Ishaaga segana
21
A Tɛhɛnɛ Baa Kilɛ di ba foro Sara na ba wʼa bi yi jo wɛ. Wʼa bi ɲɔmɛɛ lemu lɔ wu mu ge, na lee ɲɔ fa. 2 A Sara di yere yacɛrɛ na, na ja se Ibirayima nilɛxhɔgɔ ki mu, Kilɛ bi tuun wemu shɛ ge, na bɛ ni wee tuun wu ni. 3 Sara ya pya wemu se Ibirayima mu ge, a Ibirayima di wee mɛgɛ le na Ishaaga. 4 Pya wu cazege caŋa gbarataanri wogo ki na, a Ibirayima di wu kɔn, ba Tɛhɛnɛ Baa Kilɛ bi yi jo wu mu jogana lemu na wɛ. 5 Ishaaga ya se yee lemu ge, wu to Ibirayima wu shi wu bye yee xhuu nigin (100) lee yee le. 6 A Sara di jo: «Kilɛ ya nɛ pye nɛ shɛhɛ fundanga keŋɛ ni. Piimu bɛɛri pʼa Ishaaga kaa logo ge, pee na binnɛ ni nɛ ni te kataanra te na.» 7 A wu jo sanha na: «Jɔgɔ wu bi da já Ibirayima pye na Sara na ba jire kan pya mu wɛ? Ga nɛ kunni ya já se Ibirayima nilɛxhɔgɔ ki mu.»Pʼa Agari ni Isimayɛli kɔ́ri
8 A pya wu lɛ, a pʼi wu ɲɔ wolo jire ni. Caŋa kemu pʼa wu ɲɔ wolo jire ni ge, a Ibirayima di fundanga kalenɛ pye kee caŋa. 9 Misira shɛn Agari bi funana lemu se Ibirayima mu ge, a Sara di lee ɲa li na zhɛhɛni Ishaaga na. 10 A wu Ibirayima pye: «We bulozhɔ we ni wu ja wu kɔri, bani we bulozhɔ we wo ja wu da já binnɛ cɛn wu na ni nɛ wo ja Ishaaga ni wɛ.»* 11 A pee jomɔ pe di waha Ibirayima na fo xuuni bani wu ja wu bye Isimayɛli. 12 Ga a Kilɛ di wu pye: «Ma ganha bu da ma bulozhɔ wu ja wu keree ki yaha ki pye ma mu kawaa wɛ. Sara bu lemu bɛɛri jo ma mu, lee pye, bani Ishaaga ni mu wo shi nibama wʼa da ba foro.* 13 Ma bulozhɔ wu ja wu wi ge, shi wa na ba foro wu bɛ ni, bani wu bɛ ɲɛ mu wo tirige ki shɛn wa.»
14 Ɲimuguro ti na a Ibirayima di soo yìri, na yaligee kii lɔ ni lɔhɔ kashaga, na yee suri Agari na, na wu ja Isimayɛli bɛ kan wu mu, na wu yaha kari. A wu gari na shɛ biin, na ganha na ɲaari wuyɛ ɲuŋɔ fɛni Bɛɛrisheba wo sipoŋɔ ki ni. 15 Ba kashaga ki lɔhɔ kʼa pa xhɔ wɛ, a Agari di pya wu yaha tire la nɔhɔ ni, 16 na laha wu tàan, na sindaa ŋmaga tatogo shi laraga kɔn pya wu na, na shɛ diin wà. Bani wu bi yu na: «Nɛ funŋɔ wa di na ja wu ɲa taxugo ni wɛ.» A wu shɛ diin kee laraga ki ni, na ganha na mɛɛ suu. 17 A Kilɛ di pya wu mɛɛ logo. A Kilɛ wo mɛlɛkɛ wa di diin fugba we ni, na Agari yiri, na wu pye: «Ɲaha kʼa pye wɛ Agari? Ma ganha bu fya wɛ, bani Kilɛ ya pya wu mɛɛ li logo na wu yaha tire li nɔhɔ ni. 18 Yìri, mʼa shɛ pya wu yirige, mʼa wu co keŋɛ na, bani nʼa da ba wu kadugo shi nibama wu ɲɛhɛ.» 19 A Kilɛ di Agari ɲìi mugi, a wu keeŋɛ ka ɲa lɔhɔ di ɲɛ ki ni. A wu shɛ kashaga ki ɲi, na pya wu kan wʼa gba. 20 A Kilɛ di bye ni pya wu ni, a wu ganha na lɛgi. A wu diin wà siwaga ki ni, na ba bye ŋmaŋmɔ kabesinnɛ fɔɔ. 21 A wu diin Paran siwaga ki ni. A wu nu wu cee lɔ Misira fiige ki ni na kan wu mu.
