na kaɲara lʼi ɲɔ. 43 Ke keeŋɛ ke tàan di wa yere ge, doɲiŋɛ pushɔ wemu bu ba lɔhɔ ko, a nɛ wu ɲɛɛri jo wu na kan di gba wu lokogo ki ni, 44 a wu na pye: “Pa gba, ma bu xhɔ, di ka yeege di gan ma ɲɔhɔyɔ yi bɛ mu.” Wee di bye Tɛhɛnɛ Baa Kilɛ wo ɲidaan wo we wʼa wemu ɲaha bulo nɛ kafɔɔ wu ja wu mu ge.› 45 Na pee jomɔ pu yaha nɛ ɲɔ na, a Erebeka di ɲaha yeege ni wu lokoyaaga ni wu kapaŋa na. A wu ba dugi keeŋɛ ki na, na wu lokoyaaga ki ɲi. A nɛ wu ɲɛɛri jo wu wu lokogo ka kan na mu di gba. 46 A wu lɔhɔ yaaga ki tirige tɔvuyo na, na jo: ‹Pa gba, ma bu xhɔ di ka yeege gan ɲɔhɔyɔ yi bɛ mu.› A nɛ gba, a wu ka yeege kan ɲɔhɔyɔ yi bɛ mu yʼa gba. 47 A nɛ wu yege jo jɔgɔ wo poro wu di ɲɛ wɛ? A wu nɛ pye: ‹Betuwɛli poro nɛ ɲɛ, Nakɔri ja we, Milika ya wemu se wu mu ge.› Wee tuun wu ni a nɛ le tuunɔ le le wu munaa li ni, na kii kaŋmegee kii le wu keye yi na. 48 Ba lee ya pye wɛ, a nɛ nuguro sin, na Tɛhɛnɛ Baa Kilɛ pɛlɛ. A nɛ Tɛhɛnɛ Baa Kilɛ sɔ, na kafɔɔ Ibirayima wo Kilɛ we, wee wemu wʼa nɛ ɲaha co can na, na nɛ le kozaana ni ge, kɔnhɔ nɛ ba na kafɔɔ wu wo ceborona poro fucɛɛrɛ lɔ di zhɛ gan wu ja wu mu. 49 Ayiwa, yi bu da yi na da yi wo saama pe ni yi wo ɲɔmɛɛ fɛɛrɛ ti shɛ na kafɔɔ wu na, yi yee jo na mu. Yi shiin bu da yi wa da lee pye wɛ, yi yee bɛ jo na mu di shɛ kanige kelee kamɛnɛ.»
50 A Laban ni Betuwɛli di jo: «Le kaa le, Tɛhɛnɛ Baa Kilɛ ni le ya yìri. Wèe da já kayesaaya kelee kayekuuyo ya shishiin jo mu mu wɛ. 51 Erebeka wu we, wu lɔ mʼa se wu shɛ bye ma kafɔɔ wu ja shɔ, ma na jo ba Tɛhɛnɛ Baa Kilɛ ya yi jo wɛ.» 52 Ba Ibirayima wo bulo wʼa pee jomɔ pu logo wɛ, na nuguro sin Tɛhɛnɛ Baa Kilɛ ɲaha tàan.
53 Lee kadugo na a bulo wu warifyɛn yalere ni sanni yalere ni fàya kan Erebeka mu. A wu naafuugbɔ yaŋmuyɔ ya kan cee wu ɲahafɔɔ ni wu nu wu bɛ mu. 54 Lee kadugo na a wu ni wu kaafɛɛ pʼi li, na gba, na shɔn wà.
Ba pʼa pa yìri ɲisɔɔgɔ ki na wɛ, a kapyebye wu jo: «Yi koo li kan na mu di guri da se na kafɔɔ wu yíri.» 55 A cee wu ɲahafɔɔ ni wu nu wu jo: «Cee wu yaha wu jɛɛrɛ la bɛ pye ni wù ni, cabyaa kɛ shishiin, lee kadugo na yi na yʼa gaaŋi.» 56 A wu pu pye: «Yi ganha bu da na co yaha nige wɛ, Tɛhɛnɛ Baa Kilɛ ya nɛ kaɲara li ɲɔ xɔ. Yi na yaha di da se na kafɔɔ wu kaban.»
57 Ayiwa, a pʼi jo: «Wù doɲiŋɛ fucɛri wu yiri wù logo wuyɛ pyaa ki ɲɔ na.» 58 Wee tuun wu ni a pʼi Erebeka yiri, na wu pye: «Ta ma na gbara mʼa binnɛ mʼa gaaŋi ni we ná we ni?» A wu jo: «Uun.»
59 A pʼi pu ceboroshɔ Erebeka ni wu biivɔɔ wu yaha kari ni Ibirayima wo bulo we, ni wu kaafɛɛ pu ni. 60 A pʼi duba pye Erebeka mu na jo:
«Wù ceboroshɔ we,
Kilɛ wu ma pye sipyii kabɔfoŋɔɔ niɲɛhɛŋɛɛ nu!
Kilɛ wu ma tirige shɛɛn pu pye
ma pɛɛn pu wo ɲuŋɔfɛɛ.»
61 A Erebeka ni wu wo kapyebyezhaa pʼi dugi ɲɔhɔyɔ yi na, na daha Ibirayima wo bulona wu na. A pu bɛɛri di binnɛ kari.
62 Lee bi Ishaaga ta wʼa yìri laha Laxayi-Ɔrɔyi keeŋɛ ki ɲɔ na, na shɛ diin Kana fiige ki woroo kulo kacɛ ki na. 63 A wu ba foro caŋa ka yakoŋɔ, na gari di zhɛ ɲaari sige ki ni. A wu ba wu ɲuŋɔ yirige, na ɲɔhɔyɔ ɲa yi na ma. 64 Ba Erebeka bɛ ya pa wu ɲuŋɔ yirige na Ishaaga ɲa wɛ, a wu gɔn to ɲɔhɔŋɔ ki na, 65 na bulo wu pye: «Ná wekɛ wu ɲaari mɛ sige ke ni na ma di ba wèe ɲuŋɔ círi wɛ?» A bulo wu wu pye: «Nɛ kafɔɔ wu wa.» Wee tuun wu ni a Erebeka di wu kapadahaŋa lɔ, na ki buri wu ɲuŋɔ ni.
66 A bulo wu wu kapyegee ki bɛɛri paari Ishaaga mu. 67 A Ishaaga di Erebeka leŋɛ wu nu Sara wo fàya puga ki ni, na wu pye wu shɔ, a wu ganha na dan wu ni. A Ishaaga di loɲinɛ ta wu nu wu xhu wu na.