Abirama ni Lɔti ya waagi
13
Ayiwa, a Abirama di yìri Misira fiige ki ni, na gari Nɛgɛvu kacɛ ki na, wu ni wu shɔ we, ni wu yaŋmuyɔ yi bɛɛri. A Lɔti bɛ di gari ni wu ni.2 Naafuugbɔ fɔɔ wu bye Abirama, yapɔrɔyɔ niɲɛhɛyɛ yi bye wu mu, ni wari, ni sanni. 3 A wu yìri Nɛgɛvu kacɛ ki na, na ganha na dɛn na gaaŋi fo na shɛ nɔ Bɛtɛli ni, xuu wemu ni wʼa bi fɛnhɛ tiin Bɛtɛli ni Ayi tɛ wu ni ge, fo wee xuu wu ni. 4 Abirama bi fɛnhɛ saraya tawologo ka yàa wà wee xuu wu ni. A wu Kilɛ pɛlɛ wà na wu mɛgɛ yiri na Tɛhɛnɛ Baa Kilɛ. 5 Lɔti wemu wu bi ɲaari ni Abirama ni ge, yatɔɔbya ni niiyɛ, ni fàya piyɛyɛ yi bye wee bɛ mu. 6 Lee funŋɔ ni a fiige kʼi jɛ́rɛ pu ni, bani pu keŋɛ yaŋmuyɔ yʼa ɲɛhɛ ɲɛhɛgana lemu na ge, pu shuun wu bɛɛri da tatɛɛngɛ ta puyɛ tàan wɛ. 7 A yogo di ba jé caŋa ka Abirama wo yapɔrɔnahamaa pee ni Lɔti wo yapɔrɔnahamaa pu tɛ ni. Kana shɛɛn ni Ferɛzi shɛɛn bɛ pu bye wee tuun we ni kee fiige ki ni.
8 A Abirama di Lɔti pye: «Yogo ya yaa nɛ ni mu tɛ ni wɛ, yogo di ya yaa nɛ wo yapɔrɔnahamaa pee ni mu wuu pu tɛ ni wɛ. Nʼa ma ɲɛɛri lee na, bani cebooloo wèe ɲɛ. 9 Go fiige ki bɛɛri ki ɲɛ mu kacɛ na. Wù laha wùyɛ na: ma bu shɛ kamɛnɛ cɛ, nɛ na zhɛ kanige cɛ; ma shiin bu shɛ kanige cɛ, nɛ na zhɛ kamɛnɛ cɛ.» 10 A Lɔti di wu ɲuŋɔ ki yirige, na wii na Zhurudɛn fadaaŋa ki bɛɛri ta mura, lɔhɔ niɲɛhɛŋɛ ɲɛ wemu ni ge. Ki bye ba Tɛhɛnɛ Baa Kilɛ wo tiire tɛgɛ ki ɲɛ wɛ, ba Misira fiige ki ɲɛ wɛ, fo na shɛ nɔ Zowari* kulo li shizhaa wu na. Lee bi Tɛhɛnɛ Baa Kilɛ ta wu sanha Sodɔmu ni Gɔmɔɔri kyɛɛgi wɛ. 11 Wee tuun wu ni a Lɔti di Zhurudɛn Gba wu fadaaŋa ki bɛɛri lɔ, na yìri kari Kilɛ-nɔhɔ ki na. A pʼi laha puyɛ na lee lahagana li na. 12 A Abirama di diin Kana fiige ki ni. A Lɔti di shɛ diin Zhurudɛn Gba wu fadaaŋa ki kulogoo ki ni, na wu fàya piyɛyɛ yi pɔ Sodɔmu kulo li ni. 13 Wee tuun wu bi Sodɔmu shɛɛn pu ta pʼa sii kolo, jurumupyii pu bye pii Kilɛ ɲaha tàan.
14 Ba Lɔti ya laha Abirama tàan na kari wɛ, a Tɛhɛnɛ Baa Kilɛ di Abirama pye: «Xuu wemu ni ma wa ge, yere wà mʼa ma ɲuŋɔ ki yirige mʼa suumɔ kulo kacɛ ki wii, mʼa woroo kulo kacɛ ki wii, mʼa Kilɛ-nɔhɔ kacɛ ke ni caŋatomɔ kacɛ ki bɛ wii, 15 Fiige kemu bɛɛri mʼa ɲaa mɛ ge, nɛ na ba kee kan ma ni ma shi wu mu. Kee na ba bye yi wogo fo gbee.* 16 Nɛ na ba ma shi wu ɲɛhɛ na pye ba gbazhɛnhɛpya ɲɛ wɛ. Ni sipya ya já ɲiŋɛ ke gbazhɛnhɛpya wu bɛɛri tɔrɔ wɛ, sipya da ba já ma shi wu tɔrɔ wɛ. 17 Yìri mʼa fiige ki ɲaari, mʼa ki tɔɔngɔ ni ki pɛɛrɛ ti wii, bani ke fiige ke nʼa da ba gan ma mu.» 18 A Abirama di wu fàya piyɛyɛ yi kɔɔngi, na shɛ diin Mamure wo katiiye yi tàan. Wee xuu wu wa Eburɔn kulo li kabanugo. A wu saraya nizogoyo tawologo ka yàa wee xuu wu bɛ ni Tɛhɛnɛ Baa Kilɛ mu, na wu pɛlɛ.