Logbɔhɔ kʼa tigi
8
Ayiwa, a Kilɛ di wu fungɔngɔ yaha Nuxhun, ni sige yaŋmuyɔ yi bɛɛri, ni yapɔrɔyɔ yi bɛɛri na, ye yʼa jé kɔrɔgɔ ki ni ni wu ni ge. A Kilɛ di kafɛɛgɛ yaha pa ɲiŋɛ ki na. A lɔhɔ kʼi digi. 2 A ɲiŋɛ nɔhɔdaan lobulowecogoyo ye ni fugba lɔhɔ ki tayahaya yi ɲɔ di dɔ; a zanha kʼi yere. 3 A lɔhɔ kʼi ganha na xhuu ɲiŋɛ ki na caŋa bɛɛri. Yebyaa kaguro nidorogo na, a lɔhɔ kʼi jɛrɛ. 4 Lee yee li yeŋɛ gbarashuun wogo ki cabyaa kɛ ni gbarashuun wu na, a kɔrɔgɔ kʼi shɛ yere Arara Faaboboŋɔ ki na. 5 A lɔhɔ kʼi ganha na xhuu na se, fo yeŋɛ kɛ wogo ke. Yeŋɛ kɛ wogo ki cabishiinɛ li na, a yaya yi ɲuyɔ di na na ɲaa.6 Lee kadugo na a cabyaa kɛlɛɛ shishɛɛrɛ (40) di doro, Nuxhun bi kafɛɛgɛ tajege kemu yaha kɔrɔgɔ ki na ge, a wu wee xuu wa ɲɔ mugi, 7 na kanraga yaha foro. A kanraga kʼi ganha na se na ma, fo lɔhɔ kʼa shɛ xhɔ ɲiŋɛ ki na. 8 A wu gbegbeshazhira bɛ yaha foro, kɔnhɔ wu li cɛ, lɔhɔ ki bi fanha ɲiŋɛ ki na. 9 Ga, gbegbeshazhira li ya ta tatogo ta ɲiŋɛ ki na wɛ. A lʼi guri shɛ Nuxhun yíri kɔrɔgɔ ki ni, bani lɔhɔ ki bye ɲiŋɛ ki bɛɛri na. A Nuxhun di wu keŋɛ yeege, na gbegbeshazhira li co na leŋɛ kɔrɔgɔ ki ni. 10 A Nuxhun di cabyaa gbarashuun wa bɛ pye sanha, na gbegbeshazhira li yaha foro kɔrɔgɔ ki ni sanha. 11 A gbegbeshazhira lʼi guri shɛ wu yíri yakoŋɔ ki ni ni oliviye tige wɛŋɛ niburege ni li ɲɔkpaanra ni. A Nuxhun di li cɛ lee na na lɔhɔ kʼa fanha ɲiŋɛ ki na. 12 A wu cabyaa gbarashuun wa bɛ pye sanha, na gbegbeshazhira li yaha foro sanha. Li ya ta kuri shɛ nige wu yíri wɛ.
Nuxhun ya foro kɔrɔgɔ ki ni
13 Nuxhun yee xhuu gbaara ni nigin (601) wu yeŋɛ nizhiige ki cabishiinɛ le, lee ya lɔhɔ ki ta kʼa waha ɲiŋɛ ki na. A Nuxhun di kɔrɔgɔ ki fugba wu mugi, na ɲiŋɛ ki wii, na ki fugba wu ta wʼa waha. 14 Yeŋɛ shuun wogo ki cabyaa kɛlɛɛ shuun ni gbarashuun (27) wu caŋa, ɲiŋɛ ki bi waha fɛɛfɛɛ.
15 A Kilɛ di Nuxhun pye: 16 «Foro kɔrɔgɔ ki ni ma ni ma shɔ we, ni ma jalaa pee, ni pu cèe pu ni, 17 ni ɲìi yaŋmuyɔ yi bɛɛri yi ɲɛ ni ma ni kɔrɔgɔ ki ni ge, shazhɛɛrɛ, ni ɲiŋɛ xaara, ni ɲiŋɛ yakokaara ti bɛɛri. Mʼa yi bɛɛri yeege, kɔnhɔ yʼi se yʼi ɲɛhɛ ɲiŋɛ ki na, yʼi ki ɲi.»
18 A Nuxhun di foro wu ni wu shɔ, ni wu jalaa, ni pu cèe. 19 A ɲiŋɛ xaara ti bɛɛri, ni ɲiŋɛ yakokaara ti bɛɛri, ni shazhɛɛrɛ ti bɛɛri, ni ɲìi yaŋmuyɔ yi bɛɛri yʼa ɲɛri ge, a yi bɛɛri di foro kɔrɔgɔ ki ni tuuyo tuuyo.
20 A Nuxhun di saraga tawologo yereŋɛ Tɛhɛnɛ Baa Kilɛ mu, na jo fɛfɛɛrɛ yaŋmuyɔ yi ni, ni fɛfɛɛrɛ shazhɛɛrɛ ti bɛɛri, na pye saraga nizogoŋɔ Kilɛ mu, saraga tawologo ki ɲuŋɔ ni. 21 A Tɛhɛnɛ Baa Kilɛ di kee nudanga ki logo, na jo wuyɛ funŋɔ ni na: «Nɛ da ga ɲiŋɛ laŋi nige sipya wuu na wɛ, bani sipya funŋɔ ya kolo fo wu nɔhɔpiire ni. Nɛ da ga ɲìi yaŋmuyɔ gbo nige, ma na jo ba nʼa yi gbo mɛ wɛ.»
22 «Ga na ɲiŋɛ yaha xɔ,
yemɛ ni yalɔɔrɔ,
wiire ni kafuyo,
ɲiŋmɔhɔ ni kpanga,
caŋa ni piige, yee da ga xhɔ wɛ.»