Ibirayima ya kariɲɛɛgɛ ɲɔmɛɛ lɔ Abimɛlɛki mu
22 Wee tuun we ni Abimɛlɛki ni wu kashɛn keŋɛ ɲuŋɔfɔɔ Pikoli ya pa Ibirayima pye: «Kilɛ wa ni ma ni ma kapyegee ki bɛɛri ni.* 23 Ayiwa nimɛ, kàa na mu naha Kilɛ mɛgɛ na na mu wa da ga na nɔhɔ yaha wɛ, ma di wa da ga na nagoo ni na tirige shɛn wa shishiin bɛ nɔhɔ yaha wɛ. Saama pemu nɛ pye ma na ge, nʼa li shaa ma mu ma pee saama pe ninumɔ pye na mu, mʼa pu pye na fiige ki bɛ mu, kee kemu ni ma wa nabɔrɔ na ge.» 24 A Ibirayima di jo: «Nɛ na gàa.»
25 A Ibirayima di jaagi shan Abimɛlɛki na keeŋɛ ka keree na, bani Abimɛlɛki wo kapyebyii pu bi kee shɔ fanha ni. 26 Ga a Abimɛlɛki di wu ɲɔ shɔ na: «Nɛ ta lee pyevɔɔ cɛ wɛ. Mu bɛ di sanha yaaga jo nɛ mu wɛ. Niɲaa nɛ wa na na yi nuri.» 27 A Ibirayima di dubyaa ni sikaa ni niiyɛ kan Abimɛlɛki mu, a pu shuun wu bɛɛri di kariɲɛɛgɛ ɲɔmɛɛ lɔ puyɛ mu. 28 Lee kadugo na a Ibirayima di dubyapyalaa gbarashuun waa wu dubyagbaha ki ni na yaha pu yɛ. 29 A Abimɛlɛki di Ibirayima yege na: «Ɲaha na ma dʼa pii dubyapyalaa gbarashuun we waa yaha pu yɛ wɛ?» 30 A Ibirayima di wu ɲɔ shɔ na: «Sɔɔ pii dubyapyalaa gbarashuun we na na mu, kɔnhɔ pee di bye li ɲaha shɛshɛɛrɛ na nɛ wʼa ke keeŋɛ ke tugi.» 31 Lee na, a pii wee xuu wu mɛgɛ le na Bɛɛrishebaa, bani wà pu shuun wu bɛɛri ya kàa, na ɲɔmɛɛ lɔ puyɛ mu.
32 A pʼi kariɲɛɛgɛ ɲɔmɛɛ lɔ mu puyɛ mu Bɛɛrisheba ni. Lee kadugo na a Abimɛlɛki ni wu kashɛn keŋɛ ɲuŋɔfɔɔ Pikoli di yìri na guri kari Filisiti shɛɛn pu wo fiige ki ni. 33 A Ibirayima di kadanhaŋa tige ka nɔri wà Bɛɛrisheba ni na Kilɛ pɛlɛ wà, na wu mɛgɛ yiri na Tɛhɛnɛ Baa Kilɛ, Kilɛ wemu na gori yaha gbee ge. 34 A Ibirayima di diin Filisiti shɛɛn pu wo fiige ki ni na taatuunnɔ pye wà.