Pʼa Sodɔmu ni Gɔmɔɔri kulogoo ki ja fɛɛfɛɛ
19
A pee mɛlɛkɛɛ shuun wu nɔ Sodɔmu ni yakoŋɔ ki tàan. Lɔti bi tiin kulo li kuɲɔjii li ɲɔ na. Ba Lɔti ya pu ɲa wɛ, na yìri na pu ɲuŋɔ círi. A wu shɛ nuguro sin pu fɛɛ ni na wu ɲaha buri ɲiŋɛ na. 2 A wu pu pye: «Na kafɛɛ, nʼa yi ɲɛɛri, yi shɛ digi yi bulona wu kaban, yʼi yi tɔɔyɔ yi je, yʼi shɔn wà. Yi na ba soo yìri na gaaŋi.» A pʼi wu ɲɔ shɔ na: «Ahayi, wèe na zhɔn kulo li pinnɛrɛ kpɛɛngɛ ki na.» 3 Ga, a Lɔti di diin na pu ɲɛɛri fo pʼa pa sɔɔ na shɛ digi wu kaban. A wu shizhɛnhɛrɛ baa buuri wa fɔ́, na yalige yàa pu mu, a pʼi li.4 Ga yani pu sinnɛ ge, a Sodɔmu kulo li namaa pee, lɛvɛɛ pu fara nɔhɔlɛɛ pu na, a kulo li shɛɛn pu bɛɛri di foro na ba puga ki kuuri. 5 A pʼi Lɔti yiri na wu pye: «Namaa piimu pʼa jé ma mu ke piige ke ni ge, mii pu wa wɛ? Pu yeege naha wù sinnɛ ni pu ni.»
6 A Lɔti di foro, na gbura ki tɔ, na fulo pu na, 7 na jo: «Na cebooloo, nʼa yi ɲɛɛri, yi ganha bu da lee kakuunɔ li pye wɛ. 8 Pushaa shuun wu wa nɛ mu piimu sanha ná shi cɛ wɛ. Nɛ na ba ni pee ni yi mu, lemu lʼa yi taan ge, yi na ba lee pye pu na. Ga pii namaa pii pi ge, yi ganha bu yaaga pye we wa na wɛ, bani pʼa pa digi nɛ puga.» 9 A pʼi wu pye: «Laha wù koo ni!» A pʼi jo sanha na: «We ná we na pa diin wèe mu nadadɛɛnrɛ na, wee di giin di da wèe kiiri kɔɔn nimɛ ya? Nimɛ wèe da kaa pye mu na lemu ya fanha tɔ pii wuu li na ge.» Ba pʼa yee jo wɛ, na ganha na Lɔti ŋmunuŋɔ ni kafugo ni na se gbura ki mu di zhɛ gyɛɛgi. 10 Ga a pee namaa shuun wu keye yeege, na Lɔti co leŋɛ puga ki ni, na gbura ki tɔ. 11 Namaa pu pʼa bye kuɲɔɔ li ɲɔ na ge, a pʼi fyɛngɛrɛ wá pee na, sipyilɛyɛ yi fara nɔhɔpiire ti na. A pʼi bye pu ya kuɲɔɔ li sanha cɛ wɛ.
12 A namaa shuun wu Lɔti pye: «Mu sipyii pii wa naha sanha le kulo le ni na fara pii na ya? Ma yafɛɛ, ma jalaa, ni ma pushaa, sipya bɛɛri wu ɲɛ ma mu le kulo le ni ge, pu bɛɛri lɔ yeege naha. 13 Wèe wa da le kulo le ja. Li mɛyɔgɔŋɔ ke kʼa nɔni Tɛhɛnɛ Baa Kilɛ na ge, kʼa pɛlɛ toro Tɛhɛnɛ Baa Kilɛ ɲaha tàan, a wu wèe yaha pa na wèe pu pa li ja.» 14 Namaa piimu pʼa bi Lɔti pushaa pu co curɔɔrɔ na ge, a wu shɛ jo ni pee ni na: «Yi yìri foro le kulo le ni bani Tɛhɛnɛ Baa Kilɛ wa da ba li ja.» Ga a wu yafɛɛ pʼi ganha na giin na jaha wʼa byi.
