Kilɛ ya jo na Sara na ba funana se
18
Kee keree kii kadugo na a Tɛhɛnɛ Baa Kilɛ di ba wuyɛ shɛ sanha Ibirayima na Mamure Sesun tiye yi nɔhɔ ni. Lee bi wu nidɛɛngɛ ta wu fàya puga ki kuɲɔɔ li ɲɔ na cafuŋmaŋmaga ka na. 2 A wu ba wu ɲuŋɔ yirige, na namaa* taanri wa niyerege ɲa wu ɲahatiimɛ pu ni. Ba wʼa pu ɲa wɛ, na foro fàya puga ki ni, na togaaya lɔ na shɛ pu ɲuŋɔ círi. A wu nuguro sin pu fɛɛ ni, na ɲaha ke buri, 3 na jo: «Kafɔɔ, nɛ keree bu da kʼa taan ma mu, na ma ɲɛɛri, ma ganha bu doro ni ma ya jé ma bulona wu mu wɛ. 4 Yi yere pʼi ba ni lɔhɔ ni yʼi ba yi tɔɔyɔ je, yʼi ŋmɔ jɛri ke tige ke nɔhɔ ni naha. 5 Nʼa da zhɛ yalire la sha di ba yi kan yi li, kɔnhɔ yʼi fanha ta jɛri, yʼi na yʼa gaaŋi yi wo ɲara li fɛni. Lee wuu na yʼa toro yi bulona wu kuɲɔɔ ɲɔ na.» A pʼi wu ɲɔ shɔ na: «Uun, lee na já bye.»6 A Ibirayima di togaaya lɔ jé fàya puga ki ni Sara fɛni, na wu pye: «Tɔɔyɔ lɔ, mʼa farini myɛ pu yataanga ki ɲìi taanri tɔnhɔ, mʼa pu káa.» 7 A Ibirayima di gari kashɔ ki na, na shɛ nuyaama sìnmɛ wo wa co kan wu kapyebye wu mu wu yàa tɔvuyo na. 8 A wu ba ni nuxaara ti ni, ni nulɛɛ ni nujirimɛ bɛ, na pa gan nabuun pu mu. A wu yere tige ki nɔhɔ ni pu kabanugo ki na, kɔnhɔ yaaga ka kaa ba pu ta. A pʼi li.
9 A pʼi wu yege na: «Mii ma shɔ Sara wu ɲɛ wɛ?» A wu jo: «Wu wa bugi wu funŋɔ ni.» 10 A pu shɛn nigin wa di jo: «Nɛ na ba guri ba ma mu yee la nimɛtashiin. Ma shɔ Sara wu na ba ja ta.» A Sara di pee jomɔ pu logo na wu yaha fàya puga ki ɲɔ na Ibirayima kadugo yíri.*
11 Lee bi Ibirayima ni Sara ta pʼa lɛ fo xuuni. Sara bi wu sege ɲuŋɔ ye xɔ. 12 A Sara di zhɛhɛ wuyɛ funŋɔ ni, na jo: «Nɛ wʼa ɲɛri nimɛ celɛ goo, nɛ ma kee fundanga ki ta mii na yere yacɛrɛ na, na ta nɛ kafɔɔ wu bɛ dʼa lɛ wɛ?»* 13 A Tɛhɛnɛ Baa Kilɛ di Ibirayima pye: «Ɲaha na Sara dʼa shɛhɛ na jo na wee ya ɲɛri celɛ, na wee da laa ta nige-e wɛ? 14 Kaa lekɛ li wa Tɛhɛnɛ Baa Kilɛ jani wɛ? Yee la nimɛtashiin nɛ na ba guri ba ma mu, Sara na ba ja ta.»* 15 A Sara di fya na yi kaala, na jo: «Nɛ ta shɛhɛ wɛ dɛ!» A Kafɔɔ di jo: «Mʼa shɛhɛ kunni.»
16 Ayiwa, a namaa pʼi yìri na gaaŋi. A pʼi ɲaha tii Sodɔmu yíri. A Ibirayima di shɛ pu torogo.
Ibirayima ya Kilɛ ɲɛɛri Sodɔmu wuu na
17 Lee bi Tɛhɛnɛ Baa Kilɛ ta wʼa jo wuyɛ funŋɔ ni na: «Lemu nʼa da bye ge, ta nʼa da li ŋmɔhɔ Ibirayima na? 18 Bani Ibirayima na ba bye shi, baraga ɲɛ wemu ni ge. Ɲiŋɛ ke shi wesama bɛɛri na ba duba ta na foro wee ni. 19 Nɛ wu ɲaha bulo kɔnhɔ wu kii ɲɔmɛhɛɛ kii jo wu nagoo ni wu puga shɛɛn pu bɛɛri mu wu kadugo yíri, na pʼa Tɛhɛnɛ Baa Kilɛ wo koo li ɲaari, pu da katiigee ni can keree pyi. Tɛhɛnɛ Baa Kilɛ ya ɲɔmɛhɛɛ kiimu lɔ Ibirayima mu ge, kɔnhɔ wu ba kee ɲɔ fa.»
