Ibirayima ni Abimɛlɛki keree
20
Lee kadugo na a Ibirayima di ba yìri laha wu tatɛɛngɛ ki ni, na gari fiige ki woroo kulo kacɛ ki na. A wu fɛnhɛ shɛ diin Kadɛsi ni Shuri tɛ wu ni, kadugo tàan a wu ba shɛ diin Gerari ni na tuun wa pye wà. 2 A Ibirayima di ganha na wu shɔ wu pyi na wee cuun wu ɲɛ wii. Lee funŋɔ ni a Gerari wo saan we, wee wemu wu ɲɛ Abimɛlɛki ge, a wee di sipyii yaha pʼa shɛ Sara co na pa wu kaban. 3 Ga a Kilɛ di ba wuyɛ shɛ Abimɛlɛki na piige ka ni, ŋmunɔgɔ ni na wu pye: «Mu da ba xhu we cee we wuu na, wemu ma wa lɔ mɛ ge, bani ná wa wo shɔ wu ɲɛ wii.» 4 Lee bi Abimɛlɛki ta wu sanha nɔ cee wu na wɛ, a wu jo: «Ee, Tɛhɛnɛ Baa Kilɛ, mu na zɔɔ mʼa shi wa kyɛɛgi na ta wu ya katiibaana pye-e ya? 5 Ta wuyɛ pya bɛ kʼa jo na wee cuun wu wa wɛ? A cee wu bɛ di jo na wee ɲahafɔɔ wu ɲɛ wii. Tifire ni nɛ le kaa le pye, nɛ ta jaagi wɛ.».6 Ayiwa a Kilɛ di wu ɲɔ shɔ ŋmunɔgɔ ni na: «Oo, nɛ bɛ ya li cɛ jo tifire ni mu ya le kaa le pye. Lee shiin lʼa nɛ bɛ pye nɛ bɛ ya ta sɔɔ mu wu jurumu pye na na wɛ. Lee na nɛ ya ta mu yaha mu wu nɔ wu na wɛ. 7 Ayiwa nimɛ, cee wu kuruŋɔ shɛ gan wu poo wu mu, bani Kilɛ tudunmɔ wu ɲɛ wii. Wu na ba ɲɛrɛgɛ pye ma mu kɔnhɔ mʼa gori ɲìi na. Ga ma bye ma di ya wu kuruŋɔ shɛ wu kan wɛ, li cɛ see na, na ma ni ma sipyii bɛɛri na ba xhu».
8 A Abimɛlɛki di ba soo yìri na wu kapyebyii pu bɛɛri yiri pinnɛ, na kee keree ki paari pu mu. A pʼi sii fya xuuni. 9 A Abimɛlɛki di Ibirayima yiri na wu pye: «Lekɛ mu dʼa pye mɛ wèe na wɛ? Kakuunɔ lekɛ nɛ dʼa pye mu na fo mu wu nɛ ni na saanra ti bɛɛri yaha we jurumugbɔ we na wɛ? Kaa mu ya pye nɛ na lemu ɲɛ nibyii wɛ.» 10 A Abimɛlɛki di Ibirayima pye sanha: «Lekɛ li da ma yaha le bye na wɛ?»
11 A Ibirayima di wu ɲɔ shɔ na: «Nɛ bi na funŋɔ kɔɔn jo Kilɛ ɲìi fyaara da da ke fiige ke sipyii ni wɛ, jo pu na ba nɛ gbo na shɔ wu fɛni. 12 Na fara lee bɛ na, nɛ cuun wʼa sii wii can can na, bani to nigin nagoo wèe ɲɛ, ga wù ɲɛ nu nigin na wɛ. A nɛ wu leŋɛ na shɔ. 13 Tuun wemu ni Kilɛ ya nɛ pye nɛ foro na to puga ki ni na ɲaari ge, a nɛ Sara pye: ‹Saama pemu nʼa zhaa ma mu ma pye na mu ge, pee pu wa mɛ. Wù bu nɔ xuu bɛɛri ni, mʼa jo: “Nɛ ɲahafɔɔ wʼa wii!”› »
14 Ayiwa, a Abimɛlɛki di dubyaa ni sikaa, ni niiye, ni kapyebyii namaa ni cèe kan Ibirayima mu. A wu wu shɔ Sara bɛ tɛrɛŋɛ kan wu mu. 15 A Abimɛlɛki di Ibirayima pye: «Wii, na fiige ki bɛɛri ke ma ɲaha tàan, xuu bɛɛri wʼa ma taan ge, shɛ diin wà.»
16 A wu Sara pye: «Wii, nɛ warifyɛn kabɔfonɔ nigin (1.000) kan ma ɲahafɔɔ wu mu. Lee na ba li shɛ mu ni ma sipyiɲii pu bɛɛri na, na jaagi wa shishiin bɛ wa mu na kii keree kii ni wɛ».
17 A Ibirayima di Kilɛ ɲɛɛri a Kilɛ di Abimɛlɛki ni wu shɔ, ni wu kapyebyezhaa pu bɛɛri cuuŋɔ, a pʼi já na nagoo seni sanha. 18 Bani Tɛhɛnɛ Baa Kilɛ bi Abimɛlɛki wo puga ki cèe pu bɛɛri ɲɛri seganhanaa Ibirayima shɔ Sara wuu na.