6
Tuun wemu ni sipyiire tʼa ɲɔ kɔn na ɲɛhɛŋi ɲiŋɛ ki na ge, na pushaa ge, 2 a Kilɛ jalaaa di sipyii pushaa ɲa pʼa ɲɔ, na bɛ kanha pu kaa na, na pii shɔɔnri lɔ pu ni na pye pu cèe. 3 A Tɛhɛnɛ Baa Kilɛ di jo: «Nɛ Munaa da diin sipya ni tuun bɛɛri ni wɛ, bani wu ɲɛ ceexaara. Wu shi wu caŋa ɲɛhɛɛ da ba laha yee xhuu nigin ni kɛlɛɛ shuun (120) na wɛ.»4 Wee tuun we ni mɔhɔbahatɔɔnyɔ yi bye ɲiŋɛ ki na, fo na pa nɔ tuun wa na.b Kilɛ jalaa pʼa bi fulo sipyii pushaa pu na, na nagoo se pu na. Pee pʼa pye taashiinɛ li wo fanhafɛɛ, ni mɛyɛ fɛɛ, ni sipyigbɔɔ.
Ɲiŋɛ ki sipyii pu wo kuumɔ pe
5 A Tɛhɛnɛ Baa Kilɛ di sipyii pu kuumɔ pu ɲa pʼa pɛlɛ ɲiŋɛ ki na. Pu caŋa bɛɛri funzhakeree ɲɛ kuumɔ. 6 Na sipya yàa yaha ɲiŋɛ ki na, a li daajeŋɛ di jé Tɛhɛnɛ Baa Kilɛ ni. A wu luu di yìri xuuni. 7 A Tɛhɛnɛ Baa Kilɛ di jo: «Nʼa da na sipyiyaalaa pu bɛɛri kyɛɛgi ɲiŋɛ ki na, na lɔ sipya na, na shɛ nɔ ɲiŋɛ xaara, ni yakokaara, ni shazhɛɛrɛ na, bani yi bɛɛri yàa daajeŋɛ kʼa jé nɛ ni.» 8 Ga ná wa bye wà, wu mɛgɛ ɲɛ Nuxhun. Wʼa bi fɛrɛmɛ ta Tɛhɛnɛ Baa Kilɛ ɲaha tàan.c
Tɛhɛnɛ Baa Kilɛ ya Nuxhun shɔ
9 Nuxhun ni wu nagoo pu wo keree ki wa kiiri.
Nuxhun bi bye sipya wemu wʼa tii ge, jaagi baa fɔɔ wʼa bye wee tuun wu wo sipyii pu niŋɛ ni. Wu bi ɲaari ni Kilɛ ni.d 10 Jalaa taanri Nuxhun bi se: Sɛmu, ni Kamu, ni Zhafɛti. 11 Ɲiŋɛ ki bi kolo Kilɛ ɲaha tàan, ɲiŋɛ ki bi ɲi kuumɔ keree na. 12 A Kilɛ di ɲiŋɛ ki wii, na ki ta kʼa kolo, bani sipyiire ti bɛɛri ti bi kolo.
Nuxhun wo kɔrɔgɔ ki keree
13 A Kilɛ di Nuxhun pye: «Sipyiire ti bɛɛri taaxɔɔ lʼa nɔ nɛ ɲaha tàan, bani ɲiŋɛ kʼa ɲi ti kuumɔ na. Li wii, nʼa da ba ti ni ɲiŋɛ ki bɛɛri kyɛɛgi. 14 Nuxhun, tige kɔrɔgɔ nigbɔhɔ ka yàa ni govɛri tige ni mayɛ wuu na! Mʼa piyɛyɛ yàa ki funŋɔ ni. Mʼa ki funŋɔ ni ki kadugo ki wɔɔgɔ ni ɲiŋɛ kuro ni. 15 Mʼa ki yàa mumɛ na: Ki ɲidaa di bye mɛtɛrɛlɛɛ xhuu nigin ni kɛlɛɛ kaguro (150). Ki kadaa di bye mɛtɛrɛlɛɛ kɛlɛɛ shuun ni kaguro (25). Ki ɲubile di bye mɛtɛrɛlɛɛ kɛ ni kaguro (15). 16 Mʼa kafɛɛgɛ tajege yaha kɔrɔgɔ ki na, ma ki maha círi; ki ni kataŋa ki tɛ wu bye keŋɛ ɲii nigin. Mʼa kɔrɔgɔ ki kuɲɔɔ li yaha kabanugo nigin na. Mʼa piyɛyɛ kuuyo taanri yàa kɔrɔgɔ ki funŋɔ ni: Nɔhɔdaan wogo, ni niŋɛ wogo, ni fugba wogo.
17 «Nɛ na ba logbɔhɔ yaha ba ɲiŋɛ ki na. Munaa wa ceexaara temu bɛɛri ni ɲiŋɛ ki bɛɛri na ge, nɛ na ba ti bɛɛri kyɛɛgi. Yara yara li wa ɲiŋɛ ke na ge, yi bɛɛri na xhuu. 18 Nɛ na ba kariɲɛɛgɛ ɲɔmɛɛ nixhɔbaana lɔ ma mu. Ma na ba jé kɔrɔgɔ ki ni, ma ni ma shɔ, ni ma jalaa, ni pu cèe. 19 Mʼa ye ɲiŋɛ ɲìi yaŋmuyɔ ye bɛɛri tuuyo shuun shuun leŋɛ kɔrɔgɔ ki ni. Kɔnhɔ yʼi bye ɲìi na ma mu, ka bɛɛri boo ni zhɔ. 20 Shazhɛɛrɛ tuuyo bɛɛri, ni ɲìi yaŋmuyɔ bɛɛri tuuyo, ni ɲiŋɛ yakokaara tuuyo bɛɛri, yi bɛɛri shuun shuun na ba ma yíri, kɔnhɔ yʼi bye ɲìi na. 21 Yaaga yaaga kʼa li ge, mʼa ya lɔ yee bɛɛri tuuyo ni ma yaha mayɛ tàan, yee na ba bye ma ni ɲìi yaŋmuyɔ yi wo yaligee.»
22 A Nuxhun di li pye mu. Kilɛ ya lemu jo wu mu ge, a wu lee bɛɛri pye.e