Abirama mɛgɛ kʼa ɲɛri Ibirayima
17
Ayiwa, tuun wemu ni Abirama ya yee kɛlɛɛ gbarashɛɛrɛ ni gbarashɛɛrɛ (99) ta ge, a Tɛhɛnɛ Baa Kilɛ di wuyɛ shɛ wu na na jo: «Nɛ ɲɛ Se Bɛɛri Fɔɔ Kilɛ. Ta tiimɛ koo ɲaari na ɲaha tàan. 2 Nʼa da kariɲɛɛgɛ ɲɔmɛɛ lɔ ma mu, lee na ba bye na ni ma tɛ ni. Nɛ na ba nagoo niɲɛhɛmɛɛ kan ma mu.»3 A Abirama di nuguro sin na wu ɲaha buri ɲiŋɛ na. A Kilɛ di wu pye: 4 «Kariɲɛɛgɛ ɲɔmɛɛ le nʼa da lɔ ma mu ge, lee li wa le: ma na ba bye shi niɲɛhɛmɛ to. 5 Ma mɛgɛ wa da ba yiri nige Abirama wɛ, ga fo Ibirayima.a Bani nɛ mu pye shi niɲɛhɛmɛ sefɔɔ. 6 Ma na ba sege ta fo xuuni. Shi wu na ba foro ma ni, saannaa bɛ na ba foro ma ni. 7 Nɛ na ba na kariɲɛɛgɛ ɲɔmɛɛ li lɔ ma mu, di li lɔ ma nagoo pu mu, di li lɔ ma shi nibama wu bɛ mu. Lee ɲɔmɛɛ le na ba bye nixhɔbaana, jo nɛ na ba bye ma ni ma shi nibama wu Kilɛ.b 8 Kana fiige kemu ni ma niɲaa wo ɲɛ nabun ge, nɛ na ba kee kan ma ni ma tirige shɛɛn pu mu kʼa bye pu wogo fo gbee. Nɛ na ba bye pu Kilɛ.»*
Cekɔɔnrɔ ɲɔkɔɔnrɔ
9 A Kilɛ di nugo Ibirayima pye: «Mu wi ge, mu ya yaa na nɛ kariɲɛɛgɛ ɲɔmɛɛ li koo ɲaari ma ni ma kadugo shi nibama wu bɛɛri. 10 Yee ya yaa na kariɲɛɛgɛ ɲɔmɛɛ lemu koo ɲaari nɛ ni yee tɛ ni, mu ni ma kadugo shi nibama wu ni ge, lee li wa mɛ: yʼa namaa pu bɛɛri kɔɔn.* 11 Yee ya yaa na cekɔɔnrɔ pyi. Tee cekɔɔnrɔ ti na ba bye kariɲɛɛgɛ ɲɔmɛɛ li fɛ pe nɛ ni yee tɛ ni. 12 Funana bɛɛri, li na ba gɔn li cazege caŋa gbarataanri wogo ki na. Ma kadugo shi nibama wu bɛɛri na ba lee pyi. Ali buloo piimu pʼa seni ma puga ki ni, kelee mʼa piimu shɔ pʼi ɲɛ ma nagoo wɛ ge, piimu bɛ pu ɲɛ pu ɲɛ mu wo shi wu ni-i ge, pee bɛɛri ya yaa na cekɔɔnrɔ pye. 13 Funa bɛɛri wʼa se ma puga, kelee wemu wʼa shɔ ni wari ni ge, pee bɛɛri na ba cekɔɔnrɔ pye. Lee funŋɔ ni nɛ wo kariɲɛɛgɛ ɲɔmɛɛ li fɛ pu na ba bye yee ceepuuro ti na fo gbee. 14 Ná bɛɛri wu ɲɛ wu ya kɔn wɛ ge, wee na gɔri yeege wu wo sipyii pu ni, bani wʼa na kariɲɛɛgɛ ɲɔmɛɛ li kyɛɛgi.»
15 Lee kadugo na a Kilɛ di Ibirayima pye: «Ma shɔ Sarayi da ba yiri nige Sarayi wɛ, ga fo Sara.c 16 Nɛ na ba duba Sara mu. Ma na ba funana ta wu na. Nɛ na ba duba Sara mu, shi niɲɛhɛmɛ na ba foro wu ni. Shi wu saannaa bɛ na ba foro wu ni.»
17 A Ibirayima di nuguro sin, na wu ɲaha buri ɲiŋɛ na na zhɛhɛ, na jo wuyɛ funŋɔ ni na: «Ná wemu wʼa yee xhuu nigin (100) ta ge, dii wee di da já pya se wɛ? Sara wemu wʼa yee kɛlɛɛ gbarashɛɛrɛ (90) ta ge, wee bɛ na já pya se dii wɛ?» 18 A Ibirayima di Kilɛ pye: «Nʼa ma ɲɛɛri ma Isimayɛli yaha ɲìi na ma ɲaha tàan.»
19 A Kilɛ di jo: «Nakaara baa ma shɔ Sara na ba funana se ma mu. Ma na ba li mɛgɛ le na Ishaaga. Nɛ na ba na kariɲɛɛgɛ ɲɔmɛɛ li lɔ wu mu, di li lɔ wu kadugo nagoo pu bɛ mu. Lee na ba bye kariɲɛɛgɛ ɲɔmɛɛ nixhɔbaana. 20 Isimayɛli wi ge, nɛ ma ɲɛrɛgɛ ki logo wu shizhaa na. Li wii, nɛ na ba duba wu mu, di wu pye sege fɔɔ, di nagoo niɲɛhɛmɛɛ kan wu mu fo xuuni. Wu na ba bye ɲuŋɔfɛɛ kɛ ni shuun to. Nɛ na ba shi niɲɛhɛmɛ yeege wu ni. 21 Ga na kariɲɛɛgɛ ɲɔmɛɛ le, Ishaaga mu nʼa da ba li lɔ, pya wemu ma shɔ Sara wʼa da ba se ma mu yee la nimɛtashiin ge.» 22 Ba Kilɛ ya jo xɔ ni Ibirayima ni wɛ, na yìri dugi fugba wu ni na Ibirayima yaha.
23 Kee caŋa kiyɛ pyaa a Ibirayima di wu ja Isimayɛli kɔn. Piimu bɛɛri pʼa se wu puga ki ni ge, ni wʼa piimu shɔ wari na ge, a wu pee bɛ kɔn. Funana bɛɛri li ɲɛ wu kaban ge, a wu pee bɛɛri kɔn na bɛ ni Kilɛ wo nijoyo yi ni wu mu. 24 Ibirayima ya jo wʼa cekɔɔnrɔ pye ge, wu shi wu bye yee kɛlɛɛ gbarashɛɛrɛ ni gbarashɛɛrɛ (99). 25 Wu ja Isimayɛli, a wee di cekɔɔnrɔ pye na wu shi wu yaha yee kɛ ni taanri na. 26 Kee caŋa kiyɛ pyaa Ibirayima ni wu ja Isimayɛli ya pinnɛ cekɔɔnrɔ pye. 27 A wu puga shɛɛn namaa pusamaa bɛɛri, buloo piimu ya se wu puga ge, ni wʼa piimu shɔ ni wari ni shi watii shɛɛn mu ge, a pee bɛɛri di cekɔɔnrɔ pye kee caŋa ke.