Kilɛ ya kariɲɛɛgɛ ɲɔmɛɛ lemu lɔ Nuxhun mu ge
9
Ayiwa a Kilɛ di duba Nuxhun ni wu jalaa pu mu, na pu pye: «Yi nagoo se, pʼi ɲɛhɛ, pʼi ɲiŋɛ ki ɲi!* 2 Yi na ba bye fyaara ni funbɛnyaaya, ɲiŋɛ xaara ti bɛɛri, ni shazhɛɛrɛ, ni ɲiŋɛ yakokaara ti bɛɛri, ni fyaa bɛɛri mu, yi bɛɛri wa le yi keŋɛ ni. 3 Munahaa yaŋmuyɔ yi bɛɛri yʼa ɲɛri ɲiŋɛ ki na ge, nʼa yi bɛɛri kan yi mu nimɛ, yʼi bye yi ɲɔlige, ba na shinma kan yi mu wɛ.*4 «Ga yi ganha da xaara ni ti munaa xa wɛ, lee kɔ́ri ɲɛ ti shishan bu gori ti ni.* 5 Yi shishan pe pu wa yi munaa le ge, nɛ na ba pee kaa yege yi mu. Naŋa yaaga bɛɛri kʼa sipya gbo ge, nɛ na ba pu kaa yege kee mu. Sipya bɛ bu wu sipyiɲii gbo, nɛ na ba pu kaa yege wee bɛ mu.
6 «Wa bu wu sipyiɲii gbo, sipya wa na ba wee bɛ gbo, bani Kilɛ wʼa sipya yàa wuyɛ jaa ni.
7 «Yee pu pye sege fɛɛ! Yʼi nagoo ta xuuni! Yʼi jaaga ɲiŋɛ ki na!»
8 A Kilɛ di Nuxhun ni wu jalaa pu pye sanha: 9 «Nɛ wa na kariɲɛɛgɛ ɲɔmɛɛ li lɔ yi ni yi shi wu mu, we wʼa ma yi kadugo ge, 10 ni ɲìi yaŋmuyɔ ye yi wa yi mu wà ge, shazhɛɛrɛ, ni yapɔrɔyɔ, ni sige yaŋmuyɔ yemu yi wa yi mu wà ge, yaaga yaaga kʼa foro kɔrɔgɔ ki ni ge, ɲiŋɛ xaara ti bɛɛri. 11 Nʼa na kariɲɛɛgɛ ɲɔmɛɛ li lɔ yee mu jo: ceexaara ta shishiin da ga gyɛɛgi ni logbɔhɔ ni bada sanha wɛ. Logbɔhɔ da ga ɲiŋɛ kyɛɛgi sanha bada wɛ.»
12 A Kilɛ di jo: «Ɲɔmɛɛ le nʼa da lɔ lʼi bye nɛ ni yi tɛ ni, ni ɲìi yaŋmuyɔ ye ni yi shi nibama wu ni ge, lee ɲɔmɛɛ li wo ɲaha shɛshɛɛrɛ ti wa da bye te: 13 nʼa da Kilɛ-ŋmɔpara yaha ɲahaya ye ni. Lee na ba bye kariɲɛɛgɛ ɲɔmɛɛ li ɲaha shɛshɛɛrɛ nɛ ni ɲiŋɛ ki tɛ ni. 14 Kilɛ ba wɔ tuun wemu ni, Kilɛ-ŋmɔpara li na ba bye ɲahaya yi ni. 15 Nɛ na ba na funŋɔ to na kariɲɛɛgɛ ɲɔmɛɛ li na, lee lemu li wa nɛ ni yi tɛ ni, ni ɲìi yaŋmuyɔ yi tuuyo yi bɛɛri ni ge. Logbɔhɔ da ga ceexaara kyɛɛgi nige ɲiŋɛ ki na bada wɛ. 16 Kilɛ-ŋmɔpara na ba bye ɲahaya ye ni. Nɛ na ba lee wii, kɔnhɔ na funŋɔ di da dun na kariɲɛɛgɛ ɲɔmɛɛ nixhɔbaana li na, lemu li ɲɛ nɛ ni ɲiŋɛ ki munahaa yaara ti bɛɛri tɛ ni ge.»
17 A Kilɛ di Nuxhun pye: «Kariɲɛɛgɛ ɲɔmɛɛ le nɛ lɔ lʼi bye nɛ ni ɲiŋɛ ki munahaa yaara ti bɛɛri tɛ ni ge, lee wo ɲaha shɛshɛɛrɛ ti wa Kilɛ wo ŋmɔpara le.»
18 Nuxhun jalaa piimu pʼa foro kɔrɔgɔ ki ni ge, pu mɛyɛ yi wa ye: Sɛmu, ni Kamu, ni Zhafɛti. Kamu ɲɛ Kana wo to. 19 Pii pu ɲɛ Nuxhun wo jalaa taanri we. Pee wo nagoo pʼa caaga ɲiŋɛ ki bɛɛri na.
20 Ayiwa, a Nuxhun di faa ɲɔ kɔn na byi. A wu ɛrɛzɛn kɛrɛyɛ shan. 21 Caŋa ka, a Nuxhun di ba duvɛn gba na ɲawɔhɔ wɔ wuyɛ na, na sinnɛ fàya baa wu fàya puga ki ni. 22 A Kana to Kamu di wu to Nuxhun fàya baa wo wu ɲa, na shɛ yee paari wu ɲahafɛɛ shuun wu mu kpɛɛngɛ ki na. 23 Ga a Sɛmu ni Zhafɛti di pu to wu fadeboroŋɔ ka lɔ taha pu kapaya na, na ganha na ɲaari na gaaŋi kaduma, na shɛ pu to wu tɔ ni kee ni. Pʼa bi kaduyo le pu to wu ni, a pʼi bye pu ya wu fàya baa wo ɲa wɛ.
24 Ayiwa, ba duvɛn wʼa pa Nuxhun yaha wɛ, wu kurogo ja wʼa lemu pye wu na ge, a wu lee cɛ. 25 A wu jo:
«Kana ya laŋi,
Wu na ba bye wu ceboronamaa
pu wo buloo pu bɛɛri wo bulo.»
26 A wu jo sanha na:
«Pɛɛŋɛ ki taha Tɛhɛnɛ Baa Kilɛ na,
Sɛmu wo Kilɛ we!
Kana na ba bye Sɛmu wo bulo.
27 Kilɛ wu Zhafɛtia le fɛrɛmɛ ni,
wu wu teŋɛ Sɛmu wo fàya piyɛyɛ yi ni,
Kana di bye wu bulo».
28 Ayiwa, logbɔhɔ ki na toro xɔ, a Nuxhun di yee xhuu taanri ni kɛlɛɛ kaguro (350) pye sanha. 29 A Nuxhun shi wu bɛɛri di bye yee xhuu gbarashɛɛrɛ ni kɛlɛɛ kaguro (950), a wu xhu.