Nuxhun jalaa pu wo tirige shɛɛn pee
10
Ayiwa, ba logbɔhɔ kʼa toro wɛ, jalaa piimu Nuxhun ya ta ge, Sɛmu ni Kamu ni Zhafɛti ni, a pee bɛ di jalaa pii se. Pee wo tirige shɛɛn pu wa piiri:2 Zhafɛti wo nagoo pu ɲɛ Gomɛɛri, Magɔgi, Madayi, Zhavan, Tubali, Mɛsɛki ni Tirasi.
3 Gomɛɛri wo jalaa pu ɲɛ, Asikenazi, Irifati ni Togarima.
4 Zhavan wo nagoo pu ɲɛ, Elisha, Tarisi, Kitimi ni Orodanimi.a
5 Pee wo tirige shɛɛn pʼa caaga na shɛ diin suumɔ lɔhɔyɔ yi ɲɔ na, wa bɛɛri ni wu fiige na saha ni wu shi jomɔ ni, ni wu shi shɛɛn ni wu gbawege. 6 Kamu wo jalaa pu ɲɛ Kusi, Misiramu, Puti, ni Kana. 7 Kusi wo jalaa pu ɲɛ: Seba, ni Xhavila, ni Sabita, ni Arama ni Sabiteka. Arama wo jalaa pu ɲɛ: Sheba ni Dedan.
8 A Kusi di ba ja watii bɛ se wemu mɛgɛ ki bye na Nimirodi ge. Wee wʼa pye fanhafeshiimɛ baraga wo ɲiŋɛ ki na. 9 Lozo naŋmere li bye lii Tɛhɛnɛ Baa Kilɛ ɲaha tàan. Lee na pʼa yu na: «Lozo naŋmere Tɛhɛnɛ Baa Kilɛ ɲaha tàan ba Nimirodi ɲɛ wɛ.» 10 Wu wo saanra ti fanha kulogoo kʼa pye Babɛli, ni Erɛki, ni Akadi, ni Kaline, Shinari fiige ki ni. 11 A wu yíri wà kee fiige ki ni, na gari Asiri fiige ki ni, na shɛ kii kulogoo kii yereŋɛ: Ninive, ni Oroboti-Iri, ni Kela. Ninive kulo li bye kugbɔɔ lemu lʼa fɛrɛ ge. 12 A wu Eresɛni kulo li bɛ yereŋɛ Ninive ni Kela kugbɔɔ li tɛ wu ni.
13 Misiramu wʼa pye Ludimi shɛɛn, ni Anamite shɛɛn, ni Leyabimu shɛɛn, ni Nafutimu shɛɛn, 14 ni Paturusi shɛɛn, ni Kasilu shɛɛn wo tolɛ we. A Filisiti shɛɛn ni Kafitɔri shɛɛn di foro Kasilu ni.
15 A Kana di Sidɔn se, wee wʼa pye wu jashiimɛ. Lee kadugo na, a wu Xhɛti taha wà, 16 ni Zhebusi shɛɛn, ni Amɔri shɛɛn, ni Girigazi shɛɛn, 17 ni Xhɛvi shɛɛn, ni Ariki shɛɛn, ni Sinɛ shɛɛn, 18 ni Arivadi shɛɛn, ni Shemari shɛɛn ni Amati shɛɛn. Lee kadugo na a Kana shi shɛɛn pu wo gbaweye yʼi ba jaaga. 19 Kana shɛɛn wo fiige kʼa bi lɔ Sidɔn na na kari Gerari kacɛ ki na, fo na shɛ nɔ Gaza na, na lɔ Sodɔmu kacɛ ki na, ni Gɔmɔɔri, ni Adima, ni Zeboyimu ni, fo na shɛ nɔ Lesha na. 20 Pee pʼa pye Kamu wo kadugo nagoo pee na saha ni pu gbaweye, ni pu jomɔ pu ni, pu wo fiiye ye, ni pu shi wu ni.
21 A Zhafɛti ɲahafɔɔ Sɛmu bɛ di jalaa pii se. Wee Sɛmu wu wʼa pye Hɛbɛri shi wu bɛɛri wo tolɛ.
22 Pii pʼa pye Sɛmu wo jalaa pee: Elamu, Asuuri, Aripakisadi, Ludi ni Aramu.
23 A Aramu wo nagoo pʼi bye Uzi, ni Uli, ni Getɛri, ni Mashi.
24 A Aripakisadi di Selaki se, a Selaki di Hɛbɛri se. 25 Jalaa shuun Hɛbɛri ya se. Nizhiimɛ wu mɛgɛ ki bye na Pɛlɛgi, bani wee wo caŋa ɲii li ni ɲiŋɛ kʼa taa. Wee wo cuun wu mɛgɛ ki bye na Yokitan.
26 A Yokitan wo jalaa pʼi bye Alimodadi, ni Shelefu, ni Azarimavɛti, ni Zheraki, 27 ni Adoramu, ni Uzali, ni Dikila, 28 ni Obali, ni Abimayɛli, ni Seba, 29 ni Ofiri, ni Xhavila, ni Yobabu. Pee bɛɛri pu bye Yokitan wo jalaa. 30 Pee wo tatɛɛngɛ kʼa bi lɔ Mesha na na kari fo Sefari yíri, Kilɛ nɔhɔ faaboboyo yi shizhaa wu na. 31 Pee pʼa pye Sɛmu wo kadugo nagoo pee, na saha ni pu gbaweye ni pu jomɔ pu ni, pu wo fiiye ye, ni pu shi wu ni.
32 Ye yʼa pye Nuxhun jalaa pu wo gbaweye ye, na saha ni pu kpɔnhɔɔ kee ni pu shi wu ni. Logbɔhɔ ki nidorogo na, pee ni shi wu bɛɛri ya foro, na caaga ɲiŋɛ ki na.