Abirama ya Lɔti ɲuŋɔ wolo
14
Ayiwa, Shinari shɛɛn saan Amurafɛli, ni Elasari shɛɛn saan Ariyɔki, ni Elamu shɛɛn saan Kedɔlɔmɛri, ni Goyimu shɛɛn saan Tideyali, pee wo caŋa ɲii li ni, 2 pee ya pa kashɛn ŋmɔ ni saannaa pii ni, pee ɲɛ: Sodɔmu saan Bera, ni Gɔmɔɔri saan Birisa, ni Sineyabi saan Adima, ni Sɛmɛbɛri saan Zeboyimu, ni Bela saan. Wee Bela we ninumɔ wu ɲɛ Zowari. 3 Pee saannaa pii bɛɛri bi puyɛ pinnɛ Sidimu fadaaŋa ki na, wee xuu we niɲaa wo wu ɲɛ Suumɔ Loxugo ke. 4 Pʼa bi kuu saannaa Kedɔlɔmɛri mu fo yee kɛ ni shuun. Yee kɛ ni taanri wuu li na, a pʼi nʼa she le puyɛ ni. 5 Yee kɛ ni shishɛɛrɛ wuu li na a Kedɔlɔmɛri di foro ni wu wɔɲii saannaa pu ni. A pʼi se ta Erefa shi shɛɛn pu na Ashitaroti-Karinayimu ni, na se ta Zuziti shɛɛn na Kamu ni, na se ta Emimu shɛɛn na Shawe-Kiriyatayimu ni, 6 na se ta Ɔri shɛɛn na pu wo faaboboyo yi ni Seyiri ni, na daha pu fɛni fo na shɛ nɔ Ɛli-Paran ni, wee xuu wu ɲɛ siwaga ki tàan. 7 Lee kadugo na, a pʼi guri pa Eyini-Mishipa ni, wee xuu wu pʼa byi sanha na Kadɛsi. A pʼi se ta Amalɛki shi wu na, na pu fiige ki bɛɛri co. A pʼi se ta Amɔri shi wu bɛ na pee piimu pu bye Azazɔn-Tamari ni ge.8 Ayiwa a Sodɔmu wo saan wʼi foro na fara Gɔmɔɔri wo saan wu na ni Adima wo saan we ni Zeboyimu wo saan we ni Bela wo saan we. Bela kulo li pʼa bi sanha na Zowari. A pee saannaa pʼi foro taanni Sidimu fadaaŋa ki na kɔnhɔ pʼi kashɛn ŋmɔ ni 9 Elamu saan Kedɔlɔmɛri ni Goyimu saan Tideyali ni Shinari saan Amurafɛli ni Elasari saan Ariyɔki ni. A pee saannaa shishɛɛrɛ wu kashɛn ki ŋmɔ ni saannaa kaguro ni.
10 Sidimu kpɛɛngɛ ki bɛɛri ki bye kuro wegeye. A Sodɔmu ni Gɔmɔɔri wo saannaa pu tafɛrɛ wuu di shɛ do kee wegeye kʼa ni. A sipyiire tisara di baa kari faaboboyo yi na. 11 A pu javɛɛ pʼi Sodɔmu ni Gɔmɔɔri naafuu wu bɛɛri ni pu ɲɔlige ki bɛɛri kuu na kari. 12 Abirama ceborona ja Lɔti bɛ bi bye wà Sodɔmu ni. A pu nigariwuu di gari ni wee ni wu keŋɛ yaŋmuyɔ bɛɛri ni. 13 A sipya wa di shɔ, na baa shɛ yee ɲaha jo Abirama mu. Abirama bi bye Heburuu shi shɛn we. Wee bi tiin Mamure wo katiiye yi tàan. Amɔri shi shɛn wu bye Mamure, wu cebooloo pu bye Ɛsikɔli ni Anɛri. Pee shɛɛn taanri wu bye ni Abirama ni kariɲɛɛgɛ ni. 14 Tuun wemu ni Abirama ya yi logo na pʼa kari ni Lɔti ni wu keŋɛ yaŋmuyɔ yi bɛɛri ni bulooro ni ge, a wu buloo xhuu taanri ni kɛ ni gbarataanri (318) lɔ, piimu pʼa se wu puga, a wu pu kalaa, pu logoo dʼa waha ge. A wu yìri ni pee ni na kashɛn yɛrɛyɛ lɔ, na saannaa pu nɔhɔ niinɛ fo na shɛ nɔ Dan ni. 15 A Abirama di wu kashɛn keŋɛ ki taa taa. Na kashɛn kɔɔn pii saannaa pii na nibiiye ni fo na já pu na. Na pu niinɛ fo na shɛ nɔ Koba ni. Wee ɲɛ Damasi Kilɛ-parama pu ni. 16 Naafuu wemu bɛɛri pʼa bi kuu ge, a wu wee bɛɛri shɔ pu na ma kuri pa. A wu ba ni wu ceborona ja Lɔti bɛ ni, ni wu naafuu we, ni cèe ni sipyiire ti sara bɛɛri.
Mɛlikisedɛki ya duba pye Abirama mu
17 Ba Abirama ya se ta Kedɔlɔmɛri ni wu wɔɲii saannaa pu na na guri na ma wɛ, a Sodɔmu saan wu foro na shɛ wu ɲuŋɔ círi Shawe fadaaŋa ki na. Kee ɲɛ saan wu wo fadaaŋa ke. 18 Mɛlikisedɛki we wu ɲɛ Salɛmu saan ni Kilɛ-gbɔtabaaga wo saraya ɲaha shɔɔnrivɔɔ ge, a wee di shɛ buuri ni duvɛn kan pu mu. 19 A wu duba pye Abirama mu na:
«Kilɛ-gbɔtabaaga ki duba Abirama mu,
fugba ni ɲiŋɛ ki Yaavɔɔ we.
20 Masɔŋɔ ki ɲɛ mu wogo Kilɛ-gbɔtabaaga,
mu wemu wʼa Abirama wo pɛɛn pu le wu keŋɛ ni ge.»
A Abirama di yaŋmuyɔ yi bɛɛri jagi wolo kan wu mu.
21 A Sodɔmu saan wu Abirama pye: «Sipyii pu yɛ kan na mu, mʼa naafuu wu ta.» 22 A Abirama di wu ɲɔ shɔ na: «Nɛ kàa Tɛhɛnɛ Baa Kilɛ na, Kilɛ-gbɔtabaaga, fugba ni ɲiŋɛ Yaavɔɔ wu na, 23 jo nɛ da ga mu yaŋmunɔ la shishiin bɛ lɔ wɛ, ali ma lize mɛɛrɛ kelee ma tanhaŋa mɛɛrɛ le la bɛ wɛ. Kɔnhɔ ma ganha ba jo na mu wʼa Abirama pye naafuu fɔɔ wɛ. 24 Nʼa da yafiin bɛ shɔ ma mu wɛ fo lemu yɛ nɛ wo lɛvɛɛ pʼa li ge. Na fara lee na, na kariɲii piimu pʼa shɛ na tɛgɛ ge, Anɛri ni Ɛsikɔli ni Mamure, pee bɛ na pu wo tahaa lɔ.»