Isimayɛli segana
16
Ayiwa Abirama shɔ Sarayi bi sanha pya ta wu mu wɛ. Lee bi bulozhɔ wa ta Sarayi mu, Misira shɛn wu bye wii, wu mɛgɛ di ɲɛ Agari. 2 A Sarayi di Abirama pye: «Li wii, Tɛhɛnɛ Baa Kilɛ ya nɛ pye seganha. Ɲɔ mayɛ na mʼa jé na bulozhɔ wu mu, la wa la ni nɛ na já nagoo ta wee gbɔɔrɔ ni.» A Abirama di sɔɔ Sarayi wo nijoyo yi na. 3 Lee na a Abirama shɔ Sarayi di wu bulozhɔ Misira shɛn Agari kan wu poo Abirama mu wu pye wu shɔ. Lee bi Abirama ta wʼa yee kɛ ta xɔ Kana fiige ki ni. 4 A Abirama di jé Agari mu, a wu yere yacɛrɛ na. Ba Agari ya wuyɛ ɲa wʼa yere yacɛrɛ na wɛ, na ganha na shɔɔgɔ shaan wu kafɔɔ Sarayi na. 5 Wee tuun wu ni a Sarayi di Abirama pye: «Nɛ wa kanhama pemu ni mɛ ge, mu fɛ pi. Nɛ wu wa na bulozhɔ kan mu mu, ga ba wee ya yere yacɛrɛ na wɛ, a wu ganha na nɛ fanri. Tɛhɛnɛ Baa Kilɛ wu pye li kiiri kɔnvɔɔ nɛ ni mu tɛ ni!» 6 A Abirama di Sarayi pye: «Wii, ma bulozhɔ wu we ma keŋɛ ni. Lemu lʼa ma taan ge, lee pye wu na.»Ayiwa, a Sarayi di Agari cogana kolo fo wʼa paa gbee wu ɲaha na. 7 A Tɛhɛnɛ Baa Kilɛ wo mɛlɛkɛ wu shɛ Agari ta lobulowii la tàan siwaga ki ni. Lee lobulowii li bye Shuri koo li ɲɔ na. 8 A mɛlɛkɛ wu jo: «Sarayi bulozhɔ Agari, mii mʼa yìri wɛ? Na se mii wɛ?»
A wu jo: «Na kafɔɔ Sarayi ɲaha na nʼa paa gbee.» 9 A Tɛhɛnɛ Baa Kilɛ wo mɛlɛkɛ wu wu pye: «Kuri mʼa se ma kafɔɔ wu kaban, mʼa shɛ guu wu mu.» 10 A wu jo sanha: «Nɛ na ba ma tirige shɛɛn ɲɛhɛ xuuni fo pu da já dɔrɔ wɛ.» 11 A Tɛhɛnɛ Baa Kilɛ wo mɛlɛkɛ wu jo sanha: «Li wii, ma niyerege ki wa, ma na ba ja se, na wu mɛgɛ le na Isimayɛlia, bani Tɛhɛnɛ Baa Kilɛ ya ma kanhama mɛɛ li logo. 12 Ma ja wu na ba bye ba sige kafaŋa ɲɛ wɛ. Wu na ba wu keŋɛ yirige sipyii pu bɛɛri fɛni, sipyii pu bɛɛri bɛ na ba pu keye yirige wu fɛni. Wu na ba shɛ diin wu yɛ nigin xuu ni, na laraga kɔn wu cebooloo pu na.» 13 Tɛhɛnɛ Baa Kilɛ wu wʼa jo ni Agari ni ge, a wu mɛgɛ le wee na na: «Mu ɲɛ Kilɛ wemu wʼa nɛ ɲaa ge.» Bani wu bi jo: «Wemu wʼa nɛ ɲaa ge, ta wee nɛ ɲa mɛ can can na?» 14 Lee na pʼa kee keeŋɛ ki mɛgɛ le na Laxayi-Ɔrɔyib. Kee keeŋɛ ki wa Kadɛsi kulo le ni Bɛrɛdi kulo li tɛ wu ni.
15 A Agari di funana se Abirama mu, a Abirama di wu mɛgɛ le na Isimayɛli.* 16 Abirama ya Isimayɛli se Agari na tuun wemu ni ge, wu bi yee kɛlɛɛ gbarataanri ni gbaara (86) xɔ.