15 Ɲimuguɲɔ wu na, a mɛlɛkɛɛ pʼi yi jo waha Lɔti mu na: «Yìri mʼa ma shɔ wu lɔ, ni ma pushaa shuun wemu wu wa naha ge, yi da gaaŋi. Jaagi kanhama pemu na ba do le kulo le ɲuŋɔ ni ge, kɔnhɔ pee ganha bu nɔ yi bɛ na wɛ.» 16 Lɔti ya ta yìri tɔvuyo na wɛ. A pee namaa shuun wu pu co keye ye na, wu ni wu shɔ, ni wu pushaa shuun wu ni, bani Tɛhɛnɛ Baa Kilɛ bi ɲuŋɔ ɲaari pu na. A pʼi foro ni wu ni, na wu yaha kanha ki kadugo.*
17 Ba pʼa pu yeege kanha ki ni wɛ, a wa di jo pu ni na: «Ta fe mʼa ma munaa li ɲuŋɔ wolo. Ma ganha bu gara wii ma kadugo yíri wɛ, ma di ganha bu yere kpɛɛngɛ ka shishiin na wɛ. Ta fe mʼa se yaŋaboyo yi ni, kɔnhɔ ma ganha bu sòrogo wɛ.» 18 A Lɔti di pu pye: «Ahayi kafɔɔ, nʼa ma ɲɛɛri! 19 Nɛ kaa ya tàan mu mu, a mʼi ma ɲiɲaara ti shɛ nɛ na, na nɛ ɲuŋɔ wolo. Ga nʼa da já baa di yaŋa ki ta wɛ. Nɛ da wà ta kakara tʼi na pye wɛ, nɛ bɛ na xhuu. 20 Le kufɛnhɛfɛnhɛnɛ le wii, lee wa tɛɛŋɛ nɛ na xuuni, nɛ na já baa nɔ wà. Na yaha di baa zhɛ wà, kɔnhɔ di shɔ bani lee wa ye wɛ.» 21 A wu Lɔti pye: «Nʼa sɔɔ lee bɛ na, kulo lemu kaa mʼa byi ge, nʼa da ba lee ja wɛ. 22 Fyaala shɛ jé wà, bani nʼa da já yaaga pye wɛ fo mu bu shɛ jé lee kulo li ni.» Lee wuu na lee kulo li mɛgɛ ya le na Zowari.a
23 Caŋa kʼa ɲɔ kɔn na fòro tuun wemu ni ge, wee tuun wu ni Lɔti bi jin Zowari kulo li ni. 24 Wee tuun wu ni a Tɛhɛnɛ Baa Kilɛ di kirimu ni na tirige Sodɔmu ni Gɔmɔɔri kulogoo ki na ba zanha ɲɛ wɛ. Yee bi yìri fugba we ni Tɛhɛnɛ Baa Kilɛ yíri. 25 A wu kee kulogoo kee ni ki kpɛɛngɛ ki bɛɛri ni ki sipyii ni ki tiire ti bɛɛri sòrogo. * 26 Pu nigariwuu a Lɔti shɔ wu gara wii wu kadugo yíri, na ɲɛri suumɔ kunnɔgɔ.*
27 Kee caŋa ki ɲimuguro ɲisɔɔgbɔhɔ ki na, Ibirayima bi jo ni Tɛhɛnɛ Baa Kilɛ ni xuu wemu ni ge, a wu yìri kari wee xuu wu ni. 28 A wu wu ɲuŋɔ yirige na Sodɔmu ni Gɔmɔɔri shizhaa wu wii na fara kee fadaaŋa ki kulogoo ki bɛɛri na, a wu wureluu la ɲa li na fòro wà ɲiŋɛ ki ni na duri fugba wu ni ba kanra wurege ɲɛ wɛ.
29 Tuun wemu ni Kilɛ bi da kii fadaaŋa kulogoo kii kyɛɛgi ge, a wu wu funŋɔ yaha nidogo Ibirayima na. Lee wuu na, Lɔti bi tiin kulogoo kiimu ni ge, a Kilɛ di wu ɲuŋɔ wolo na foro kee wo gyɛɛgi wu ni.
Lɔti ni wu pushaa shuun wu keree
30 Lee kadugo na a Lɔti ni wu pushaa shuun wu foro Zowari kulo li ni na shɛ diin faaboboŋɔ ki na. Bani fyaara ti bye wu ni Zowari diin na. A wu ni wu pushaa shuun wu shɛ diin faaga wege ka ni. 31 Caŋa ka, a porofɔɔ nilɛ wu ba wu cuun wu pye: «Wii, wèe to wʼa lɛ, ná wa shishiin bɛ di wa naha ke fiige ke ni wemu na ba jé wèe mu ma na jo ba lee wa byi ɲiŋɛ ki bɛɛri na wɛ. 32 Pa, wù ba duvɛn kan wù to wu mu wu gba xuuni, wù sinnɛ ni wu ni, kɔnhɔ wù to wu wu shi ta». 33 Kee piige ki ni, a pʼi duvɛn kan pu to wu mu wʼa gba. A poro pushɔ nilɛ wu shɛ sinnɛ ni wu ni. Lɔti ya wu sinnɛduun kelee wu yiriduun cɛ wɛ. 34 Ɲimuguro ti na, a muzhɔfɔɔ wu cuunvɔɔ wu pye: «Nɛ sinnɛ ni na to wu ni piige ki ni. Wù wu gba niɲaa wo piige ke bɛ ni, ma bɛ di shɛ sinnɛ ni wu ni, kɔnhɔ wù to wu wu shi ta.» 35 Ayiwa a pʼi duvɛn kan pu to wu mu wʼa gba kee piige ki bɛ ni, a cuunvɔɔ wu bɛ di shɛ sinnɛ ni wu ni. Lɔti ya foro yafiin bɛ fiin wɛ, wu ya wu sinnɛduun cɛ wɛ, wu ya wu yiriduun cɛ wɛ.
36 A Lɔti pushaa shuun wu bɛɛri di yere mu lee yeregana li na pu to wu mu. 37 A porofɔɔ nilɛ wu ba ja se, na wu mɛgɛ le na Mowabu.b Wee wu ɲɛ Mowabu shi shɛɛn pu wo tolɛ we, pee wa niɲaa we bɛ ni. 38 A cuunvɔɔ wu bɛ di wu wuu li se funana, na wu mɛgɛ le na Bɛni-Amic. Wee wu ɲɛ Amɔ shi shɛɛn pu wo tolɛ we, pee bɛ wa niɲaa we bɛ ni.