Nuxhun ya jé kɔrɔgɔ ki ni
7
Ayiwa, a Tɛhɛnɛ Baa Kilɛ di Nuxhun pye: «Jé ni ma kpuun li ni kɔrɔgɔ ki ni, bani mu yɛ nigin nɛ ɲa wʼa tii na ɲaha tàan, we tuun we sipyii pu bɛɛri ni. 2 Mʼa shuun shuun gbarashuun le fɛfɛɛrɛ ɲìi yaŋmuyɔ yi bɛɛri ni, yemu yʼa byi saraga Kilɛ mu ge, shuun wa bɛɛri boo ni zhɔ. Mʼa shuun shuun lɔ yaŋmunɔrɔyɔ yi bɛɛri ni, shuun wa bɛɛri boo ni zhɔ. 3 Mʼa shuun shuun gbarashuun lɔ shazhɛɛrɛ ti bɛɛri bɛ ni, shuun wa bɛɛri boo ni zhɔ, kɔnhɔ yi shi wu bye ɲiŋɛ ki bɛɛri na. 4 Cabyaa gbarashuun bu doro, nʼa da zanha shan ɲiŋɛ ki na caya kɛlɛɛ shishɛɛrɛ (40) ni piiye kɛlɛɛ shishɛɛrɛ (40) funŋɔ ni. Ɲìi yaŋmuyɔ yi bɛɛri nɛ yàa ge, nɛ na ba yi bɛɛri kyɛɛgi, di yi xɔ ɲiŋɛ ki na.»5 Tɛhɛnɛ Baa Kilɛ ya yemu jo Nuxhun mu ge, a Nuxhun di yee bɛɛri pye.
6 Logbɔhɔ ki tuun wu ni ɲiŋɛ ki na, Nuxhun yee wa bye xhuu gbaara (600). 7 A Nuxhun di jé kɔrɔgɔ ki ni, ni wu shɔ, ni wu jalaa, ni pu cèe ni logbɔhɔ ki ɲaha na.a 8 Fɛfɛɛrɛ ɲìi yaŋmuyɔ, ni ɲìi yaŋmunɔrɔyɔ, ni shazhɛɛrɛ, ni ɲiŋɛ yakokaara bɛɛri: 9 a yi bɛɛri shuun shuun di jé ni Nuxhun ni kɔrɔgɔ ki ni, tuugo bɛɛri boo ni zhɔ, ba Kilɛ ya yi jo wɛ.
Logbɔhɔ ya pa ɲiŋɛ ki na
10 Ba kee cabyaa gbarashuun wʼa toro wɛ, a logbɔhɔ di ba ɲiŋɛ ki na.
11 Nuxhun yee xhuu gbaara (600) yee li yeŋɛ shuun wogo ki cabyaa kɛ ni gbarashuun wu caŋa. Kee caŋa ke a ɲiŋɛ nɔhɔdaan lobulowecogoyo yi bɛɛri ɲɔ di mugi. A fugba wu lɔhɔ tayahaya yi ɲɔ di mugi.b 12 A zanha di do ɲiŋɛ ki na caya kɛlɛɛ shishɛɛrɛ (40) ni piiye kɛlɛɛ shishɛɛrɛ (40).
13 Kee caŋa kiyɛ pyaa Nuxhun, ni wu shɔ, ni wu jalaa: Sɛmu, ni Kamu, ni Zhafɛti, ni pu cèe taanri ya jé kɔrɔgɔ ki ni. 14 Pii sipyii pii pʼa jé kɔrɔgɔ ki ni, ni sige yaŋmuyɔ tuuyo yi bɛɛri, ni yapɔrɔyɔ tuuyo yi bɛɛri, ni ɲiŋɛ yakokaara tuuyo yi bɛɛri, ni shazhɛɛrɛ tuuyo yi bɛɛri, shiire wa yaŋmurɔ temu bɛɛri mu na yiri ge, ni tee bɛɛri. 15 A ɲìi yaŋmuyɔ yi bɛɛri shuun shuun di jé kɔrɔgɔ ki ni Nuxhun mu. A yi bɛɛri shuun shuun di jé kɔrɔgɔ ki funŋɔ ni. 16 A ɲìi yaŋmuyɔ yi bɛɛri bee ni zhaa di jé kɔrɔgɔ ki ni, ma na jo ba Kilɛ ya yi jo Nuxhun mu wɛ. A Tɛhɛnɛ Baa Kilɛ di kɔrɔgɔ ki ɲɔ tɔ wá wu na.
17 A logbɔhɔ kʼi ba ɲiŋɛ ki na cabyaa kɛlɛɛ shishɛɛrɛ (40) funŋɔ ni. A lɔhɔ kʼi bɛlɛ ɲiŋɛ ki na, na kɔrɔgɔ ki yirige na beele ɲiŋɛ ki fugba ni. 18 Lɔhɔ kʼa pa bɛlɛ, na duri ɲiŋɛ ki na ge, a kɔrɔgɔ kʼi ganha na beele lɔhɔ ki fugba wu ni. 19 Lɔhɔ kʼa pa bɛlɛ, na pɛlɛ ɲiŋɛ ki bɛɛri na fo xuuni, fo na yaŋa bobotɔɔnyɔ yi bɛɛri ɲuŋɔ jɔ. 20 Lɔhɔ kʼa yaya yi ɲuŋɔ jɔ na dugi yi fugba ni, fo na nɔ mɛtɛrɛlɛɛ gbarashuun ni mɛtɛrɛ taaga na. A yaya yʼi biin. 21 Yaaga yaaga kʼa ɲɛri ɲiŋɛ ki na ge, a yi bɛɛri di xhu: shazhɛɛrɛ, ni yapɔrɔyɔ, ni sige yaŋmuyɔ, ni ɲiŋɛ yakokaara bɛɛri, ni sipyii pu bɛɛri. 22 Munaa yaaga bɛɛri kʼa ŋmɔgara yeege ki munaa ni, kʼi ɲɛ ɲiŋɛ tawaga ke na ge, yee bɛɛri yʼa xu. 23 Munahaa yaŋmuyɔ ye bɛɛri yi bye ɲiŋɛ ki na ge, a Kilɛ di yi bɛɛri kyɛɛgi, na yi xɔ. Na lɔ sipya na, fo na shɛ nɔ ɲiŋɛ xaara, ni ɲiŋɛ yakokaara na, ni fugba shazhɛɛrɛ, a yee bɛɛri di gyɛɛgi na xhɔ fɛɛfɛɛ ɲiŋɛ ki na. Nuxhun ni piimu pʼa bye kɔrɔgɔ ki ni ge, pee yɛ pʼa shɔ.
24 A lɔhɔ kʼi bɛlɛ yaha ɲiŋɛ ki na, fo yebyaa kaguro.