Sara xu ni wu le le keree
23
Ayiwa, yee xhuu nigin ni kɛlɛɛ shuun ni gbarashuun (127) Sara ya ta, kee kʼa pye Sara wo shi wu tɛhɛnɛ. 2 A Sara di xhu Kiriyati-Araba kulo li ni, lee ɲɛ Eburɔn kulo le, Kana fiige ki ni. A Ibirayima di kpɔn pu lea, na mɛɛ su wu nixhugo ki ɲuŋɔ ni. 3 Lee kadugo na a Ibirayima di yìri laha wu shɔ wu nixhugo ki tàan, na shɛ jo ni Xhɛti shi shɛɛn pu ni na: 4 «Nɛ ɲɛ nabun ni nadadiinmɛ yee tɛ ni. Yi yi ɲiŋɛ ki xuu wa pɛrɛ na mu, di na shɔ wu nixhugo ki le wà».* 5 A Xhɛti shi shɛɛn pʼi Ibirayima pye: 6 «Kafɔɔ, logo wù ɲɔ na, wèe ya mu wii Kilɛ wo sipyigbɔ wù tɛ ni. Faya yemu yi wa faya yi bɛɛri nijeye ge, shɛ ma shɔ wu nixhugo ki le wà. Wèe wa shishiin da ga mu kun wu faya ni wɛ».7 A Ibirayima di yìri, na shɛ nuguro sin Xhɛti shi shɛɛn pu tàan pee piimu pu bi tiin wà fiige ki ni ge. 8 A wu pu pye: «Ayiwa, ni yʼa sɔɔ na mu na di na shɔ wu ɲuŋɔ ŋmɔhɔ yi mu naha, wee tuun wu ni yi logo na ɲɔ na yʼi Zokari ja Efurɔn ɲɛɛri na mu, 9 kɔnhɔ wu Makipela wo faaga wege ki pɛrɛ na mu, wu wo faaga wege kemu ki ɲɛ wu kɛrɛyɛ yi tɛhɛnɛ li na ge. Na wu ki kan na mu ki pɛrɛmɛ yɛ pyaa pyaa na yi ɲaha tàan, kee na bye nɛ wo faya tɛgɛ yi tɛ ni».
10 Lee bi Xhɛti shi shɛn Efurɔn nidɛɛngɛ ta wà wu shi shɛɛn pu tɛ ni. A wu Ibirayima ɲɔ shɔ kulo li kuɲɔɔ li tiinvɛɛ pu bɛɛri ɲaha tàan na: 11 «Ahayi, na kafɔɔ, logo na ɲɔ na. Nʼa da tɛgɛ ke ni ki faaga wege ki bɛ kan ma mu na sipyiɲii pu ɲaha tàan, kɔnhɔ mʼa ma shɔ wu nixhugo ki le wà.»
12 A Ibirayima di wu nuguro sin sanha kee fiige ki sipyii pu ɲaha tàan, 13 na Efurɔn pye fiige ki sipyii pu bɛɛri ɲii na, na: «Nʼa ma ɲɛɛri, na jomɔ pu logo. Nʼa da tɛgɛ ki pɛrɛmɛ pu kan ma mu. Sɔɔ lee na, kɔnhɔ di na shɔ wu nixhugo ki le wà.» 14 A Efurɔn di Ibirayima pye: 15 «Na kafɔɔ, logo na ɲɔ na, tɛgɛ ki pɛrɛmɛ ɲɛ warifyɛn tuuyo xhuu shishɛɛrɛ (400).b Ga wee wari we ɲɛ ɲaha nɛ ni mu tɛ ni wɛ? Shɛ ma shɔ wu nixhugo ki le wà.» 16 A Ibirayima di sɔɔ Efurɔn jomɔ pu na. A wu tɛgɛ ki pɛrɛmɛ pu tɔrɔ kan wu mu, warifyɛn tuuyo xhuu shishɛɛrɛ (400), na saha ni wee tuun wu wo jagipyii pu wo tɔrɔmɔ pu ni. Kee wari ɲɔ ke wu bi jo wu shi shɛɛn pu ɲaha tàan.
17 Ayiwa, Efurɔn wo tɛgɛ kemu ki bye Makipela ni, Mamure Kilɛ-nɔhɔ ki na ge, ni faaga wege kemu ki bye tɛgɛ ki ni ge, na fara ki tiye bɛɛri na, yemu yi bi tɛgɛ ki maha ni yemu yi bye tɛgɛ ki ni ge, 18 a yee di ɲɛri pye Ibirayima woyo Xhɛti shi shɛɛn pu bɛɛri ɲaha tàan, pee piimu pu bye wà kulo li kuɲɔɔ li ɲɔ na ge. 19 Lee kadugo na a Ibirayima di wu shɔ Sara wu nixhugo ki le Makipela kɛrɛyɛ yi faaga wege ki ni, Mamure ɲahatiimɛ pu ni, Eburɔn kulo li ni, Kana fiige ki ni. 20 A kee tɛgɛ ki ni ki faaga wege ki bɛɛri di bye Ibirayima wogo. Wu bi ki shɔ Xhɛti shi shɛɛn pu mu na pye wu wo xuu taleŋɛ.