Babɛli wo zangasotɔɔngɔ ke
11
Taashiinɛ li ni, koŋɔ ki sipyii pu bɛɛri pu bi shi jomɔ nigin yu. 2 A pʼi ba yìri Kilɛ-nɔhɔ kacɛ ki na caŋa ka na gaaŋi, na shɛ nɔ kpɛɛngbɔhɔ ka na Shinari fiige ki ni. A pʼi diin wà.3 Caŋa ka a pʼi ba puyɛ pye na: «Yi pa wù dufaan shan, wù wu fɔ́.» A dufaan wu bye pu mu faaya tɛgɛ ni, a ɲiŋɛ ki mani wu bye pu mu puuro tɛgɛ ni. 4 A pʼi jo: «Yi pa wù kulo la sin, wù zangasotɔɔngɔ ka yàa kemu ɲidii ya nɔni Kilɛ we na ge. Lee na bye kaɲuŋɔ wù na mɛgbɔhɔ ta, kɔnhɔ wù ganha bu jaaga ɲiŋɛ ki bɛɛri na wɛ.»
5 Ayiwa, a Tɛhɛnɛ Baa Kilɛ di digi na pa lee kulo le, ni kee zangasotɔɔngɔ ki wii, yee yemu sipyii pʼa bi yari ge. 6 A wu jo: «Li wii, pu bɛɛri pu ɲɛ shinumɔ, pu bɛɛri pʼa shi jomɔ nigin yu. Lemu ɲɔ pʼa kɔn ge, lee li wa le mɛ. Ayiwa nimɛ, pu bu kaa lemu bɛɛri ɲɔ wolo na pʼi lee pye, yafiin wa da já pu ɲaha kɔn li bye na wɛ. 7 Wù tigi wù shɛ pu jomɔ pu wuregi, kɔnhɔ pu ganha ba puyɛ jomɔ nuri nige wɛ.»
8 A Tɛhɛnɛ Baa Kilɛ di pu bɛɛri caaga na laha wee xuu wu ni, na taga ɲiŋɛ ki bɛɛri círi. A pʼi lee kulo li wo yereŋɛ wu ɲɔ yaha. 9 Lee na pʼa lee kulo li mɛgɛ le na Babɛlia, bani wee xuu wu ni Tɛhɛnɛ Baa Kilɛ ya ɲiŋɛ ki sipyii pu jomɔ pu wuregi, na pu caaga na laha wee xuu wu ni na taga ɲiŋɛ ki bɛɛri círi.
Sɛmu wo tirige shɛɛn pee
10 Sɛmu wo tirige shɛɛn pu piiri:
Na Sɛmu shi wu yaha yee xhuu nigin (100) na, a wu Aripakisadi se. Lee ya pye logbɔhɔ ki yeetoronɔ li shuun wuu. 11 Aripakisadi na se xɔ, a Sɛmu di yee xhuu kaguro (500) pye sanha. A wu jalaa piitiilee bɛ ni pushaa pii se.
12 Ba Aripakisadi ya yee kɛlɛɛ taanri ni kaguro (35) ta wɛ, na Selaki se. 13 Selaki na se xɔ, a Aripakisadi di yee xhuu shishɛɛrɛ ni taanri (403) pye sanha. A wu jalaa piitiilee bɛ ni pushaa pii se.
14 Ba Selaki ya yee kɛlɛɛ taanri (30) ta wɛ, na Hɛbɛri se. 15 Hɛbɛri na se xɔ, a Selaki di yee xhuu shishɛɛrɛ ni yee taanri (403) pye sanha. A wu jalaa piitiilee bɛ ni pushaa pii se.
16 Ba Hɛbɛri ya yee kɛlɛɛ taanri ni shishɛɛrɛ (34) ta wɛ, na Pɛlɛgi se. 17 Pɛlɛgi na se xɔ, a Hɛbɛri di yee xhuu shishɛɛrɛ ni kɛlɛɛ taanri (430) pye sanha. A wu jalaa piitiilee bɛ ni pushaa pii se.
18 Ba Pɛlɛgi ya yee kɛlɛɛ taanri (30) ta wɛ, na Eregu se. 19 Eregu na se xɔ, a Pɛlɛgi di yee xhuu shuun ni gbarashɛɛrɛ (209) pye sanha. A wu jalaa piitiilee bɛ ni pushaa pii se.
20 Ba Eregu ya yee kɛlɛɛ taanri ni shuun (32) ta wɛ, na Serugi se. 21 Serugi na se xɔ, a Eregu di yee xhuu shuun ni gbarashuun (207) pye sanha. A wu jalaa piitiilee bɛ ni pushaa pii se.
22 Ba Serugi ya yee kɛlɛɛ taanri (30) ta wɛ, na Nakɔri se. 23 Nakɔri na se xɔ, a Serugi di yee xhuu shuun (200) pye sanha. A wu jalaa piitiilee bɛ ni pushaa pii se.
24 Ba Nakɔri ya yee kɛlɛɛ shuun ni gbarashɛɛrɛ (29) ta wɛ, na Teraki se. 25 Teraki na se xɔ, a Nakɔri di yee xhuu nigin ni kɛ ni gbarashɛɛrɛ (119) pye sanha. A wu jalaa piitiilee bɛ ni pushaa pii se.
26 Ba Teraki ya yee kɛlɛɛ gbarashuun (70) ta wɛ, na Abirama ni Nakɔri ni Xharan se.
27 Teraki wo tirige shɛɛn pu piiri:
Teraki wʼa Abirama ni Nakɔri ni Xharan se. A Xharan di Lɔti se. 28 A Xharan di ba xhu wu to Teraki wu ɲaha na Uri kulo li ni, wu to kulo le Kalide fiige ki ni. 29 A Abirama ni Nakɔri di ba cèe leŋɛ. Abirama wo shɔ wu mɛgɛ ki bye na Sarayi. Nakɔri wo wu mɛgɛ di ɲɛ na Milika. Xharan poro wu bye wii. Xharan wu bye Milika ni Jisika wo to. 30 Sarayi di bi bye seganha, a wu bye pya baa.
31 Ayiwa, a Teraki di wu ja Abirama ni wu ɲabige Lɔti lɔ, wee wemu wu ɲɛ wu ja Xharan wo ja wu ge, ni wu jashɔ Sarayi, Abirama wo shɔ we. A pʼi yìri laha Uri kulo li ni, Kalide fiige ki ni, na gaaŋi Kana fiige ki ni. Ga, ba pʼa shɛ nɔ Karan kulo li ni wɛ, na diin wà.
32 Shi wemu Teraki ya ta ge, wee ya pye yee xhuu shuun ni kaguro (205). A wu xhu Karan kulo li ni.