Kilɛ ya kariɲɛɛgɛ ɲɔmɛɛ lɔ Abirama mu
15
Ayiwa, ba kii keree kii ya toro wɛ, a Tɛhɛnɛ Baa Kilɛ di ba wuyɛ shɛ Abirama na na jo:«Ma ganha da vya wɛ Abirama!
Nɛ wu ɲɛ mu kasɛɛgɛ pyevɔɔ,
ma na ba kuduun nigbɔ ta.»
2 A Abirama di jo: «Kafɔɔ, Tɛhɛnɛ Baa Kilɛ, ɲaha mu yakanga di da ɲɔ nɛ na, ma nɛ yaha pya baa wɛ? Nɛ puga ki cɛn lɔvɔɔ wu ɲɛ Damasi shɛɛn Eliyezɛri.» 3 A Abirama di jo sanha na: «Li wii, mu ya ta pya kan nɛ mu wɛ. Ná wemu wʼa se nɛ puga ki ni ge, wee wu da ba bye nɛ cɛn wu lɔvɔɔ.» 4 Wee tuun wu ni a Tɛhɛnɛ Baa Kilɛ di wu pye: «Ahayi dɛ, we wa ma cɛn wu lɔvɔɔ wɛ. Ga muyɛ pyaa yasege ki da ba bye ma cɛn wu lɔvɔɔ.»
5 Lee kadugo na a wu foro ni Abirama ni fàya puga ki ni, na wu pye: «Fugba wu wii mʼa wɔrɔɔ ki tɔrɔ, ma bi da já lee na.» A wu guri wu pye na: «Le ɲɛhɛgana le na mu nagoo pʼa da ba ɲɛhɛ.»* 6 A Abirama di dà Tɛhɛnɛ Baa Kilɛ na, a Tɛhɛnɛ Baa Kilɛ di wu jate sipyitiimɛ wu nʼa daa wu wuu na.* 7 A Kilɛ di wu pye sanha na: «Nɛ ɲɛ Tɛhɛnɛ Baa Kilɛ, nɛ wʼa mu yeege Uri ni, Kalide fiige ki ni, kɔnhɔ di ba ke fiige ke kan ma mu kʼi bye ma wogo.» 8 Ga a Abirama di jo: «Kafɔɔ Tɛhɛnɛ Baa Kilɛ, dii nɛ di da li cɛ see na na ke fiige ke na ba bye nɛ wogo wɛ?» 9 A Tɛhɛnɛ Baa Kilɛ di wu pye: «Pa ni yee taanri nushɔ nigin ni, ni yee taanri sikashɔ nigin, ni yee taanri dubyapoo nigin, ni xobanra nigin ni gbegbeshazhibige nigin ni». 10 A Abirama di ba ni yee yaŋmuyɔ yi bɛɛri ni Kilɛ mu, na yi bɛɛri ja ja niŋɛ ke ni na pye taaya shuun shuun, na yee taaya yi yaha yaha na saha ni yiyɛ ni, ga wu ya ta shazhɛɛrɛ ti wo xaara ti ja niŋɛ ni wɛ. 11 A xaara xa xa shazhɛɛyɛ ya di ganha na diri na ma tee xaara ti fɛni, ga a Abirama di ganha na yi kɔri.
12 Cadogo ki na, a ŋmunumɔ nigbɔ pa di ba Abirama ta. Wee tuun wu ni a fyaara nibiigbɔhɔ ka di jé wu ni. 13 Ayiwa a Tɛhɛnɛ Baa Kilɛ di Abirama pye: «Li cɛ fiinŋɛ na ma tirige shɛɛn pu na ba nadadɛɛnrɛ pye fiige ka ni, kemu ɲɛ pu wogo wɛ. Pee na ba pu pye buloo, na pu kanha xuuni yee xhuu shishɛɛrɛ (400) funŋɔ ni.* 14 Ga nɛ na ba kiiri kɔn kee fiige ki shɛɛn pu na, pee piimu pʼa pu pye buloo ge, lee kadugo na pu ni naafuu nigbɔ na ba foro kee fiige ki ni.* 15 Mu wi ge, ma na ba shɛ binnɛ ni ma sefɛlɛɛ pu ni ɲaɲiŋɛ na. Ma na ba sii lɛ xuuni na da xu pʼa ma ɲuŋɔ ŋmɔhɔ. 16 Ma shi wu segee ga ba nɔ shishɛɛrɛ na tuun wemu ni, ma tirige shɛɛn pu na ba guri ba naha ke fiige ke ninuŋɔ ni, bani Amɔri shi shɛɛn pu wo kakuuŋɔɔ ki sanha nɔ pu pu kɔri wɛ, ki sanha kasa ye wɛ.»
17 Ba caŋa kʼa to wɛ, a nibiige ki bɛ di bɛlɛ, wee tuun wu ni a naɲiŋɛ ni wurege wo kanra la di ba doro xaara ti taaya yi tɛ wu ni. 18 Kee caŋa ke Tɛhɛnɛ Baa Kilɛ ya kariɲɛɛgɛ ɲɔmɛɛ lɔ Abirama mu na jo: «Nɛ ke fiige ke kan ma tirige shɛɛn pu mu, ma lɔ Misira fiige ki wo gba wu na fo na shɛ nɔ gbagbɔ wu na, Efirate gba we.* 19 Keni shi shɛɛn, ni Kenizi shi shɛɛn, ni Kadimoni shi shɛɛn, 20 ni Xhɛti shi shɛɛn, ni Ferɛzi shi shɛɛn, ni Erefa shi shɛɛn, 21 ni Amɔri shi shɛɛn, ni Kana shɛɛn, ni Girigazi shɛɛn ni Zhebusi shɛɛn wo fiige ke.»