20 A Tɛhɛnɛ Baa Kilɛ di jo: «Sodɔmu ni Gɔmɔɔri mɛyɔgɔŋɔ kʼa pɛlɛ toro. Pu kapyegee kʼa kolo toro. 21 Lee wuu na, nʼa da digi di shɛ pu pɛrɛgi pu bi ta pu na keree ki pyi na bɛ ni pu mɛgɛ ki yɔgɔgana li ni, pu shiin bu da pu ya ki pyi mu wɛ, di lee cɛ.»
22 A pee namaa pʼi ɲaha tagi na gaaŋi Sodɔmu yíri. Ga a Ibirayima di yere yaha Tɛhɛnɛ Baa Kilɛ ɲaha tàan. 23 A Ibirayima di fulo wu na, na jo: «Ma da sipyitiibaaya ye ni sipyitiimɛɛ pu bɛɛri pinnɛ gyɛɛgi gɛ? 24 La wa la ni sipyitiimɛɛ kɛlɛɛ kaguro (50) na da le kulo le ni. Ta ma da zhɛ li kyɛɛgi? Ta mu da ɲuŋɔ ɲaari lee kulo li na sipyitiimɛɛ kɛlɛɛ kaguro (50) wu wuu na wɛ? 25 Mu wʼa da ga gbara ma sipyitiimɛ pinnɛ gbo ni sipyitiibaaga ni wɛ. Ma da ga gbara ma kasaaŋaa pyevɔɔ ni kakuuŋɔɔ pyevɔɔ saraa pye nigin wɛ. Mu we wʼa ɲiŋɛ ki bɛɛri kiiri wu kɔɔn ge, go tifire keree mu ya byi.»
26 A Tɛhɛnɛ Baa Kilɛ di Ibirayima ɲɔ shɔ na: «Nɛ bu shɛ sipyitiimɛɛ kɛlɛɛ kaguro (50) ta Sodɔmu ni, nɛ na yafa kulo li shɛɛn pusamaa bɛɛri mu pee wuu na.»
27 A Ibirayima di jo sanha na: «Nɛ kunni ya li cɛ jo nɛ ɲɛ yaaga bɛ mu ɲaha tàan ni gbazhɛnhɛ ni shɔɔnrɔ yɛ bɛ wɛ, ga nʼa da luu waha di jo ni ma ni sanha. 28 La wa la ni kaguro na zhɛ da wʼa fɔ pu ni. Ta mu na zɔɔ mu wu kulo li bɛɛri kyɛɛgi pee sipyii kaguro wu baara na ya?» A Kafɔɔ Kilɛ di jo: «Nɛ bu shɛ sipyitiimɛɛ kɛlɛɛ shishɛɛrɛ ni kaguro (45) ta le kulo le ni, nɛ da li kyɛɛgi wɛ.»
29 A Ibirayima di Kilɛ pye sanha na: «La wa la ni sipyitiimɛɛ pu ya laha kɛlɛɛ shishɛɛrɛ (40) na wɛ.» A Kafɔɔ Kilɛ di jo: «Pee sipyii kɛlɛɛ shishɛɛrɛ wu wuu na, nɛ da kulo li kyɛɛgi wɛ.»
30 Wee tuun wu ni a Ibirayima di jo sanha na: «Nʼa ma ɲɛɛri Kafɔɔ Kilɛ, ma ganha bu luu yirige na tàan wɛ, nʼa da jo sanha: La wa la ni sipyitiimɛɛ kɛlɛɛ taanri (30) yɛ nigin wu wa kulo li ni.» A Kilɛ di wu ɲɔ shɔ na: «Nɛ bu shɛ sipyitiimɛɛ kɛlɛɛ taanri (30) ta kulo li ni, nʼa da yaaga bɛ pye kulo li na wɛ.»
31 A Ibirayima di jo: «Kafɔɔ, nʼa da luu waha di jo ni ma ni sanha: la wa la ni sipyitiimɛɛ kɛlɛɛ shuun (20) yɛ wu wa kulo li ni.» A Kafɔɔ di jo: «Pee sipyii kɛlɛɛ shuun (20) wu wuu na, nʼa da kulo li kyɛɛgi wɛ.»
32 A Ibirayima di jo: «Kafɔɔ, na sii na ma ɲɛɛri, ma luu ganha bu yìri na tàan wɛ. Di bu ye jo, nʼa da ya jo nige wɛ: wee tuun wu ni sipyitiimɛɛ kɛ yɛ nigin bu shɛ da kulo li ni do?» A Kilɛ di jo: «Pee kɛ wu wuu na, nʼa da kulo li kyɛɛgi wɛ.» 33 Ba Tɛhɛnɛ Baa Kilɛ ya jo xɔ ni Ibirayima ni wɛ, na gari. A Ibirayima bɛ di guri pa wu kaban.