Kilɛ ya Abirama pye na wu yìri shɛ Kana fiige ki ni
12
Ayiwa, caŋa ka a Tɛhɛnɛ Baa Kilɛ di ba Abirama pye: «Foro ma fiige ke, ni ma to puga ki ni, ma cebooloo pu niŋɛ ni. Fiige ke nʼa da ba zhɛ ma na ge, mʼa shɛ kee ni.*2 ‹Nɛ na ba shi niɲɛhɛmɛ yeege ma ni.
Nɛ na ba duba ma mu,
di ma pye mɛgbɔhɔ fɔɔ.
Duba na ba daa ma gbɔɔrɔ ni.
3 Piimu ba duba pye ma mu,
nɛ na duba pee mu.
Piimu ba ma laŋi,
nɛ na ba pee laŋi.
Kpɔnhɔɔ kiimu ki wa ɲiŋɛ ki na ge,
kee bɛɛri na ba duba ta ma gbɔɔrɔ ni.› »*
4 A Abirama di gari ba Tɛhɛnɛ Baa Kilɛ ya yi jo wu mu jogana lemu na wɛ. A Lɔti bɛ di gari ni wu ni. Tuun wemu ni Abirama bi fòro Karan fiige ki ni ge, wu yee bi bye kɛlɛɛ gbarashuun ni kaguro (75). 5 A Abirama di wu shɔ Sarayi ni wu ceborona ja Lɔti lɔ, ni wu naafuu wu bɛɛri, ni wu buloo pu bɛɛri. Wʼa bi pee ta na wu yaha Karan ni. A pʼi yìri wà na gaaŋi Kana fiige ki ni. A pʼi shɛ nɔ wà.
6 A Abirama di kee fiige ki ja toro, na gari fo na shɛ nɔ More wo sesun tiye yi na, Sisɛmu kulo li ni. Kana shɛɛn pu bye kee fiige ke ni wee tuun wu ni. 7 A Tɛhɛnɛ Baa Kilɛ di wuyɛ shɛ Abirama na na wu pye: «Nɛ na ba ke fiige ke kan ma kadugo yíri shi shɛn mu.» Tɛhɛnɛ Baa Kilɛ ya wuyɛ shɛ wu na xuu wemu ni ge, a wu saraya tawologo yàa wee xuu wu ni Kilɛ mu.
8 Lee kadugo na a wu yìri wee xuu wu ni, na gari Bɛtɛli Kilɛ-nɔhɔ ki na faaya yi ni. A wu shɛ wu fàya puga ki sin Bɛtɛli ni Ayi tɛ wu ni, Bɛtɛli ɲɛ caŋatomɔ pu ni, Ayi di ɲɛ Kilɛ-nɔhɔ ki na. A wu saraya tawologo ka bɛ yàa wà, na Kilɛ pɛlɛ na wu mɛgɛ yiri na Tɛhɛnɛ Baa Kilɛ. 9 Lee kadugo na a Abirama di ganha na wu fàya piyɛyɛ yi sinni na gaaŋi woroo kulo kacɛ ki na. Pee koomɔ pu mɛgɛ ɲɛ Nɛgɛvu.
10 A xuugo di ba jé kee fiige ki ni a Abirama di yìri kari Misira fiige ki ni, na shɛ diin wà bani xuugo ki bi kolo xuuni. 11 Ba Abirama ya shɛ dɛɛŋɛ Misira fiige ki na wɛ, na wu shɔ Sarayi pye: «Wii, nɛ li cɛ jo cesaama mu ɲɛ. 12 Ayiwa, Misira shɛɛn ba shɛ ma ɲa, pu na jo: ‹Wu shɔ wʼa wii›. Pu na ba na gbo na mu ɲìi wo yaha. 13 Lee wuu na, nʼa ma ɲɛɛri jo ma shɛ pu pye na nɛ ceboroshɔ ma wa, kɔnhɔ pʼi na co ɲɔ ma wuu na, mʼa nugo pye kaɲuŋɔ di ɲiifɛɛrɛ bɛ pye sanha.»*
14 Ba Abirama shiin ya nɔ Misira fiige ki ni wɛ, a Misira shɛɛn pʼi li ɲa na wu shɔ wʼa sii ɲɔ fo xuuni. 15 A Farawɔn wo kaaŋa ki ɲuŋɔfɛɛ pii bɛ di wu sɛɛri, na shɛ wu saana li jo Farawɔn mu, a pʼi wee cee wu co shɛ Farawɔn piyɛyɛ yi ni.
16 A Farawɔn di saama pye Abirama mu wee cee wu wuu na. A wu yatɔɔyɔ, ni niiyɛ, ni kafabee, ni kapyebyii namaa ni pushaa, ni kafazhaa ni ɲɔhɔyɔ kan Abirama mu. 17 Ga a Tɛhɛnɛ Baa Kilɛ di kanhama nigbɔɔ shan Farawɔn ni wu puga shɛɛn pu ɲuŋɔ ni Abirama shɔ Sarayi wuu na.
18 We tuun wu ni, a Farawɔn di Abirama yiri na wu pye: «Ɲaha mu dʼa pye nɛ na mɛ wɛ? Ɲaha na mu di ya ta yi jo nɛ mu na mu shɔ wu ɲɛ wii-i wɛ? 19 Ɲaha na ma dʼa na pye na ma ceboroshɔ wu ɲɛ wii wɛ? Lee lʼa nɛ pye nɛ wu lɔ di bye na shɔ. Ayiwa ma shɔ wu we, wu lɔ mʼa yìri laha naha.»
20 A Farawɔn di tuduro kan wu wo sipyii pu mu na pu Abirama, ni wu shɔ ni wu yaŋmuyɔ yi bɛɛri yaha kari.