Kilɛ ya jo na Ibirayima wu Ishaaga wolo saraga wee mu
22
Kee keree kii kadugo na a Kilɛ di ba Ibirayima yiri, kɔnhɔ wu wu taanna wii. A wu jo: «Ibirayima yoo!» A Ibirayima di wu ɲɔ shɔ na: «Ooyi!» 2 A Kilɛ di wu pye: «Ma ja we, ma ja nigin pe we, wee wemu kaa lʼa dan ma ni ge, Ishaaga kunni, shɛ ni wu ni Morizha koomɔ pu ni. Boboŋɔ kemu nʼa da ba zhɛ ma na ge, mʼa ma ja wu pye wà saraga nizogoŋɔ na mu.»*3 Kee caŋa ki ɲimuguro ti na, a Ibirayima di sɔɔ yìri, na wu kafaŋa ki kemɛ pɔ, na saraga kajiiye ja, na yi taha kafaŋa ki na, na koo co. A wu buloo shuun wa lɔ na fara Ishaaga na. Kilɛ ya xuu wemu kaa jo wu mu ge, a wu koo li lɔ na gaaŋi wà. 4 Caŋa taanri wogo ki na, a Ibirayima di wu ɲuŋɔ yirige na boboŋɔ ki ɲa taliige ni. 5 A Ibirayima di wu kapyebyii shuun wu pye: «Yi tiin naha ni kafaŋa ki ni. Wʼà da zhɛ Kilɛ pɛlɛ mɛ nɛ ni pya we ni, wù na kuri pa.»
6 A Ibirayima di saraga kajiiye yi taha wu ja Ishaaga ɲuŋɔ ni, na na ni ŋmuu lɔ. A pu shuun wu binnɛ na gaaŋi. 7 A Ishaaga di wu to Ibirayima pye: «Baba.» A Ibirayima di wu ɲɔ shɔ na: «Ooyi, na ja.» A Ishaaga di jo: «Na ni kajiiye yi wa wèe mu, ga mii saraga dubyapige kʼi wa wɛ?» 8 A Ibirayima di wu ɲɔ shɔ: «Na ja, Kilɛ yɛ pyaa na ba yi ɲaha shɔɔnria.» A pu shuun wu ganha na gaaŋi.
9 Xuu wemu kaa Kilɛ bi jo ge, ba pʼa nɔ wà wɛ, a Ibirayima di saraga tawologo ka yàa, na kajiiye yi taha ki ɲuŋɔ ni, na Ishaaga pɔ, na wu taha yee kajiiye yi ɲuŋɔ ni.* 10 A Ibirayima di ŋmuu lɔ di wu ja wu kuun. 11 Ga, a Tɛhɛnɛ Baa Kilɛ wo mɛlɛkɛ wu diin fugba we ni, na Ibirayima yiri na: «Ibirayima, Ibirayima». A Ibirayima di wu ɲɔ shɔ na: «Ooyi.» 12 A mɛlɛkɛ wu jo: «Pya wu yaha! Ma ganha da yafiin bɛ pye wu na wɛ. Nɛ li cɛ nimɛ jo mʼa fyagi Kilɛ na. Ma ja we, ma ja nigin pe we, ma ya ta she wu gan ni nɛ mu wɛ.» 13 A Ibirayima di wu ɲuŋɔ yirige, na dubyapoo wa ɲa wu yeŋɛɛ na suri tahara la ni. A Ibirayima di shɛ wee dubyapoo wu co na pa bye saraga nizogoŋɔ wu ja wu tɛgɛ. 14 A Ibirayima di wee xuu wu mɛgɛ le na: «Tɛhɛnɛ Baa Kilɛ na ba yi ɲaha shɔɔnrib.» Lee na, fo na pa nɔ niɲaa na sipyii ya yu: «Wù bu nɔ Tɛhɛnɛ Baa Kilɛ wo faaboboŋɔ ki ɲuŋɔ ni, Kilɛ na yi ɲaha shɔɔnri.»
15 A Tɛhɛnɛ Baa Kilɛ wo mɛlɛkɛ wu diin fugba wu ni wà, na Ibirayima yiri sanha, 16 na wu pye: «Ma ja we, ma ja nigin pe we, mu ya ta she wu gan ni nɛ mu saraga wɛ. Lee na nʼa da gàa na mɛgɛ ki na, 17 jo nɛ na ba duba ma mu, ma kadugo shi nibama wu na ba ɲɛhɛ fugba wɔrɔɔ ni gba ɲɔ gbazhɛnhɛpya wu na. Ma kadugo shi wu na ba se ta wu pɛɛn na, fo na pu kulogoo ki kafɛɛrɛ pye. 18 Koŋɔ ke shi we bɛɛri na ba duba ta na foro mu shi wu ni, bani mu ya nɛ ɲɔmɛɛ co.»
19 A Ibirayima di guri pa wu buloo pu yíri. A pu bɛɛri di binnɛ kuri pa Bɛɛrisheba ni, bani Bɛɛrisheba ni Ibirayima bi tiin.
Nakɔri wo tirige shɛɛn pee
20 Ayiwa, ba kee keree kʼa toro wɛ, a Ibirayima di ba yi logo na Milika bɛ ya jalaa se wu ceborona Nakɔri mu. 21 Jashiimɛ wu bye Uzi, shuun wo wu mɛgɛ ɲɛ Buzi, na fara Aramu to Kemuwɛli na, 22 ni Kesɛdi, ni Azo, ni Pilidashi ni Yililafu ni Betuwɛli. 23 Wee Betuwɛli we wu bye Erebeka wo to we. Pee pʼa pye Milika wo jalaa gbarataanri we, wʼa piimu se Ibirayima ceborona Nakɔri mu ge. 24 Cee wa bɛ wu bye Nakɔri mu na Erewuma. Wee bɛ ya jalaa se wu mu. Pee pu wa mɛ: Teba, Gaamu, Taxhashi ni Maaka.